Israel Pa̱ise'ere Maija'quë Jo'ya Nese'e
9
Nuñerepa cayë,
Cristore sehuoquë sëte.
Coa cosoma'ë pa'iyë.
Ja̱je pa'ina,
Maija'quë joyopi cuasaquëna,
yë'ë joyo cuasaye nëiñepi më'ë nuñerepa cuasayë cacaiji,
yë'ëre.
2 Ja̱je pa'ina,
si'anëpi yë'ë joyo a'siyerepa ai oi pa'iyë.
3 Ja̱je oi cuasayë,
yë'ëpi merepa Cristore hua sani nejo cua̱ñoñere pa'ina,
yë'ë pa̱i,
Israel tsëcapë cajeohua'ipi jëacaitota'a de'ora'pi,
cuasayë.
Ja̱je yo'o do'ipi co̱caiye pa'ito yo'ora'huë cuasayeque cuasayë.
4 Ja̱ohua'i cato Israel tsëcapë acohua'i a'ë,
Maija'quëpi i̱ mamajëre nesicohua'i a'ë.
Maija'quë i̱ohua'i ja̱'re miañerepa pa'ina,
pa'isicohua'i a'ë.
Maija'quë cayere i̱ohua'ipi de'oye sehuojëna,
i̱ co̱cai ja̱'ñe ca nëose'e pasicohua'i a'ë.
Moisés cua̱ñese'e pacohua'i a'ë.
Cui'ne Maija'quë huë'ere ñacaiyere pasicohua'i a'ë.
Cui'ne i̱ de'oye ca nëose'e pasicohua'i a'ë.
5 Ja̱ohua'i cato mai aipë tsëcapë acohua'i a'ë.
Ja̱re ja̱ tsëcapëja̱'a pa̱ina Cristoje̱ ai de'opi.
Ja̱ë cato Diusu paji'i,
si'aye jerepa pa'i.
Ja̱ëni de'oquëre pa'ni caye pa'iji,
si'anëpi.
Ja̱je pa'ija̱quë.
6 Cama'ë pa'iyë,
Maija'quë ca nëose'epi ti̱'añe pa̱ëna,
coa ai jerepa yë'ë cato cayë,
si'aohua'irepa Israel tsëcapë acohua'ipi Israel pa̱ire peo do'ire.
7 Ja̱je pa'ina,
Abraham tsëcapë acohua'i Maija'quë ña hue̱'ña si'aohua'irepa i̱ mamajë peoyë.
Ja̱je pa'ina,
Maija'quëpi capi:
“Më'ë tsëcapërepa cato Isaacja̱'a ai de'oja̱'cohua'i a'ë.”
8 Ja̱je pa'ina,
iyepi maire ti̱ñarepa quëa i̱ñoji,
Maija'quë mamajërepa pa'iye cato pa̱i tsëcapëja̱'a ti̱'añe peoye,
coa ai jerepa Maija'quë ca nëose'eja̱'a ai de'osicohua'ipi i̱ mamajërepa pa'iye ti̱'añe.
9 Ja̱je pa'ina,
Abrahamre Maija'quëpi ca nëoquë capi:
“Zara mamaquëre paja̱'coa,
yeque o̱metëcahuë yë'ë co'i maca.”
10 Iyese'e pa'iye papi,
yequeje̱ cui'ne mai ai Isaac mamajërepa paë'ë,
Rebeca caya mamajë.
11-13 Ja̱ohua'ire Maija'quëpi ja̱ yë'ta'a co'ama'në cui'ne ja̱ yë'ta'a co'aye pa̱nita'a de'oye yo'oma'në Rebecare ca nëopi.
Më'ë mamaquë maja'yëpi yo'jeire necaiquë pa'ija̱'quë api.
Ja̱je cui'ne toyase'eje̱ caji:
“Jacoboni oi,
Esauni coehuë.”
Ja̱je pa'ina,
iye yo'ose'epi Maija'quë i̱ cuasayeje̱ pa'ye yëni yo'oquë sahuapi,
i̱ohua'i yo'o do'ire cuasama'ë,
coa i̱ yë do'ire.
14 ¿Ja̱je yo'oquëna,
ñani maipi Maija'quë nuiñe yo'oma'quë api caja̱'cohua'i a'ni?
¿Pa̱ni me ja̱je caye'ni?
15 Ñajë'ë,
Maija'quë Moisésre case'ere:
“Yë'ë yëquëni oni yejesi'i teaye pa'ire ñani,
cui'ne yë'ë yëquëni oi ñani co̱casi'i.”
16 Ja̱je pa'iye sëte pa̱i yëyepi,
pa̱nita'a tutu yo'oyepi ti̱'añe peoji.
Coa Maija'quë teaye ñani oi co̱caiyepi ti̱'añe pa'iji,
i̱ sahuasicohua'i pa'iye.
17 Ja̱je pa'ina,
toyase'e caji,
Egípto pa̱i ëjaëre,
Maija'quë case'ere:
“Më'ëre Egípto pa̱i ëjaëre nehuë,
më'ëja'a yë'ë tuture i̱ñosi'i caquë,
cui'ne si'a hue̱'ña pa'icohua'ipi yë'ë mamire asaja̱jë caquë.”
18 Ja̱je pa'ina,
Maija'quë cato ja̱re i̱ teaye ñani oiquëni oiquë api,
cui'ne ja̱re i̱ yëquëni jëa joyo ne huesoquë api.
