3
Ja̱je pa'ina,
¿i̱quere do'i paquë'ni,
judío pa̱i pa'iye cui'ne cuiri ca̱'ni tëasicohua'i pa'iye?
2 Ja̱ cato jaiye co̱caiye pa'iji,
du'rurepa Maija'quë judío pa̱ina i̱ coca de'hue pacaija̱'cohua'i a'ë caquë i̱sisi do'ire.
3 Ja̱je pa'iquëta'are ja̱ohua'i judío acohua'ipi nuñerepa yo'oyere yo'o jujani je̱otoje̱ Maija'quë cato i̱ ca nëose'ere ja̱re yo'o ti̱'aquë pa'iji.
4 Maija'quë cato i̱ coca nuñerepa cayeje̱ pa'ye yo'o ti̱'aquë api,
si'a pa̱i coa cosocohua'i pa'itoje̱.
I̱ cato cosoma'quë api.
Ja̱je pa'ina,
toyase'e caji:
Nuñerepa pa'iquëre i̱ñoñe pa'iji,
më'ë case'epi.
Cui'ne yecohua'ipi më'ëre ña tëjini ca hueso maca më'ëpi de'oquërepa etaja̱'quë a'ë.
5 Mai tayo yo'oyepi Maija'quë nuñe yo'oyere de'oyerepa i̱ñojë pa'ito Maija'quë mai tayo do'ire nejoquë pani Maija'quë nuñe yo'oma'quëpi nejoji.
¿Ja̱je caye pa'iquë?
Pa̱ni,
pa̱i caye ayepi caye a'ë.
6 Ja̱je caye peoji.
Maija'quëpi nuñe yo'oma'quë pani,
si'a pa̱i tayo yo'ose'e ña tëjini ¿me pa̱i yo'oyere ca huesoye pa'iquë'ni?
7 Ja̱je pa'iquëta'are yë'ë cosoyepi Maija'quë nuñerepa pa'iyere ai jerepa de'oye i̱ñocaiye pa'ito ¿me neni yë'ëre tayoquë api caye'ni?
8 Ja̱je pa'ito ¿me yo'oquë co'ayere yo'oma'quë'ni,
de'oyepi pa'ija̱'core?
Iye cato yecohua'ipi cayë,
maire.
Co'aye cuasajë sa̱ñope cacohua'ini co'aye yo'ojë de'oyere ti̱'añe pa'iji ye'yayë cayë,
maire.
Ja̱je cacohua'ire nuñerepa yo'oquë nejoñe pa'iji.
Si'aohua'i Do'i Quë'iohua'ipi Pa'iyë
9 ¿Ja̱je pa'ito mai judío pa̱ipi ja̱ohua'i se̱ña maca de'ocohua'ire pa'ë cuasajë pa'iye?
¡Pa̱ni!
De'ocohua'i peoyë.
Tsoe mai judío pa̱ipi de'ocohua'i pa'i ma'ñe i̱ñohuë.
Ja̱ohua'i ja̱'re si'a yë'quë maca co'ayepi pacona,
pa'iyë.
10 Ja̱je pa'ina,
toyase'e caji:
Te'i macaje̱ ti peoji,
de'oquë.
11 Asani pasi'i cacohua'ije̱ peoyë.
Peoyë,
Maija'quëre co'ecohua'ije̱.
12 Si'aohua'i tayo sani huesësicohua'i a'ë.
Si'aohua'i do'i peocohua'i a'ë,
ti co̱caima'cohua'ipi.
De'oye yo'ocohua'i,
te'i macaje̱ ti peoji,
de'oye yo'oquëje̱.
13 Ja̱je pa'ina,
si'aohua'i tërëhuë̱a cato pa̱ire ta̱sico de'hua si̱oma'coje̱ pa'io,
coa nejo cocare etaye.
Si'aohua'i tse̱meñoapi coa cosoyë.
A̲ña tsi̱maje pa'yepi si'aohua'i yë'opo̱a pa'iyë.
14 Yequëre ai yo'o hua̱no'i co'ayese'e yecohua'ire cayë,
cui'ne së̱jeñese'e.
15 Pa̱ire esa huani je̱oñese'e yëcohua'i a'ë.
16 Si'aohua'i co'aye yo'oyepi ai yo'oye cui'ne nejoñe i̱siyë.
17 Cui'ne ñama'pë pa'iyë,
de'oye pa'i ma'arepa.
18 Ja̱je pa'iohua'ipi ti ca'raye nëima'ëna,
Maija'quëre cuasama'pë pa'iyë,
a'ri mañaje.
