Maija'quë Nuñere Papi Ca Huesoye
2
Yequë yo'ose'ere ña tëjini co'aye yo'oquë api ca huesoquë pani ca de'huani jëa ti̱'añe peoji.
Më'ëpi yequë yo'ose'ere ña tëjini co'aye yo'oquë api ca huesoquë pani,
më'ëja'a co'ye ca huesoye pa'iji,
më'ëje cui'ne yo'o do'ire.
2 Ja̱je pa'ina,
asayë,
mai Diusupi pa̱i yo'oyere ña tëjini i̱ coca cayeje̱ pa'ye nuñerepa ca huesoja̱'quë api,
ja̱ co'ayere yo'osicohua'ire nejoñe pa'iji ca maca.
3 Ja̱je pa'ina,
më'ëpi cuasani Maija'quë pa̱i ñape yo'ose'e ña tëjini ca hueso mu'se ti̱'aëna,
yecohua'ire tayoyë,
cuasaquëpi cui'ne më'ëpi i̱ohua'i yo'oyeje̱ yo'oquë pani ¿jëaja̱'quë a'ë,
cuasaquë?
Jëaye peoji.
4 ¿Më'ëre po̱nañere caquë Diusu dahuëre quëcoquë yo'oquëna,
i̱ oi yo'oyere asama'ë huesëquë coeyë,
më'ë?
5 Ja̱je pa'iquëta'are më'ë joyo jëa do'ire më'ë pa'iye po̱nëma'ë coequë paë'ë,
më'ë.
Ja̱je yo'oquë ai jerepa më'ë nejo cua̱ño ja̱'ñere tsi'so ti̱mëñë,
më'ë Maija'quë pa̱i ñape yo'ose'e ña tëjini ca hueso mu'se ti̱'aëna,
sa̱i ja̱'ñere më'ë yo'ose'eje̱ pa'ye.
6 Ja̱ maca i̱pi pa̱i ñape yo'ose'eje̱ pa'ye sa̱ija'quë api.
7 De'oye yo'oyere yo'o jujama'cohua'ipi ëja deoyere cui'ne i̱ de'oye pa'iyere cui'ne ju̱'i ma'ñere co'esicohua'ini Maija'quëpi ti pani huesëyere i̱sija̱'quë api.
8 I̱siquëta'a yecohua'ipi i̱ohua'ise'e cuasajë nuiñere sehuoma'pë coa co'ayere tuiyë.
Ja̱ohua'ire cato Maija'quëpi pë̱i nejoja'quë api.
9 Si'aye co'aye yo'ocohua'ire ai yo'oye cui'ne oiye pasipi,
du'ru macarepa judío pa̱ipi jeteyo'je judío pa̱i peocohua'ije̱.
10 Ja̱je pa'iquëta'are Maija'quëpi de'oye yo'osicohua'ire cato sihuaye,
cui'ne ëja deoyere cui'ne de'oye pa'iyere i̱sija̱'quë api.
Du'ru macarepa judío pa̱ini jeteyo'je judío pa̱i peocohua'ireje̱ i̱sija̱'quë api.
11 Ja̱je pa'ina,
Maija'quë cato icohua'i yecohua'i a'ë caquë yo'oma'quë api,
si'a yë'quë maca ñaquë api,
si'a pa̱ire.
12 Ja̱je pa'ina,
Moisés cua̱ñese'ere asama'cohua'ipi co'aye yo'ocohua'i pa'itoje̱ ja̱ yë'ta'a nejoja'cohua'i a'ë,
Moisés cua̱ñese'e asama'cohua'ire.
Cui'ne Moisés cua̱ñese'e asasicohua'ita'a co'aye yo'osicohua'ire nejoñe pa'iji,
Moisés cua̱ñese'e ca do'ire.
13 Cua̱ñese'ere coa asacohua'i cato,
nuñerepa pa'icohua'i peoyë.
Cua̱ñese'ere yo'ocohua'i cato nuñerepa pa'icohua'i a'ë ca huesoye pa'iji.
14 Judío pa̱i peocohua'i cato toya cua̱ñese'eje̱ ti peoyë.
Ja̱je pa'iohua'ita'a cua̱ñese'e pacohua'ipi yo'oyeje̱ pa'ye yo'ojë pa'iyë,
i̱ohua'i cuasase'epi.
Ja̱je yo'ojë i̱ohua'ipi i̱ohua'ire cua̱ñeñe neñë.
15 Ja̱je pa'ina,
i̱ohua'i yo'oyepi i̱ñoñë,
i̱ohua'i joñoare cua̱ñese'e pa'iye paye.
Ja̱je pa'ina,
i̱ohua'i joñoa cuasayepi caja̱'coa,
de'oji më'ë yo'ose'e pa̱nita'a co'aji,
më'ë yo'ose'e.
