Huejayeje̱ Pa'ye Quëase'e
7
Maija'quë do'ijë,
mësaru Maija'quë cua̱ñese'ere asacohua'ipi asayë,
mai huajëcohua'i pa'i macase'e cua̱ñeñepi sëasicohua'ije̱ pa'iohua'ire paye pa̱ire.
2 Ja̱je pa'ina,
nomio huejasico cato cua̱ñese'e do'ire i̱o ë̱jëre sëasicoje̱ pa'io pa'ico,
i̱pi ju̱'ima'quëpi pa'ina.
Ë̲jëpi ju̱'isiquë pa'itota'a,
cua̱ñese'epi sëase'eje̱ pa'ye peoji.
3 Ja̱je pa'iquëta'are i̱opi ja̱ yë'ta'a ë̱jë pa'ina,
yequë ë̱mëna tsioja̱isico pani ë̱mëre yo'oco.
Ja̱je pa'iquëta'are ë̱jëpi ju̱'isiquë pa'itota'a yequë ë̱mëre tsioja̱ni paye pa'iji,
ë̱më yo'oco peoco ja̱ maca.
4 Ja̱je cui'ne mësaruje̱ Maija'quë do'ijë,
Cristo ju̱'i do'ipi ju̱'isicohua'ije̱ pa'iohua'ipi pa'iyë,
cua̱ñese'epi naë pacona pa'isicohua'ipi,
cua̱ñese'ere ë̱jëje pa'ire pasicohua'ipi yure cato,
yequë ë̱mëni payeje̱ pa'iohua'i a'ë,
Cristo ju̱'isiquëpi huëisiquëre pani,
Maija'quë ña hue̱'ña de'oyere pare mai yo'ojë pa'ija̱'cohua'ipi.
5 Ja̱'në mai yëyere yo'ojë pa'icohua'i paë'ë.
Pa'ijë mai co'aye yëyere cua̱ñese'epi ne sëtouna,
ai jerepa mai yëyere yo'ohuë.
Ja̱ yo'oyepi ju̱'iñena sapi,
maire.
6 Cua̱ñese'epi sëasicohua'ije̱ pa'iohua'i paë'ë.
Yureta'a joyesicohua'ije̱ pa'iohua'i pa'iyë,
mai ju̱'isi do'ipi.
Ja̱je pa'ina,
cua̱ñese'epi jo'ya nesicohua'i peocohua'ipi Maija'quë joyo huajëye pa'iye i̱siyepi Maija'quëre necaiyë.
Necaima'pë pa'iyë,
cua̱ñese'e cayere.
Co'aye Yo'oyepi Pa'iye, Yë'ëna
7 Ja̱je pa'ito ¿me caja̱'cohua'i a'ni,
cua̱ñese'e co'aye a'ë caye?
¡Pa̱ni ja̱je caye!
Yë'ë quëaquëna,
asajë̱'ë,
yë'ë yo'ose'ere.
Cua̱ñese'epi yecohua'i co'amaña yëcaima'ë caye pa̱to yë'ë asaye pa̱ra'huë,
yecohua'i co'amaña yëcaiye co'ayere papi pa'iye.
Cua̱ñese'e ë̱se do'ipi co'aye yo'oye asahuë.
8 Yecohua'i co'amaña yëcaima'ë pa'ijë̱'ë cayeja̱'a co'ayepi yë'ëre jerepa co'ayere yëyena ne sëto.
Ja̱je cua̱ñese'epi caye pa̱to co'aye yo'oye ju̱'ise'eje̱ pa'ye a'ë,
i̱tise'e pani.
9 Te'erepa tsoe yë'ë cua̱ñese'e asama'quëpi coa paë'ë.
Pa'ina,
cua̱ñese'epi ti̱tani co'aye yo'oyere ne co'yao.
10 Ne co'yacona,
yë'ëpi ju̱ë'ë.
Ju̱'ina,
cua̱ñese'e pa'iye i̱sisi'i ca nëota'a yë'ëre ju̱'iñena sapi.
