Cristore Sehuosicohua'i Pa'iye
6
¿Ja̱je pa'ito me caja̱'cohua'i a'ni?
ai jerepa co'ayere yo'oñu'u,
Maija'quë oiyere jerepa i̱ñoja'quë api caquë.
2 ¡Pa̱ni ja̱je caye!
Tsoe mai co'aye yo'oye je̱osicohua'i cato ju̱'isicohua'ije̱ pa'yepi pa'iyë.
¿Me ja̱je pa'ito ja̱ yë'ta'api co'aye yo'ojë pa'iye'ni?
3 Oco do maca Cristo Jesús ja̱'re tsioni pa'iyena cacajë i̱ ju̱'ise'eje̱ pa'ye ju̱ë'ë,
mai.
Mësaru ja̱re tsoe asayë.
4 Ja̱je mai oco do maca ju̱'isicohua'ire Cristo ja̱'re te'e ta̱ cua̱ñosicohua'ije̱ pa'iohua'i pa'iyë.
Ja̱ maca Cristore pëca ja'quë i̱ de'o tutupi yo'oquëna,
Jesús huëise'eje̱ pa'ye cui'ne maije huëiye pa'iji,
huajëye pa'iyena.
5 Ja̱je pa'ina,
Cristo ju̱'ise'eje̱ pa'yena tsiosicohua'i sëte,
cui'ne i̱ huëise'eje̱ pa'ye maipi huëiye pa'iji.
6 Co'ayere ëjaëje̱ pa'ire pajë necaiyere cui'ne mai pa̱ise'e yë tuture nejose'e pa'ija̱quë cajë Cristo ja̱'re que̱ cua̱ñosicohua'ipi pa'iyë asayë,
mai.
7 Ja̱je pa'ina,
ju̱'isiquë cato co'ayepi jo'ya nesiquë peoji.
8 Ja̱je pa'ina,
Cristo ja̱'re te'e ju̱'isicohua'i pani i̱ ja̱'re co̱ni pa'ija̱'cohua'i a'ë cuasayë.
9 Tsoe maipi asajë pa'iyë,
Cristo te'e ju̱ni huesësiquëpi ti̱jupë ju̱ni co̱ñe pa̱se'e.
Ju̱'iñe i̱te ti̱jupë quëcoye peoji.
10 Co'a tutupi naë payere ti nejoquë Cristo ju̱ji'i.
Ja̱je ju̱'isiquëta'a i̱ huajëquë pa'iyepi Maija'quëre pacacaiji.
11 Ja̱je cui'ne ju̱'isicohua'ije̱ pa'i pa'ijë̱'ë,
co'aye i̱tire yo'oma'pë cajë,
co'aye yo'oyepi pa'itoje̱.
Ja̱re cuasajë huajëcohua'irepa Maija'quëre pacacaijë̱'ë,
mai Ëjaë Cristo Jesús ja̱'re pa'icohua'ipi.
12 Ja̱je pa'icohua'i sëte mësaru co'ayepi cua̱ñe cua̱ñosiquëje̱ pa'i pa̱jë'ë,
ca̱pë yëyere yo'oma'pë cajë.
13 Yureta'a mësaru ca̱pë̱are i̱sima'pë pa'ijë̱'ë,
co'ayere yo'oja̱'co cajë.
Mësaru ca̱pë̱are ju̱'isicohua'i huëisicohua'ije̱ pa'icohua'ire Maija'quëna i̱sijë̱'ë,
de'o nuñerepa yo'oyere nejajë cajë.
14 Co'aye yo'oyepi yureta'a ëjaë cua̱ñeñeje pa'ye maire cua̱ñe cua̱ñoñe peoji,
Moisés cua̱ñeñepi maire meñe cua̱ñe cua̱ñoñe peo do'ire,
coa Maija'quë oiyepi meñe pa'i do'ire.
Jo'yaohua'i Pa'iye Ayere Quëaye
15 ¿Maija'quë oi ñacaiyere meñe pa'ijë cua̱ñese'e meñe peo do'ire co'ayere yo'ojë pa'iye pa'iquë?
Pa̱ni.
¿Me neni ja̱je yo'oye'ni?
16 Ja̱je pa'ina,
mësarupi tsoe ta̱'ñe asayë.
Jo'yaë cato ëjaëna i̱sisiquëpi i̱ cua̱ñeñere sehuocaija̱'quëpi pa'iji,
cajë.
Ja̱je pa'ina,
ëjaëre necaicohua'i cato sehuocaiye pa'iji,
i̱ohua'i ëjaëni.
Ja̱je pa'ye cui'ne co'aye yo'oyere sehuocaicohua'i cato co'ayere ëjaëre payë.
Ja̱re sehuocaiye cato ju̱'iñena saye a'ë.
Ja̱ yë'ta'a Maija'quëre sehuocaiye cato nuñerepa pa'iyena saye a'ë.
17 Ja̱'në co'ayepi jo'ya nesicohua'ipi paë'ë,
mësaru.
Pa'isicohua'ita'a Maija'quë ye'yayena i̱sisicohua'ipi si'a joyorepa ja̱ ye'yayere sehuohuë.
Ja̱je pa'i do'ire Maija'quëre sihuaquë de'oji cayë,
i̱te.
18 Yureta'a co'ayere ëjaëre peocohua'ipi Maija'quëre necaiyena,
jo'yaohua'i de'ohuë,
nuñe pa'iyere yo'oñu'u cajë.
19 Mësaru ta̱'ñe asa ja̱'ñere caquë coa pa̱i cayere papi cayë.
Ja̱'në mësaru co'ayena i̱sisicohua'ipi co'ayere necaijë paë'ë,
co'ayere yo'ojë,
co'ayere mësaru ca̱pëpi necaise'eje̱ pa'ye.
Yureta'a nuñe pa'iyena mësaru i̱siye pa'iji,
Maija'quë yëyere yo'ocohua'i pa'ija̱'cohua'ipi,
i̱na i̱sisicohua'ipi.
20 Mësaru co'ayepi cua̱ñesicohua'i pa'i maca,
nuñerepa pa'iyere necaijë pa'iye pa̱huë.
21 ¿I̱quere de'oye pa'iye i̱si o'ni,
ja̱ co'aye yo'oyepi,
yure mësaru huajëya'ye asa cua̱ñoñepi?
Ja̱ cato ju̱'iñena saye pa'iji.
22 Ja̱je pa'isicohua'ita'a yure,
de'oye pa'iyë.
Co'ayepi jo'ya nesicohua'ire paye pa̱quëna,
Maija'quëre necaiyena cacani pa'iyë.
Ja̱je pa'ina,
mësarute de'oyerepa pa'iye necaiji.
Iyeta'a Maija'quëna i̱sisicohua'ipi pa'ijë cui'ne tëjiyere papi ti pani huesëyere payere necaiji.
23 Co'aye yo'osi do'ire co'ayepi sa̱iñe cato ju̱'iñe a'ë.
Ja̱je pa'iquëta'are Maija'quëpi mai Ëjaë Jesucristo do'ipi maire coa i̱siye cato ti pani huesëye a'ë.