Ja̱je cani i̱ñoji,
cua̱ñese'epi joñoare pa'iye.
16 Cui'neje i̱ohua'ire caja̱'quë api,
Maija'quë ca hueso mu'se pa'ina.
Ja̱ mu'se cato Maija'quëpi Jesucristo ja̱'re si'a pa̱i yahue yo'ose'e ña tëjini ca huesoye pa'iji,
yë'ë de'o cocarepa quëase'eje̱ pa'ye.
Judío Pa̱i Cui'ne Moisés Cua̱ñese'e
17 Më'ëpi judío pa̱i pa'ima'quëje̱ ñani caquë jerepa pa'i a'ë cuasaquëpi,
Moisés cua̱ñese'ere asaquëpi,
Maija'quëre pare payë caquë sihuaquëpi,
18 Maija'quë yëye ta̱'ñe asaquëpi,
cui'ne cua̱ñese'epi de'oyerepa ti̱'añere ye'yesiquëpi,
19 yecohua'i ñaco ca̱ peocohua'ije̱ pa'iohua'i pa'icohua'ire ye'yaquëre pa'ë cuasaquëpi,
cui'ne nea hue̱'ñaje pa'i hue̱'ñare pa'icohua'ire de'oyepi miacaiyeje̱ pa'ye yo'o i̱ñoquëre pa'ë cuasaquëpi,
20 cua̱ñese'e pacohua'ipi,
ta̱'ñe asaye cui'ne nuñerepa yo'oyere ye'yaye payë cuasaquë huesëcohua'ire ye'yaquë pa'iquëpi cui'ne tsi̱je pa'iohua'ire quëa ti̱'añë cuasaquëpi.
21 Ja̱je pa'iquëpi ye'yaquë a'ë cuasaquë pani ¿me yo'oquë më'ëja'a co'ye ye'yama'quë'ni?
Ja̱re më'ëpi co'amaña yahue i̱ ma'ñe a'ë quëaquëta'a ¿cui'ne me nesi'quë më'ëpi co'amaña yahue i̱maquë'ni?
22 Yequë nomiore yo'oma'ë caquëta'a,
¿me yo'oquë më'ëpi ja̱je yo'oquë'ni?
Cui'ne më'ëpi coa de'huasicohua'ire ñani coequëta'a ¿me nesi'quë i̱ohua'i se̱ hue̱'ña pa'i co'amaña yahue i̱maquë'ni?
23 Maija'quë cua̱ñese'ere pare pacohua'ipi pa'iyë caquëta'a,
mësarupi cua̱ñese'ere de'oye sehuocaima' do'ire yecohua'ipi Maija'quë co'aquë api cayë.
24 Ja̱je yo'oye pa'ina,
ñare paquë toyase'e caji:
“Judío pa̱i peocohua'i co'aye cayë,
Maija'quëre,
mësaru co'aye yo'o do'ire.”
25 Ja̱je pa'ina,
më'ëpi cuiri ca̱'ni tëasiquëpi Moisés cua̱ñese'ere si'aye sehuocaito co̱caiji,
më'ë yo'ose'e.
Ja̱je pa'iquëta'are më'ëpi cua̱ñese'ere sehuocaima'quë pani ca̱'ni tëama'quëje̱ pa'i pa'iye pa'iji.
26 Ja̱je pa'ina,
tëama'quëta'a si'aye cua̱ñese'ere yo'oni ca̱'ni tëase'eje̱ pa'i pa'iye pa'iji.
27 Ja̱je pa'ina,
i̱ ca̱'nihuë tëama'quëta'a,
cua̱ñese'ere si'aye sehuoquëna,
ja̱ yo'oyepi më'ëni co'aye yo'oquëre i̱ñoja'quë api,
toyase'e paquëta'a cui'ne ca̱'ni tëasiquëta'a sehuoma'ë pa'isiquëre.
28 Judíorepa pasi'i caquë coa ë̱mëje'ese'epi yo'ojë ti̱'añe peoji.
Cui'ne nuñerepa cuiri ca̱'ni tëaye cato ë̱mëje'epi yo'oye peoji.
29 Ja̱je pa'ina,
judíorepa cato pa'iye pa'iji nuñerepa sa̱'nahuëre papi.
Cui'ne cuiri ca̱'ni tëase'epi sa̱'nahuë joyore pana tëasiquëje̱ pa'i pa'iye pa'iji.
Coa cua̱ñese'epi ti̱'añe peoji.
Maija'quë joyo neñe a'ë,
iye cato.
Ja̱je pa'ina,
iye cayeje̱ ne cua̱ñosiquë cato Maija'quëre papi de'oquë api caquë ña nëosiquë api,
pa̱ni pa̱i mañapi.