Maija'quë Joyo Do'ipi Pa'iye
8
De'oji,
yure cato Cristo Jesús ja̱'re tsioni pa'icohua'ire ti sa̱i de'hua cua̱ñoñe peoji.
2 Ja̱je pa'ina,
co'ayepi cui'ne ju̱ni huesëyepi jo'yaëre paquëni eto huasopi,
yë'ëre,
Cristo Jesús ja̱'re tsioni pa'iyepi,
joyo pa'iyepi.
3 Moisés cua̱ñese'e cato ja̱je eto huasoye pa̱pi.
Pa̱ise'e co'aye yo'oyepi neñu'u cajë yo'ojëna,
cua̱ñese'epi tutu peoye de'opi.
Ja̱je pa'iquëta'are Maija'quëta'a ne ti̱'api,
iye pa'iyere i̱siquë.
Ja̱je pa'ina,
ja̱re ne ti̱'asi'i caquë i̱ mamaquëre pa̱i ca̱pë quë'ire cui'ne coa pa̱ije pa'ire jëjo daopi,
co'aye yo'o do'ire sa̱i to̱caija̱quë caquë.
Ja̱je yo'oni co'ayere ja̱ ca̱pë do'ija̱'a nejo huesoye ti̱'api.
4 Maipi de'hue Moisés cua̱ñese'ere yo'o ti̱'ajajë caquë pa'icohua'ipi yure mai pa'ima'pë pa'iyë,
noni pa̱ise'e pa'iyere.
Coa ai jerepa yure cato joyo pa'iyepi pa'iyë.
5 Ja̱je pa'ina,
pa̱ise'e noni pa'iyere pa'icohua'i cato pa̱ise'e cuasayere cuasajë pa'iyë.
Ja̱je pa'ijëta'are joyo pa'iyere pa'icohua'i cato joyo pa'iyere cuasajë pa'iyë.
6 Ja̱je pa'ina,
pa̱ise'e noni pa'iyere cuasayepi cato ju̱'iñena saye a'ë.
Ja̱je pa'iquëta'are Maija'quë joyo ayere cuasayepi cato de'oye pa'iyena saye a'ë.
7 Coa pa̱ise'e noni pa'iyere cuasajë yo'ocohua'i cato Maija'quëre sa̱ñope yo'ocohua'i a'ë.
Ja̱je pa'icohua'ipi Maija'quëre coecohua'ipi i̱ cua̱ñeñe sehuojë pani ti̱'añe peoyë.
8 Ja̱je pa'ina,
pa̱ise'e noni pa'iyere sehuojë pa'icohua'i cato Maija'quë sihuaquë ñañere yo'o ti̱'añe peoji.
9 Ja̱je pa'ina,
mësaru cato pa̱ise'e noni pa'iyere sehuoma'pë pa'iyë.
Coa ai jerepa Maija'quë joyo cayere sehuocohua'ipi pa'iyë,
Maija'quë joyopi mësaruni pa'ina.
Ja̱je pa'ina,
Cristo joyore peocohua'i pani Cristo tse̱cohua'i peoyë.
10 Mësaru ja̱'re co̱ni Cristopi pa'ito mësaru joñoa huajëyepi pa'iji,
nuñerepa pa'i do'ipi.
Ja̱je pa'iquëta'are mësaru ca̱pë̱a co'aye yo'o do'ire ju̱'isicohua'ije̱ pa'ye pa'iyë.
11 Cristo Jesure ju̱'isiquëni huëosi joyopi,
ja̱ joyopi mësaruteje̱ ju̱'i ca̱pë quë'iohua'ireje̱ huëoja̱'quë api,
huajëye pa'iyena,
Maija'quë joyopi mësaruni pa'i do'ire.
12 Ja̱je pa'ito pa̱ise'e noni pa'iyere pa'ima'pë Maija'quë do'ijë.
Mai cato joyo cayere pa'iye pa'iji.
13 Ja̱je pa'ina,
mësarupi pa̱ise'e yo'ojë pa'iyere pa'ini ju̱'ija'cohua'i a'ë.
