“¿Mësaru sehuo maca de'o joyo tsio daquë?”

Caquëna,

i̱ohua'ipi cahuë:

“Pa̱ni,

de'o joyo pa'iye ayeque caye yëquë ti asama'cohua'i a'ë.”

3 Cajëna,

Pablopi capi:

“¿I̱quere asajë do cua̱ñore'ni?”

Caquëna,

i̱ohua'ipi cahuë:

“Juan oco doquë quëase'ere asani sehuojë do cua̱ñosicohua'i a'ë.”

4 Cajëna,

Pablopi capi:

“De'oji,

Juan cato co'aye yo'ose'ere je̱oni Maija'quëna po̱nëcohua'ini oco dopi,

doquë capi:

‘I̱ jeteyo'je daiquëni sehuoye pa'iji.’

Ja̱ëre cato Jesuni.”

5 Ja̱je caquëna,

asani Jesuni i̱re papi cuasani sehuorena,

Ëjaë Jesús mamipi cani dopi,

i̱ohua'ire.

6 Dosicohua'ini Pablopi jë̱ñapi patoquëna,

de'o joyopi i̱ohua'ina tsio daji'i.

Tsio daina,

yequë cocapi cajë yo'ohuë.

Yo'ojë Maija'quë cayere asajë yecohua'ina se quëahuë.

7 I̱ti ja̱je yo'osicohua'i cato doce ë̱mëohua'i paë'ë.

8 Pablopi pa̱ire Maija'quë cua̱ñe te̱'te ayere quëare pasi'i caquë ti ca'rama'ë toaso̱ ñañëohua'ire Israel pa̱i tsi'si huë'ena sai capi.

9 Caquëna,

yecohua'ipi sehuocaiye pa̱jë,

si'aohua'i ña hue̱'ñana huajë ma'a Pablo ye'yaye co'aye a'ë cahuë.

Cajëna,

Pablopi ja̱ohua'ire je̱oni sehuosicohua'ise'ere huani sapi,

Tiranno coca ca huë'ena.

10 Ja̱rona sani si'a mu'señapi coca caquë ja̱jese'e caya o̱metëcahuë̱a yo'opi.

Yo'oquë pa'ina,

Asia provincia yeja pa'icohua'ipi Israel pa̱ipi cui'ne Israel pa̱i peocohua'ipi Ëjaë coca asahuë.

11 Ja̱je yo'oquëna,

Maija'quëpi Pablo ja̱'re pa'i jaiye pa̱i yo'o ti̱'a ma'ñe yo'opi.

12 Yo'oquëna,

Pablo ju'i ca̱ñapi cui'ne a'ri të̱no ca̱'ti pë̱a i̱ papise'epi ju̱'icohua'ina sani nejëna,

ju̱'icohua'ipi co'yahuë.

Cui'ne huati quë'iohua'ije̱ huatire eto sao cua̱ñohuë.

Ja̱ jerepa yo'opi.

13 Ja̱je yo'oquëna,

ñani cui'ne Israel pa̱ije paë'ë,

ma'aja'a cu'ijë huati joñoapi pa̱ire pa'iye eto saohua'ije̱,

coa yo'ocohua'i.

Ja̱ohua'ipi cuasahuë,

Jesús mamipi cajë huatire eto saoye pa'iji.

Cuasani huati joñoare cahuë:

“Pablo quëaquë Jesús mamipi cua̱ñeñë,

etajë̱'ë.”

14 Iye yo'oye cato Maija'quë huë'e ñacaicohua'i ëjaërepa Israel pa̱i Esceva siete mamajëpi yo'ohuë.

15 Ja̱je yo'ocohua'ini yequë mu'se huati joyopi i̱ohua'ire sa̱ñope sehuoquë capi:

“Jesure asayë,

cui'ne Pabloreje̱ asayë.

¿Mësaruta'a ne a'ni?”

