Abraham Yo'ose'epi I̱ñoñe
4
¿I̱quere mai ai Abraham ti̱'aë'ni,
i̱ yo'o do'ipi?
I̱ ayere cañu'u,
yure.
2-3 Toyase'e caji:
“Diusupi Abrahamre nuñerepa pa'ire ca huesopi,
Abrahampi Diusuni i̱re papi caquë cuasa do'ire.”
I̱ yo'o do'ipi nuñerepa pa'i pa'iye Abraham ti̱'añe pa̱pi.
Ti̱'asiquë pani jerepa pa'i a'ë cara'pi.
Yure cato Maija'quë ña hue̱'ñana ja̱je ca ti̱'añe peoji.
4 Co'amaña necaiquëre sa̱iñe cato coa i̱sise'e peoji,
nesi do'ire sa̱iñe a'ë.
5 Ja̱je pa'iquëta'are co'amaña nesi do'ire peoquëpi Maija'quëni nuñerepa pa'i ca hueso cua̱ñoñe pa'iji.
Coa i̱te i̱re papi cuasa do'ire co'aquëre nuñerepa pa'iquë api,
ca huesoquëni cuasa do'ire.
Ja̱je yo'oye pa'iji.
6 Maija'quëpi yequëre ñani i̱ yo'ose'ere cuasama'ë nuñerepa pa'ire ca huesoquëpi ai sihuaji.
Davidje̱ cui'ne capi,
toyase'epi.
7 I̱ case'e cato caji ñeje:
Sihuacohua'i pa'iyë,
Maija'quëpi i̱ohua'i co'aye yo'ose'ere oni yejesicohua'ipi,
cui'ne i̱ohua'i co'aye yo'o do'ire coa sa̱i to̱sicohua'ipi.
8 Sihuaquë pa'iyë,
Ëjaëpi co'aye yo'ose'ere cama'ëna,
sa̱i to̱sicohua'ipi.
9 ¿Ja̱je pa'ito iye sihuaye ca̱'ni tëasicohua'ise'ere sihuaye pa'iquë?
Pa̱ni.
Ca̱'ni tëama'cohua'ije̱ ja̱ sihuaye payë.
Tsoe maipi asahuë.
Toyase'e cato caji,
Diusupi Abrahamre nuñerepa pa'ire ca huesopi,
Abrahampi Diusuni i̱re papi caquë cuasa do'ire.
10 Ja̱je pa'ito ¿i̱te je yëhua nuñe pa'iquë api,
Abrahamre caë'ni,
i̱ ca̱'ni tëasi jeteyo'je?
Pa̱ni ja̱ yë'ta'a tëama'në ja̱je ca nëopi.
11 Ca nëosiquëpi jeteyo'je,
ca̱'ni tëa cua̱ñopi,
Maija'quë cua̱ñequëna.
I̱ ca̱'ni tëase'epi i̱ñoñe a'ë,
Maija'quëpi tëama'quë pa'inë nuñerepa pa'iquë api,
ca huesose'ere.
Cui'ne Abraham cato tëama'cohua'ipi Maija'quëre necaiquëre pare cuasacohua'i pëca ja'quë api.
Ja̱je pa'ina,
Abraham cuasase'eje̱ cuasacohua'ire Maija'quëpi nuñerepa pa'iohua'ire ca huesoji.
12 Ca̱'ni tëama'quë pa'inë Abraham Maija'quëre necaiquëre pare cuasase'eje̱ pa'ye ca̱'ni tëasicohua'ipi cuasacohua'i pëca ja'quë api.
Maija'quë Ca Nëose'ere Ti̱'añere Quëaye
13 Maija'quë Abrahamre cui'ne i̱ tsëcapë acohua'ire iye yejare i̱sija̱'quë a'ë ca nëoni,
ca nëoma'ë paji'i,
Abrahampi cua̱ñese'ere yo'o ti̱'a do'ire.