Ja̱je pa'iquëta'are joyopi co̱caina,
pa̱ise'e yo'ojë pa'iyere nejoni mësaru pa'ija̱'cohua'i a'ë.
14 Si'aohua'i Maija'quë joyopi cuaquëna,
pa'icohua'i cato Maija'quë mamajë a'ë.
15 Ja̱je pa'ina,
mësaru Maija'quë mamajëre pare ne joyore i̱si cua̱ñohuë.
Ja̱je pa'ina,
ja̱ joyopi mai ja̱'re caquëna,
ja'quëre papi cayë,
Maija'quëre.
I̱sima'pë jo'ya ne cua̱ñosi joyore,
cui'naohua'ipi Maija'quëre ca'raohua'i pa'ija̱'a joyore.
16 Maija'quë joyopi mai joyo ja̱'re co̱ni nuñerepa Maija'quë mamajërepa pa'icohua'i a'ë quëayë,
maire.
17 Ja̱je pa'ina,
Maija'quë mamajë sëte mai si'aye i̱ ca nëose'e paja̱'cohua'i a'ë,
Cristo ja̱'re co̱ni te'e.
Maipi te'e i̱ ja̱'re ai yo'osicohua'i pani,
i̱ de'oyerepa jeteyo'je paja̱'cohua'i a'ë,
i̱ ja̱'re co̱ni.
18 Yure mai ai yo'oye teaye pa'ye a'ë.
Ja̱je pa'ina,
mai ai yo'oyepi co̱ni ñato peoji,
jeteyo'je mai pa'i ja̱'ñere.
Ja̱je pa'ina,
Maija'quë de'oyere papi maini pa'ina,
de'ocohua'irepa pa'ija̱'cohua'i a'ë.
19 De'hue Maija'quë mamajëre i̱ñoquëna,
ñasi'i caco si'a yeja Maija'quë de'huasico ai ña ëa ju̱'io uteco pa'ico.
20 Ja̱je pa'ina,
si'aye Maija'quë du'ru ne de'huase'e cato caraja̱ise'e a'ë,
ju̱'iñepi,
ja̱'juñepi,
cui'ne pu̱'cayepi pa'i do'ire.
Maija'quëpi ja̱re caquë yëni ne de'huapi,
jeteyo'je yequë mu'se de'oyerepa pa'ija̱'coa caquë.
21 Ja̱je pa'ina,
ju̱'ijë ja̱'juñe caraja̱sipi,
si'aye Maija'quë ne de'huaquë pa'iye.
Ja̱ do'ire si'a mu'seña Maija'quë mamajë ai yo'ojë pa'icohua'ipi utejë pa'iyë,
si'aye de'oyerepa pa'ija̱'coa cajë.
22 Ja̱je pa'ina,
yureje̱ mai asayë,
si'aye Maija'quë de'huasicopi nomio tsi̱ co̱a huëoni ai a'si ju̱'iñeje pa'ye ai yo'oco oio pa'iye.
23 Iye yejase'e ai yo'oye pa̱co maije ai yo'oyë,
yequë mu'se pa'i ja̱'ñere joñoapi oijë.
Du'ru pajë pa'ijë̱'ë caquë de'o joyore i̱si nëosicohua'ije̱ yequë mu'se de'oyere pare paja̱'cohua'ita'a ai oijë pa'iyë.
Ja̱je pa'ina,
joyore papi ai oijë uteyë,
Maija'quë maire i̱ huero mamajëre neja'a macare cui'ne mai huaso cua̱ñoñere cajë.
24 Mai yequë mu'se pa'i ja̱'ñere jëa coeye peoyerepa ute do'ire huasosicohua'i pa'iyë,
mai.
Ja̱je pa'iquëta'are pa̱ipi i̱ uteyere ña huesoni yequë mu'se pa ja̱'ñere uteye peoji.
Ja̱je pa'ina,
tsoe i̱tire ña huesoni uteye peoji.
25 Ja̱je pa'iquëta'are mai yure ña ma'ñere ñañu'u cajë uteni dahuëre quëcojë uteye pa'iji.
26 Ja̱je cui'ne Maija'quë joyopi co̱caiji,
mai tutu peoyere.