16 Caquë ja̱re i̱ti macapi huati quë'ipi ja̱ohua'ire tuturepa yo'oquë tse̱ani a'si neina,

a'si quë'iohua'ipi ca̱ña peoñoa huë'epi etani cati saë'ë.

17 Iye yo'ose'ere si'aohua'i Efeso pa'icohua'i griego pa̱i cui'ne Israel pa̱i asani ca'rahuë.

Ja̱je yo'ojëna,

Jesús mami jerepa ai de'oye a'ë,

si'a hue̱'ña pa'icohua'i cahuë.

18 Ja̱je cui'ne jai pa̱i sehuosicohua'ipi i̱ohua'i co'aye yo'ose'ere jai pa̱i ña hue̱'ñana oijë quëahuë.

19 Quëajëna,

cui'ne jai pa̱i ja̱'në dahuëohua'i pa'isicohua'ipi i̱o dahuë toyapëre pa̱i ña hue̱'ñana dani ëohuë.

Ja̱ toyapë do'ire cue̱cue ñañe cato cincuenta mil curiquë të̱'ñarepa do'i paji'i.

20 Ja̱je yo'oco mai Ëjaë coca jerepa jai saco'ë,

si'a hue̱'ña i̱o tuture pa̱ire i̱ñoco.

21 Ja̱ jeteyo'je Pablo Macedoniana cui'ne Acayana do'i sani cui'ne ja̱ropi Jerusalénje̱ do'i sasi'i cuasapi.

Cuasaquë yequeje̱ capi,

ja̱ro Jerusalén saisi jeteyo'je Romaje̱ saija̱'quë a'ë.

22 Ja̱je caquë Timoteore cui'ne Erastore i̱ti co̱caicohua'ire cayaohua'ire Macedoniana jëjo saopi,

i̱se'e ja̱ yë'ta'a Asia yejana a'ri maña pëaquë.

23 Ja̱ mu'seña Efeso daripë pa'icohua'ipi ai jo̱sa yo'ojë cahuë,

huajë ma'a ayere.

24 Demetrio po curiquë de'huaquëpi ca huëouna.

Ja̱ëpi diusa Diana huë'eje̱ pa'ye a'ri huë̱'ña maña nequë paji'i.

Ja̱je nequëpi i̱te co̱caicohua'ire jaiye curiquë i̱siquë paji'i.

25 Ja̱ëpi i̱te co̱caicohua'ire cui'ne i̱ neñeje pa'ye necohua'ire tsi'sopi.

Tsi'soni capi:

“Ëjaohua'i mësarupi asayë,

iye a'ri huë̱'ña de'hua do'i mai de'oye pa'iye.

26 Ja̱je pa'iquëta'are ja̱ë Pablopi mësarupi asajë cui'ne ñajëna,

caji,

pa̱i de'huase'e diusu peoye a'ë.

Ja̱je caquë jai pa̱ire ye'ya huesoji,

i̱ cayena.

I̱ño Efeso pa̱ire cui'ne si'a Asia provincia pa'icohua'ire ja̱je ye'yaji.

27 Iye i̱ ja̱je ye'yaye ai co'aji,

mai co'amaña peo hue̱'ña ne huesëye pa'iji,

cui'ne diusa Dianaje̱ i̱o yure do'i quë'io pa'iye peo hue̱'ña to̱meñe pa'iji.

Ja̱je to̱meni iye diusa co'a coa cue'cue cua̱ñoja'coa.

Yure iye provincia Asia pa'icohua'i tse̱copi cui'ne iye yeja si'a yeja pa'icohua'i tse̱copi caraja̱sio.”

28 Caquëna,

asani pë̱titeni tutu cuijë cahuë:

“Pa'ijë̱'ë,

Diana Efesios pa̱i ja'corepa.”

29 Ja̱je yo'ojë cajëna,

si'a i̱ti daripë acohua'i coa huesë asahuë,

i̱ohua'i yo'ojë caye.