19 Ja̱je pa'ina,
mësarupi caja̱'cohua'i a'ë,
yë'ëre.
Cui'ne ja̱je yo'oquëta'a ¿me yo'oquë Diusu pa̱ipi co'ayë caquë'ni?
¿Nepi,
i̱ cuasaquë yo'oye sa̱ñope ca ti̱'añe pa'ina?
20 ¿Pa̱i maca më'ë i̱quei'ni,
Maija'quëre sa̱ñope ca ja̱'ñe?
¿Soto cua'coropi i̱ti nesiquëre sa̱ñope caye?
¿Me nesi'quë yë'ëre co'aye nei'ni?
cama'coa.
21 Ja̱je pa'iye sëte sotopi de'huaquë cato ja̱re i̱ yëyeje̱ pa'ye neñe pa'iji.
Ja̱je pa'ina,
ja̱re i̱ti sotopi neñe pa'iji de'o cua'cororepa ëja co'amañase'e neja'core cui'ne yeconi si'a co'amaña neroja̱ija'core neñe pa'iji.
22 Ja̱je pa'ina,
i̱ohua'i co'aye yo'osi do'ire sa̱i cua̱ñojë nejo cua̱ñoja'cohua'i a'ë,
co'a cua'conoaje pa'yepi.
Ja̱ohua'i jo̱sa yo'ojëna,
Maija'quëpi ai dahuëre quëcopi yo'opi,
i̱ pë̱i sa̱iñere cui'ne i̱ tuture i̱ñosi'i caquë.
23 Ja̱je yo'o maca maina de'o cua'conoaje pa'iohua'ina i̱ pa'iye de'oyere pare i̱ñosi'i caquë yo'opi.
Ja̱je pa'ina,
maire teaye ñani oni yejepi.
Oni yejeni tsoe hue̱'ñana de'ocohua'ire ëja de'huapi,
maire,
i̱ pa'i hue̱'ñare co̱ni pa'ija̱jë caquë.
24 Ja̱je pa'ina,
Maija'quëpi maire soipi,
judío pa̱i acohua'ire cui'ne judío pa̱i peocohua'i acohua'ire.
25 Maija'quë quëacaiquë Oseas toya pëpë Maija'quë capi,
ñeje:
Yë'ë pa̱ire hue'yoja̱'quë a'ë,
ti̱ pa'isicohua'ini.
Yë'ë oima'co pa'isiconi yë'ë oicore hue'yosiquë a'ë.
26 Cui'ne mësaru yë'ë pa̱i peoyë casicohua'ini,
Ja̱re i̱ohua'ini,
Maija'quë huajëquërepa mamajëre hue'yoja̱'quë a'ë.
27 Ja̱je pa'iquëta'are Israel pa̱i ayere Maija'quë quëacaiquë Isaíaspi ñeje capi:
“Israel pa̱i tsëcapë acohua'ipi jai pa̱i pa'ija̱'cohua'i a'ë,
jai tsiaya meja pa'iyeje̱ pa'yerepa.
Pa'ijëta'a coa a'ri pa̱i maña ja̱o acohua'ipi huasosicohua'i pa'ija̱'cohua'i a'ë.
28 Ja̱je pa'ina,
Ëjaëpi i̱ case'eje̱ pa'ye yo'o ti̱'aquë i̱ nuñerepa yo'oyepi esa ne de'huaja̱'quë api,
si'a yeja pa'icohua'ire.”
29 Ja̱re i̱pi Isaías capi,
ñeje:
Si'a hui̱ñaohua'i Ëjaëre papi mai tsi̱re i̱sima'quë pa'ito
Tsoe Sodoma cui'ne Gomorra dari nejose'eje̱ pa'ye nejosicohua'i patira'huë.
Judío Pa̱i Cui'ne Maija'quë De'o Case'e
30 ¿Ja̱je pa'ito me caja̱'cohua'i a'ni,
mai?
Iyere asani,
judío pa̱i peocohua'ipi nuñerepa pa'iyere ti̱'ahuë,
nuñerepa pa'iyere ti co'ema'cohua'ipi.
Coa necaiquëre pare cuasa do'ipi ti̱'ahuë.
31 Ja̱je pa'iquëta'are judío pa̱i cato nuñerepa pa'iyere ti̱'añu'u cajë cua̱ñese'ere sehuoni ti̱'añe pa'iji cuasajë yo'ohuë.
Yo'ojëta'a ti̱'añe pa̱huë.
32 ¿Me yo'ojë pa̱se'eje̱ ñani,
i̱ohua'i yo'oyepi ti̱'añe pa'iji,
cuasa do'ire?
Coa necaiquëre pare i̱te cuasama' do'ire ti̱'añe pa̱huë,
i̱ohua'i yo'o do'ipi ti̱'añu'u cuasa do'ire.
Ja̱je pa'ina,
ju'ahuë,
ju'a ta̱ocore,
quë̱naona.
33 Toyase'e Maija'quë capi,
ñeje:
Yë'ëpi Sión cu̱tihuëna quë̱naore o̱añë.
Ja̱ona mësaru sa̱ñope ju'aja̱'cohua'i a'ë.
I̱ona quëco paquë cato,
huajëya'ye pa'iye peosipi.