De'oye Pa'iye
5
Pa'ire paji cuasa do'ire Maija'quë maire nuñe pa'iohua'ire ca huesopi.
Ja̱je pa'ina,
Maija'quë ja̱'re co̱ni de'oye pa'iyerepa ti̱'ahuë,
asajë pa'iyë,
mai Ëjaë Jesucristo do'ire.
2 Cui'ne mai Ëjaë Jesucristo do'ipi de'hue ti̱'ahuë,
Maija'quë i̱ oi pa'i hue̱'ñarepa yure sihuajë pa'iye.
Maija'quë de'oyerepa pa̱i ñape pa'ija̱'cohua'i a'ë cuasajë ute jujama'pë pa'iyë.
3 Ja̱ yë'ta'a ai yo'oyeje̱ pa'iji.
Ja̱je ti̱'aruje̱ sihuayë,
ai yo'oyepi quëcojë dahuëre pa'iohua'ire de'oye.
4 Quëcojë dahuëre yo'oyepi mai ti̱'añe pa'iji,
neñasicohua'irepa pa'iyena.
Neñasicohua'irepa pa'iyepi jëa coeye peoyerepa utejë pa'iyena ti̱'añe pa'iji,
mai.
5 De'o joyo i̱ i̱siquë yo'oyeja̱'a Maija'quëpi mai joñoana i̱ oiyere i̱si ti̱më huesoji.
Ja̱je pa'ina,
mai jëa coeye peoyerepa utejë pa'iye coa teaye ute tayoye peoji.
6 Ja̱je pa'ina,
co'ye huasoye peoquëna,
ne ti̱'ama'cohua'i pa'i do'ire Cristo ju̱cacaji'i,
i̱ti macarepa ti̱'aëna,
co'acohua'ini caquë.
7 A̲'jiñe peoji,
yequëni ju̱cacaiye.
Nuñe pa'ire pani ju̱cacasi'i caquë yo'oquëje̱ peoji.
Coa te'i pati'ñe pa'i api,
ai de'oquërepa do'ire caquë ju̱cacaiquë.
8 Ja̱je pa'iquëta'are Maija'quë cato i̱ oiye i̱ñopi,
maire,
ja̱ yë'ta'api co'acohua'i pa'itoje̱ Cristo maire ju̱cacaiyepi.
9 Ja̱je pa'ina,
Cristo Jesús ju̱'isi do'ipi maire nuñerepa pa'icohua'ire ca huesopi.
Ja̱je pa'ina,
yure cato jerepa Jesús oi necai do'ire tëji mu'serepa Maija'quë pë̱i nejoquëna,
jëaja̱'cohua'i a'ë,
mai.
10 Mai i̱te sa̱ñope yo'ocohua'i pa'i macata'a Maija'quë maire i̱ mamaquë ju̱'i do'ipi i̱ ja̱'re de'oye pa'iye nepi.
Ja̱je nesiquëpi yure cato jerepa Cristo huajëquërepa pa'iyepi huasoja̱'quë api,
maire,
tsoe i̱pi de'oye pa'iye sëte.
11 Cui'ne ja̱se'e pa'iye pa̱ji.
Maija'quëre sihuayë,
Cristo Jesús do'ire i̱ni pacacaijë.
Ja̱je pa'ina,
Cristo do'ipi i̱ ja̱'re co̱ni de'oye pa'iye ti̱'ahuë.
Adán Cui'ne Cristo
12 Te'i ë̱mëpi co'aye yo'o huëopi.
Ja̱ yo'o do'ire ju̱ni huesëye huëopi.
Ja̱je pa'ina,
si'aohua'i ju̱ni huesëye pa'iji,
si'aohua'i co'aye yo'ocohua'i sëte.
13 Ja̱ yë'ta'a cua̱ñese'e peo'në co'aye yo'oyepi tsoe paji'i,
iye yejare.
Pa'ina,
cua̱ñese'e peoquëna,
co'aye yo'ocohua'ire sa̱ñope caye peopi.
14 Ja̱je pa'iquëta'are Adán pa'inëpi Moisés pa'inëna si'aohua'i ju̱ju huesëa̱huë'ë,
Adán Maija'quë cua̱ñese'ere sehuoma'ë yo'ose'eje̱ pa'ye yo'oma'cohua'ita'a co'aye yo'ocohua'ipi.
Adán cato Jesucristo daija̱'quëje̱ pa'i paji'i.
15 Ja̱je pa'iquëta'are Maija'quë i̱siyepi Adán co'aye yo'ose'e tëto saise'ere pa'ë.
Te'i Adán co'aye yo'osi do'ire jai pa̱i ju̱juhuë.
Ja̱je pa'ina,
Jesucristo do'ipi Maija'quë jai pa̱i de'oye pa'i ja̱'ñere,
huasoyere coa i̱siyepi jerepa pa'ye a'ë.
16 Adán co'aye yo'ose'epi maire necaiye peoji.
Maija'quë i̱sise'epi jaiye necaiye pa'iji.
Te'ipi te'ore co'aye yo'o do'ire maire nejoñe pa'iji.
Maija'quë i̱sise'e cato jaiye co'aye yo'osicohua'i pa'itoje̱ nuñerepa pa'iohua'ire necaiye a'ë.
17 Ju̱'iñe je̱'quë te'i ë̱më co'aye yo'osi do'ire tutu papi.
Ja̱je pa'ye jerepa tutu paja̱'cohua'i a'ë,
huajëyerepa pa'iyere Jesucristo te'i do'ire Diusupi nuñerepa pa'icohua'ire ca huesocohua'ipi.
18 Ja̱je pa'ina,
Adán i̱ co'aye yo'osi do'ipi si'a pa̱ire ne huesëja̱'cohua'ire nepi.
Cui'neje pa'ye yo'oquë Jesucristo nuñerepa yo'oyepi si'aohua'i de'oye ti ne huesëye peoye de'oye pa'i ja̱'ñe necaji'i.
19 Ñeje caquë cayë:
Te'i de'oye sehuocaima'ë pa'isi do'ipi,
si'aohua'i co'acohua'i paë'ë.
Ja̱je pa'iquëta'are,
te'i de'oye sehuocaiquë pa'isi do'ire jai pa̱i nuñe pa'iohua'irepa pa'iye ti̱'ahuë,
Jesucristo do'ipi.
20 Ja̱je pa'ina,
Maija'quëpi cua̱ñese'e i̱sipi,
co'ayepi ai jerepa pa'ija̱'quë caquë.
Ja̱je jaiye co'aye pa'itoje̱ Maija'quë oiyepi ai jerepa jaiye pa'iji.
21 Ja̱'në co'ayepi cato pa̱i ëjaërepaje̱ pa'ye paji'i,
pa̱ire cua̱ñequë ju̱ni huesëyena saquëpi.
Yure cato Maija'quë oiyepi nuñerepa yo'oyeja̱'a pa̱i ëjaërepaje̱ pa'ye de'opi,
Jesucristo yo'o do'ipi,
ti pani huesëyena saja̱'quë caquë.