Coa ai jerepa ca nëopi,
Abrahampi Maija'quëni necaiquëre papi cuasa do'ire.
Ja̱ do'ire Abrahamre nuñerepa pa'ire ñaquë Diusu i̱sisi ca nëopi.
14 Ja̱je pa'ina,
cua̱ñese'e caye yo'o ti̱'acohua'ipi Maija'quë ca nëose'ere ti̱'añe pa'ito,
Maija'quëre necaiquëre papi cuasayepi do'i peoye patira'pi,
cui'ne Maija'quë ca nëose'epi do'i peoye ne huesëra'pi.
15 Cua̱ñese'e cato ai yo'o ja̱'ñere i̱siji,
Maija'quë sa̱i de'huaquëna.
Cui'ne cua̱ñese'epi peoquëna,
¿Me sa̱ñope yo'oye pa'iquë'ni?
16 Maija'quë ca nëose'e cua̱ñese'ere pacohua'ise'e ti̱'añe peoji.
Cua̱ñese'e peocohua'ije̱ ti̱'añe pa'iji.
Ja̱je pa'ina,
Abraham tsëcapë acohua'ipi ti̱'añe pa'ija̱quë cani coa do'i peoye i̱ ca nëose'ere i̱siye pa'iji,
Abraham cuasase'eje̱ pa'ye cuasacohua'ini.
Ja̱je pa'ina,
Abraham mai pëca ja'quë api.
17 Toyase'epi caji:
“Jai pa̱i pëca ja'quëre yë'ëpi nehuë,
më'ëre.”
Ja̱je Diusu ca nëouña.
Abraham cato Maija'quëre ju̱'isicohua'ire pa'iye i̱siquë api asapi.
18 Cuasaquëpi ñani uteye peotoje̱ Abraham cato ca nëose'erepa pa'ija̱'coa cuasaquë utequë paji'i.
Ja̱je pa'ina,
jai pa̱i pëca ja'quë de'opi,
Abraham.
Maija'quë i̱te ca nëose'eje̱ pa'ye ti̱'api.
Ja̱ ca nëose'e cato caji:
“Jai pa̱i pa'ija̱'cohua'i a'ë,
më'ë tsëcapë.”
19 Ca nëose'ere asaquëpi cien o̱metëca paye ja'i maca pa'ina,
Zara i̱ paco i̱ co̱ni aiohua'i pa'inije Abraham tsi̱ paye peoji asaquëta'a necaiye pa'iji cuasase'e coa ne huesoma'ë paji'i.
20 Ja̱je pa'ina,
Maija'quë ca nëose'e jëa coeye pa̱pi.
Coa case'e a'ë cuasaye pa̱pi.
Coa ai jerepa pa'i ja̱'ñere pa'ë cuasapi.
Ja̱je cuasaquëpi ai jerepa cuasare paquë de'opi.
De'osiquëpi Maija'quëre de'oquëre pa'ni caquë sihuapi.
21 Maija'quë si'aye ne ti̱'añe tutu paquëpi i̱ ca nëose'ere neja'quëre papi cuasapi,
jëa coeye peoyerepa.
22 Ja̱je pa'ina,
Maija'quë nuñerepa nequë api cuasa do'ire nuñerepa pa'ire ca huesopi.
23 Abrahamre Maija'quë nuñe pa'ire ca huesopi cajë toyase'e Abrahamse'ere cajë toyaye pa̱huë,
maireje̱ cajë toyase'e a'ë.
24-25 Ja̱je pa'ina,
maire nuñerepa pa'iohua'ire nesi'i caquë mai do'ire ju̱cacani huëji'i,
Jesús.
Ja̱je pa'ina,
mai Ëjaë Jesure ju̱'isiquëpi huëisiquëni i̱re papi cajë cuasacohua'ire Diusupi nuñerepa pa'iohua'ire ca huesoji,
maipi i̱te necaire paquë api cuasa do'ire.