Ja̱je yo'ojë cajë Pablore co̱cohua'ire cayaohua'ire Macedonia acohua'ire Aristarcore cui'ne Gayore tse̱ani quërëjë sahuë,

pa̱i tsi'sijë ña hue̱'ña quë'rore pana.

30 Ja̱je yo'ojëna,

Pablopi pa̱ire casi'i caquë yo'oquëna,

sehuosicohua'i i̱te ë̱sehuë.

31 Cui'ne ja̱ro ëjaohua'i pa'i hue̱'ñare yecohua'i ëjaohua'ipi Pablore ñacohua'ique paë'ë,

pa'ijë ja̱ohua'ije̱ ai ë̱sehuë,

co̱ni yo'oquë cama'ë cajë.

Ja̱je pa'ina,

i̱te quëaja̱'cohua'ire jëjo saohuë.

Pablo quë'rona.

32 Ja̱je yo'o maca,

cato i̱ti tsi'sisicohua'i cato de'huarepa yo'ojë cahuë,

yecohua'i ti̱ñe cuijëna,

cui'ne yecohua'i ai yeque cajëna,

yo'ohuë.

Ja̱je yo'ohuë,

pa̱i.

Coa ca huëosi do'ire huesërepa tsi'sini,

jai pa̱i yecohua'i i̱ti cajë tsi'sise'eque huesëhuë.

33 Ja̱je jai pa̱i huesëjëna,

Alejandroje̱ huesëquëna,

yecohua'ipi quëahuë,

i̱ti cajë tsi'sise'e.

Ja̱ëni judío pa̱ipi coca cajë̱'ë cajë jëjo eto nëcohuë,

pa̱i ña hue̱'ñana.

Ja̱ maca Alejandropi pa̱ire coca casi'i judío pa̱i ayere caquë jë̱ñapi yo'opi.

Yo'oquëna,

34 i̱je judío pa̱ipi casi'i caquë yo'oji asani ai tutu cuihuë,

caya horas:

“Pa'ijë̱'ë,

Diana Efesios pa̱i ja'co.”

35 Cuijë pejë je̱orena,

i̱ti daripë pa'iye toyaquëpi capi,

pa̱ire:

“Efesios pa̱i asajë̱'ë,

si'a pa̱i iye yeja acohua'i asayë,

iye daripë pa'icohua'i si'aohua'i Dianate ne huesoma'pë paye pa'iji case'e.

Cui'ne ma'tëmopi to̱mesi quë̱naoreje̱ ñacaiye pa'iji,

asayë.

36 Ja̱je pa'iye sëte co'arepa huëojë co'aye yo'oma'pë pa'ijë̱'ë.

Du'ru macarepa ai cuasajë̱'ë,

je huesëjëna,

airepa yo'ojë caye'ni.

37 Iconi mësaru tse̱ani dasicohua'i co'aye caye pa̱huë,

mai ja'core pare.

38 Ja̱je pa'ina,

Demetriopi cui'ne i̱ ja̱'re yo'ojë cacohua'ipi yecohua'ire sa̱ñope cayere pani pa̱i yo'ose'e asani ca de'huacohua'ina quëajë̱'ë.

Ja̱ohua'i pa'iyë,

mësaru yëye ëjaohua'ina cajë̱'ë.

Ja̱ maca pa̱i ñape mësaru pa'iye quëa de'huajë ne de'huajë̱'ë.

39 Mësarupi yequë co'amañare se̱ñe pacohua'i pani jai pa̱i de'oyerepa tsi'si sitona coca caye pa'iji.

40 Yure iye yo'ose'e co'aji.

Ëjaohua'ipi asani maire caye pa'iji coa jo̱sa yo'ojë cacohua'ire.

I̱quere yo'ojë care'ni,

cajë se̱to quëaye peoji.

¿Jere quëaye'ni,

i̱ti cajë yo'ose'e peoto?”

41 Ja̱je se ca tëjini je̱opi,

i̱ti yo'oye.