11 Cua̱ñese'epi yo'oma'ë cacona,
co'aye yo'oyepi jerepa co'ayere cosoco.
Co'ayepi yo'oma'ë cua̱ñese'e cayeja̱'a ju̱'iñere i̱sio.
12 Ja̱je pa'ina,
ja̱ cua̱ñese'e cato Maija'quë tse̱ a'ë,
nuñere pa'ë cui'ne maire co̱caiye a'ë,
si'aye Maija'quë cua̱ñese'e cato de'oyere pa'ë.
13 Ja̱ de'oyepi yë'ëre ju̱'iñena saye pa̱o.
Pa̱cona,
co'ayepi yë'ëre cato ju̱'iñena sao.
Sacona,
ja̱ do'ire asahuë,
co'aye pa'iye.
Cui'ne asahuë,
cua̱ñese'e ë̱seyeja̱'a co'ayepi ai co'ayerepa pa'iye.
14 Ja̱je pa'ina,
asayë,
mai.
Cua̱ñese'e cato joyo aye a'ë cajë.
Ja̱je pa'iquëta'are yë'ë cato pa̱i a'ë,
tara cui'ne ca̱ quë'i a'ë.
Ja̱je pa'ina,
co'ayepi jo'yaëre paji,
yë'ëre.
15 Ja̱je pa'ina,
asa ti̱'ama'ë pa'iyë,
yë'ë yo'oye.
Yë'ë yëyere yo'oma'ë ai jerepa yë'ë coeyere yo'oyë.
16 Ja̱je pa'ina,
yë'ë yo'oye coeyere yo'oni ja̱ maca cua̱ñese'e de'oyerepa pa'iye asayë.
17 Ja̱je pa'ina,
yë'ë pa'ima'ë pa'iyë,
i̱ti yo'oquë.
Yë'ëre sa̱'nahuë co'aye pa'iyepi yo'oji.
18 Ja̱je pa'ina,
yë'ë ca̱pë pa'ise'e yë'ë pa'iye ti de'oye peoji,
yë'ëre.
Ja̱je pa'ina,
de'oyere yo'osi'i cuasaquëta'a yo'o ti̱'ama'ë pa'iyë.
19 De'oye yë'ë yëyere nema'ë,
coa ai jerepa yë'ë coeyere nequë pa'iyë.
20 Ja̱je pa'ina,
yë'ë coeyere yo'oni yë'ë pa'ima'ë pa'iyë,
i̱ti yo'oquë.
Yë'ëre co'aye sa̱'nahuë pa'iyepi yo'oji.
21 Ja̱je pa'ina,
ñeje iye yë'ëre pa'iji,
de'oye yo'oye yëquëta'a de'hue co'ayese'ere yo'oyë.
22 Ja̱je pa'i sëte yë'ë cuasaye cato Maija'quë cua̱ñese'ere yëyë.
23 Yëquëta'are yë'ë ca̱pëpi sa̱ñope yë'ë cuasa hue̱'ñana yo'oco.
Ja̱ cato co'ayepi yë'ë ca̱përe pa'iyepi yo'oji.
Ja̱pi cose'eje̱ pa'ire paji,
yë'ëre.
24 ¡Co'aquëre pa'ë,
yë'ë!
¿Nepi yë'ëre ne huasoja̱'cohua'i a'ni,
iye ca̱pë ju̱'iñena saco aire?
25 Coa Maija'quëse'e ne huasoja̱'quë pa'iji,
Cristo Jesús mai Ëjaë do'ipi.
Ja̱re asaquë sihuayë.
Ja̱je pa'ito yë'ëpi Maija'quë cua̱ñese'ere sehuocaiye pa'iji,
yë'ë cuasayepi.
Ja̱je pa'iquëta'are yë'ë ca̱pëpi co'ayena cua̱ñe cua̱ñosiquëpi jo'yaëje̱ pa'i pa'iyë.