2
Mësarute oi ëaye neñere coequë ti̱jupë sani ñañe pa̱si'i,
cuasahuë.
2 Yë'ëpi mësaru quë'rona sani mësarute oi ëaye nesiquë pa'ito ¿yë'ëre nepi sihua ëaye yo'o huasoja̱'cohua'i a'ni?
¡Ja̱re yë'ë oi ëaye nesicohua'ipi yë'ëre sihua ëaye yo'ocaiye pa'ini!
3 Ja̱je pa'ina,
ja̱re ja̱je mësarute toyahuë,
yë'ë sani ti̱'a maca yë'ë oi ëaye neñere je̱oni de'huasicohua'i pa'ija̱jë caquë.
Yë'ëpi ja̱ro sani sihuaquëna,
mësaruje̱ sihuaja̱'cohua'i a'ë cuasahuë.
4 Ja̱je pa'iquëta'are ja̱ toya ja'hua toya maca cato ai cuasaquë co'a ju̱'i cui'ne otare paque oi toyahuë.
Toyama'ë paë'ë,
mësaruni oi ëaye nesi'i caquë.
Coa ai jerepa yë'ë mësarute joyore papi oiyere i̱ñosi'i caquë toyahuë.
Co'aye Yo'oquëre Oiye
5 Yë'ëre oi ëaye yo'osiquë pani yë'ëse'ere oi ëaye yo'oye pa̱pi cuasayë.
Mësaruteje̱ si'ahua'ire oi ëaye yo'opi cuasayë.
Ai co'ayerepa yo'opi cayere coequë,
oi ëaye yo'opi cayë.
6 Mësaru i̱ co'aye yo'osi do'ire si'sese'e tsoe de'oji,
ja̱ ja'ye pa'ija̱quë.
7 Ja̱je pa'ina,
yure cato i̱ tayose'ere sa̱i de'huacani yëhuo huasojë̱'ë,
yo'oquë tëto saiperepa ai oiyepi daima'quëni cajë.
8 Ja̱je pa'ina,
mësarute se̱ñë,
cui'naëni i̱te ai oiyere i̱ñojë'ë,
de'oye yo'oyepi.
9 Ja̱'në mësarute toyahuë,
iye yo'ose'e ayere caquë,
mësarupi yë'ë ye'yayere si'aye sehuocaito ñasi'i caquë.
10 Ja̱je pa'ina,
mësaru sa̱i de'huacaiquëni yë'ëje̱ sa̱i de'huacaiyë.
Tayose'e pa'ina,
sa̱i de'huacaiye,
pa'ina,
sa̱i de'huacaisiquë pani,
Cristo ña hue̱'ñana sa̱i de'huacaiyë,
mësaru do'ire.
11 Ja̱je yo'ojëna,
Satanáspi i̱ yëye ti̱'añe pa̱sipi,
maire.
Tsoe maipi asayë,
i̱ maire nesi'i caquë yo'oye.
Troasre Pablo Pa'i Ai Cuasase'e
12 Cristo coca quëasi'i caquë Troas daripëna ti̱'asi maca jaiye Cristo co'amaña de'oye necati'ñe pa'ye ti̱'ahuë.
13 Ja̱je pa'iquëta'are yë'ë joyo sihuayepi peopi,
Maija'quë do'iquë Titore ti̱'ama'ë pa'isi do'ipi.
Ja̱je pa'ina,
ja̱ohua'ire saiyë caquë pëpani Macedonia yejana saë'ë.
De'hue Quëco Saoye
14 Maija'quëpi maire si'anë Cristo Jesús ja̱'re ñese quëco saoyena saji.
Ja̱je pa'ina,
maija'a i̱ cocare pare i̱ñoji,
pa̱ire.
15 Mai cato Jesucristo ma'ña huëo së̱ñeje huëo së̱ pa'iohua'i a'ë.
Cristo Maija'quëna huëo së̱ ma'ña i̱siyeje̱ pa'ye.
Ja̱je pa'ijë,
si'a hue̱'ña huaso cua̱ñocohua'ina cui'ne ne huesësicohua'ina i̱ti së̱ñepi ju'aji.
16 Ne huesësicohua'ire cato,
i̱ti së̱ñe tsi̱mare pa'ë.
Pa'iquëta'are huaso cua̱ñocohua'ire cato huëo së̱ñere papi pa'iye i̱siyere pa'ë.
Ja̱je pa'ina,
¿nepi iye yo'oyere ne ti̱'aja'cohua'i a'ni?
17 Yëquë Cristo ja̱'re tsioni pa'i do'ire i̱ jëjo daosicohua'i sëte Maija'quë ña hue̱'ñana nuñerepa care pajë cayë.
Yecohua'i jai pa̱i Maija'quë coca quëa do'ipi curiquë neñu'u cajë yo'oyeje̱ pa'ye yo'oye pa̱ñë,
yëquë.