19 Si'aye tsoe hue̱'ña Moisés cua̱ñese'e judío pa̱i cua̱ñese'e pacohua'ipi si'aye yo'oye pa'iji caji cajë asayë,
mai.
Ja̱je pa'iquëta'are i̱ohua'i tayo do'i ca de'huani jëaye peosipi.
Maija'quë pa̱i ñape yo'ose'e ñani ca hueso mu'se ti̱'asi maca si'aohua'i iye yeja acohua'i ca hueso cua̱ñoja'cohua'i a'ë.
20 Ja̱je pa'ina,
cua̱ñese'ere sehuojë yo'ocohua'i cato Maija'quë ja̱'re co̱ni pa'iye ti̱'añe pa̱ja'cohua'i a'ë.
Cua̱ñese'epi mai tayose'ere i̱ñoji.
Maija'quëre Cuasayepi Huaso Cua̱ñoñe Pa'iji
21 Yure cato Maija'quë nuñerepa pa'iohua'ire de'ocohua'ire pare neñere i̱ñopi,
cua̱ñese'e cayere yo'oma'ë,
ti̱rona se o̱ani.
Iye cato Maija'quëre quëacaicohua'i toyase'ere cui'ne Moisés cua̱ñese'e toyase'ere ñajë asayë,
i̱ ja̱je yo'oye.
22 Ja̱je pa'ina,
Maija'quë iquë jerepa pa'ire cuasama'quëpi i̱ nëñerepa pa'iyere i̱siquë api,
coa si'aohua'i Jesús i̱re papi cuasacohua'ire.
23 Ja̱je pa'ina,
si'aohua'i tayo yo'ocohua'ire sëte si'aohua'ire Maija'quë de'oyerepa ti̱'añe caraji.
24 Ja̱je pa'ijëta'are Maija'quëpi oi nuñerepa pa'iohua'ire nepi,
i̱ coa i̱siyepi,
Jesucristo do'ipi huasoquë.
25 Ja̱je pa'ina,
Maija'quëpi Cristo ju̱'ini tsie je̱osi do'ipi pa̱i co'aye yo'oye sa̱i de'huaye nepi.
Ja̱ sa̱i de'huayere ti̱'añe pa'iji,
Jesuni necaiquëre papi asa do'ipi.
Cui'ne tsoe acohua'i tayo yo'ose'ere coa sa tëto saima'ë paji'i,
Maija'quë.
Jesús tsiese'epi sa̱i de'huapi.
Ja̱je yo'oquë i̱ nuñerepa pa'iyere cui'ne i̱ quëcose'ere i̱ñopi.
26 I̱ñoni yureje̱ Diusu nuñerepa pa'i a'ë caquë i̱ñoquë yo'opi.
Yëquëje̱ cui'ne Jesús tsiese'epi Jesure i̱re papi cajë asacohua'ire nuñerepa pa'iohua'ire nequë a'ë caquë i̱ñoquë yo'opi,
Maija'quë.
27 ¿Yure jerore pa'ico'ni,
mai jerepa pa'iohua'i a'ë cuasaye?
Tsoe peoco.
¿Me yo'oco peoco'ni?
Maija'quëre necaiquëre pare cuasa do'ire peoco,
pa̱ni cua̱ñese'ere yo'o do'ire.
28 Maija'quëre necaiquëre pare cuasaquëni nuñerepa pa'i api ca huesoye pa'iji,
Maija'quëpi cua̱ñese'e yo'oma'quë pa'itoje̱.
Ja̱re tsoe asayë,
mai.
29 ¿Mësarupi cuasato Maija'quë judío pa̱i Diususe'e pa'iquë?
¡Pa̱ni!
Judío pa̱i peocohua'ije̱ Diusure payë,
i̱te.
30 Ja̱je pa'ina,
yequë Diusu peoji,
te'i api.
Ja̱re i̱pi pa̱ire nuñerepa pa'icohua'ire ca huesoye pa'iji,
ca̱'ni tëasicohua'ire cui'ne pa̱cohua'ireje̱,
coa si'aohua'i i̱te necaiquëre pare asacohua'ini.
31 Ja̱je pa'ito ¿coa mai i̱te necaiquëre pare asayepi ja̱'në cua̱ñese'e je̱ocoye pa'iquë,
co̱cai ma'ñe de'huani?
¡Pa̱ni,
ja̱je yo'oye!
Coa ai jerepa yureta'a cua̱ñese'ere de'oyere pa'ë cacaijë yo'oyë.