3
¿Ñeje cani mësarupi asato coa yëquëja̱'a co'ye jerepa de'oye yo'ohuë,
cuasajë caye a'ni,
pa̱nita'a yëquë ayere cajë toyacaisi ja'ore mësaruna sani i̱ñoñe pa'iquë?
¿Pa̱nita'a yëquëpi,
mësaruni yëquë ayere cajë,
yecohua'i ñaja'core toyacaijë̱'ë cajë se̱ñe pa'iquë,
yecohua'i yo'oyeje̱?
2 Pa̱ni ja̱je yo'oye,
mësaru a'ë,
yëquë toya cua̱ñosi ja'huaje̱ pa'iohua'i.
Ja̱pi tsoe ti̱'api,
yequë ja'hua caraye pa̱ji.
Ja̱je pa'ina,
mësaru a'ë,
yëquë joñoa toyasicohua'i.
Ja̱je pa'ina,
si'a pa̱i mësaru pa'iye asajë ñañë,
ti̱ñarepa.
3 Ja̱je pa'ina,
pa̱i ñani ti̱ña asayë,
toyani jëjo sao ja'huaje̱ pa'iohua'i mësaru pa'i do'ire.
Yëquëpi i̱ cocare quëajëna,
Maija'quë huajëquëre papi i̱ joyopi toyapi,
mësaruna quë̱na to̱ñana tintapi toyama'ë paji'i,
mësaru joñoare pana toyapi,
Cristo case'ere.
4 Ja̱je pa'ina,
Cristoja̱'a iyere Maija'quëpi necaija̱'quë api asayë.
5 Ja̱je pa'ina,
si'aye yëquë yo'o ti̱'añe Maija'quë i̱sise'e a'ë.
Ja̱ do'ire yëquëpi yo'o ti̱'añë caye peoji.
6 Ja̱je pa'ina,
i̱pi yëquëre i̱ huajë ca nëose'ere quëacaicohua'ire nepi.
I̱ huajë ca nëose'e cato joyo ayere pa'ë,
coa toyasico maca pa'iye pa̱ni.
Cua̱ñese'e toyase'e cato ju̱'iñena i̱siye pa'iji.
Joyo aye cato pa'iye a'ë.
7 Moiséspi cua̱ñese'ere quë̱na to̱ñana toyase'ere daquë ñaco ma'ñañerepa daji'i.
Daina,
Israel pa̱i i̱ tsia ña ti̱'añe pa̱huë,
ai ñaco ma'ña do'ire.
Ja̱ cua̱ñeñe pa̱ire ju̱'iñena neñeta'a miañerepa de'oyerepa daji'i,
miañe sa caraja̱iñeta'a.
8 ¡Ja̱je pa'iye sëte airepa de'oye a'ni,
joyore pana neñere huajëye ca nëose'ere quëaye!
9 Ja̱'në ca nëose'e cato de'oyere pa'ë.
Ja̱ yë'ta'a maire nejoñere i̱sipi.
Ja̱ cua̱ñese'e tayo yo'o do'ire.
Ja̱je pa'iye sëte airepa de'oye a'ni Maija'quë huajë ca nëose'e nuñerepa pa'icohua'ire neñe pa'i do'ire.
10 Ja̱'në de'oyerepa ca nëose'epi yure ai de'oyere pana co̱ni ñato ja̱'në de'oyerepa pa'ise'epi do'i peoye po̱nëpi.
11 Ja̱je pa'ina,
miañe sa caraja̱iñeta'a de'oyerepa pa'ise'e sëte,
jerepa de'oyere pa'ë,
ti pani huesë ja̱'ñe cato.
12 Ja̱je pa'ina,
iye mai uteyere pajë ti ca'raye peoyerepa cayë,
si'aohua'i asa hue̱'ñana.
13 Israel pa̱ipi miañe yayayere ñama'pë pa'ija̱jë caquë ë̱sequë Moisés ca̱pi i̱ tsia pë'pëni yo'ose'eje̱ pa'ye yo'oye pa̱ñë,
yëquë cato.
14 Moisés tsia pëpëyeje̱ paye Israel pa̱i asa ti̱'añe pëpësicohua'ipi pa'iyë.
Ja̱je ca nëose'ere ñajëta'a asa ti̱'añe pa̱cohua'i a'ë.
Ja̱ pëpëse'e cato nejoñe pa'iji,
Cristoni i̱re papi cajë cuasa do'ire.
15 Ja̱ yë'ta'a Israel pa̱ipi yure iye mu'seña Moisés cua̱ñese'ere ñato i̱ohua'i asayena pëpësicohua'ipi pa'iyë,
asa ti̱'ama'pë pa'icohua'ipi.
16 Ja̱je pa'iquëta'are pa̱ipi Cristona sehuoto ja̱ pë'pëyepi peo hue̱'ña ne huesëji.
17 Ja̱je pa'ina,
mai Ëjaë cato joyo api.
Ja̱je pa'ina,
Ëjaë joyo pa'i hue̱'ña cato ta̱'tëpo ti peo hue̱'ña'ë.
18 Ja̱je pa'ina,
mai si'aohua'i mai tsia pë'pëse'e peocohua'i cato tsi̱ña de'huaje̱ pa'iohua'i a'ë,
Ëjaë de'oyepi maina ju'aquëna,
i̱ñocohua'ipi.
Ja̱je yo'ojë i̱je pa'iohua'irepa po̱nëjë saiyë,
i̱ de'oyere si'anëpi jerepa pa do'ire.
Ja̱je pa'iohua'i pa'iyë,
Ëjaëpi,
joyo sëte yo'o do'ipi.