Maija'quëre se̱ñe huesëyë,
mai.
Ja̱je pa'ina,
de'o joyopi ai oi Maija'quëre se̱cacaiji,
pa̱i yë'opi ca ti̱'añe peoyerepa.
27 Ja̱je se̱ina,
Maija'quë sa̱'nahuë joyorepa cuasaye ñaquëpi i̱ joyo cuasaquë se̱ñe asaji,
joyopi i̱ tse̱cohua'i pa'i ja̱'ñere caquë,
Maija'quë yëyeje̱ pa'ye se̱ina.
Si'aye Ne Ti̱'asicohua'i Pa'iye
28 Ja̱je pa'ina,
i̱ yëyere yo'oja̱'cohua'i a'ë caquë soisicohua'ire si'aye tëto saiyepi de'oye pa'i ja̱'ñere co̱caija̱'coa,
Maija'quë oicohua'ire asayë,
mai.
29 Ja̱je pa'ina,
Maija'quë maire tsoe du'ru ña nëopi i̱ mamaquëje̱ pa'iohua'i pa'ija̱'cohua'i a'ë caquë.
Ja̱je pa'ina,
i̱ mamaquë cato sehuosicohua'i maja'yë pa'ija̱'quë api.
30 Tsoe i̱ ja̱'në cuasa nëosicohua'ire Maija'quë soipi.
Soisicohua'ireje̱ nuñerepa pa'iohua'ire nepi.
Nuñerepa pa'iohua'ire nesicohua'ireje̱ i̱ de'oyerepa pa'iyere i̱sipi.
31 Ja̱je Maija'quëpi maire de'oyerepa necaisiquëre ¿nepi maire sa̱ñope yo'o ti̱'añe pa'iquë'ni?
Ti peoji,
sa̱ñope yo'o ti̱'aquë.
32 Maija'quë i̱ mamaquëre papi mai do'ire ju̱cacaija̱quë caquë ¿i̱sisiquë me i̱siye pa̱quë'ni,
i̱ mamaquë ja̱'re co'amaña pa ja̱'ñe?
Si'aye i̱sija̱'quë api.
¿Me pa̱quë'ni?
33 Ja̱je pa'ito Maija'quë soisicohua'ire ¿nepi co'acohua'i a'ë caye pa'iquë'ni?
Ja̱re coa Maija'quëse'e maire nuñerepa pa'icohua'ire nesiquë pa'iji.
34 Cristo ju̱'isiquëpi cui'naëpi huëisiquëpi Maija'quë ëja te̱'tere ñu'i maini caquë pëca ja'quëre se̱cacai pa'ito ¿i̱queipi maire nejoñe pa'iji ca huesoye pa'iquë'ni?
35 Ja̱je pa'ito ai yo'oyepi,
co'a ju̱'ijë oiyepi,
sa̱ñope yo'oyepi,
a̱iñe peoyepi,
ju'iye peoyepi,
ne ju̱'iñepi,
pa̱nita'a ju̱ni huesëyepi ¿Cristo maire oiyere nejocaiye pa'iquë?
¡Pa̱ni!
36 Toyase'e cato caji:
Më'ë do'ire si'a mu'seña ne ju̱'iñere pa'iyë.
Ja̱je pa'ina,
yëi ñamare huai hue̱'ñana sase'eje̱ pa'iohua'i pa'iyë.
37 Ja̱je si'aye iye yo'oye pa'iquëta'are maipi ñese quëcosicohua'irepa pa'iyë,
maire oisiquë do'ipi.
38 Ja̱je pa'ina,
Maija'quë maire oiyere nejocaiye ti peoji.
Nuñerepa asayë,
yë'ë.
Ja̱ do'ire ju̱'iñepi,
pa'iyepi,
hui̱ñaohua'ipi,
cua̱ñecohua'i tutupi,
cua̱ñe tutupi,
yure pa'iyepi,
jeteyo'je pa'i ja̱'ñepi,
39 Mëñe ayepi,
meñe ayepi,
Maija'quë de'huase'epi,
nejo ti̱'añe peoji,
Maija'quë maire oiyere mai Ëjaë Jesucristona ti̱'ase'ere.