Pablo Corinto Daripëre Pa'ise'e
18
Ja̱je yo'o tëjini Atenaspi etani Corinto daripëna saji'i,
Pablo.
2 Ja̱rona te'ire Israel pa̱ire Aquilare ti̱'api.
Ja̱ë cato Ponto yeja aquë paji'i.
Ja̱je pa'ipi Pablo ja̱ yë'ta'a ti̱'ama'në Aquila cui'ne i̱ paco Priscilapi co̱ni Pontona ti̱'asicohua'ipi paë'ë.
Ja̱ohua'i cato Italiapi etani daisicohua'i paë'ë.
Claudio romano pa̱i ëjaëpi si'a Israel pa̱i Roma pa'icohua'i etaye pa'iji caquë cua̱ñequëna,
etasicohua'i paë'ë.
Ja̱je pa'iohua'ini Pablo do'i ñasi'i caquë saji'i.
3 Sani i̱ohua'i ja̱'re co̱ni pëapi.
I̱ohua'i neñeje pa'ye ca̱'nipi huë̱'ña nequë sëte i̱ohua'i ja̱'re co̱ni nesi'i caquë pëapi.
4 Pëasiquëpi pa'i si'a huajë mu'seña Israel pa̱i tsi'si huë'ena sai quëapi,
Israel pa̱ire cui'ne yequë pa̱ire asare paja̱jë caquë.
5 Macedonia pa'icohua'ipi Silas cui'ne Timoteo co̱ni ti̱'asi maca Pablopi si'a mu'seña Maija'quë coca quëa huëoni quëaquë judío pa̱ire capi.
Jesús paji'i,
maire huasoquërepa.
6 Ja̱je caquëna,
ja̱ohua'ipi i̱te sa̱ñope cajë pë̱'ë.
Pë̱ijëna,
Pablo ña jujani i̱ohua'ire sa̱ñope cayere i̱ñosi'i caquë i̱ ju'i ca̱re ta̱'të to̱pi.
Ta̱'të to̱ni capi,
i̱ohua'ire:
“Mësaru do'i pasipi mësaru ne huesëye,
yë'ë do'i peosipi.
Ja̱je pa'ina,
yurepi jerepa cato judío pa̱i peocohua'ina sani Maija'quë coca quëaja̱'quë a'ë.”
7 Cani tsi'si hue̱'ñapi etani Justo huë'ena saji'i,
Maija'quëre se̱quë huë'ena,
Israel pa̱i tsi'si huë'e quë̱no maca pa'i huë'ena.
8 Ja̱je pa'iquëta'are Israel pa̱i tsi'si huë'e ñacohua'i ëjaërepa Crispo hue'equëpi Maija'quë coca asani sehuopi.
Sehuoquëna,
cui'ne si'aohua'i i̱ tsëcapë acohua'ije̱ sehuohuë.
Sehuojëna,
cui'ne Corinto daripë acohua'ije̱ jai pa̱i sehuohuë.
Sehuorena,
oco dopi,
sehuosicohua'ire.
9 Ja̱je yo'oquë pa'ina,
te'e ñami Ëjaëpi ca̱ni ñañeje pa'yeja̱'a ñaini capi,
Pablore:
“Ca'rama'ë pa'ijë̱'ë,
coca quëaye,
je̱oma'ë cajë̱'ë.
10 Yë'ë coca sehuoja̱'cohua'ire iye daripë acohua'ire jai pa̱ire payë.
Yë'ëpi më'ë ja̱'re co̱ni pa'iyë.
Pa'ina,
më'ëre pa̱ipi co'aye yo'o ti̱'añe pa̱ja'cohua'i a'ë.”
11 Caëna,
asani Pablopi Corintona te'e o̱metëcahuë jopore paja̱'a pëani pa'i Maija'quë cocare ye'yapi,
i̱ohua'ire.
12 Ja̱je yo'oquë pa'ina,
Acaya pa̱i ëjaë Galión pa'i maca judío pa̱ipi Pablore sa̱ñope yo'oñu'u cajë tsi'sihuë.
Tsi'sini tse̱ani sahuë,
pa̱i yo'oye ca de'hua hue̱'ñana.
13 Sani i̱ohua'i ëjaëre cahuë:
“Iquëpi cua̱ñese'e cayeje̱ pa'ye yo'oma'pë,
ti̱ñe Maija'quëre se̱ñe pa'iji caquë pa̱ire ye'yaquë api.”
14 Cajëna,
asani Pablopi casi'i cuasaquëna,
Galiónpi du'ruja̱'a capi,
Israel pa̱ire:
“Co'aye yo'ose'ere pa̱nita'a pa̱ire huani je̱ose'ere yo'ojë catota'a mësaru Israel pa̱ire asa catira'huë.
15 Ja̱je pa'iquëta'are yure cato coa coca yë'ose'e case'ere,
mami ayere,
cui'ne mësaru cua̱ñeñe ayere yo'ojë cayë.
Ja̱je pa'iye sëte mësaruse'e ne de'huajë̱'ë.
Mësaru yo'ojë cayere cui'na maca yo'oquë caye coeyë.”
16 Ja̱je cani pa̱i yo'ose'e ca de'hua hue̱'ñapi eto saopi,
i̱ohua'ire.
17 Eto sauna,
pa̱i yo'ose'e ca de'hua hue̱'ña ti̱ña macare pana Sóstenesre tse̱ani të'cahuë.
Ja̱ë cato Israel pa̱i tsi'si huë'e ñacai ëjaë paji'i.
Ja̱je yo'otoje̱ Galión cato co'a ju̱'i ñañe pa̱pi,
i̱ohua'i yo'oye.
Pablopi Ti̱jupë Antioquíana Saiye
18 Ja̱ yë'ta'a Pablo Corinto daripëna pëasiquëpi tsoe mu'seña paji'i.
Pa'iquëpi sai huëoni sehuosicohua'ire saiyë,
caquë pëpa tëjini sai Priscila cui'ne Aquila ja̱'re co̱ni saji'i.
Siria yejana yohuëja̱'a ja̱ yë'ta'a yohuë aya mëima'në Cencreana naña peo ca'topë hueopi,
i̱ nesi'i ca nëose'ere yo'o ti̱'asi'i caquë.
19 Ja̱je yo'osi jeteyo'je Efesona ti̱'ahuë.
Ti̱'ani Pablopi Priscilare cui'ne Aquilare je̱oni Israel pa̱i tsi'si huë'ena saji'i.
Sani Israel pa̱i tsi'sicohua'i ja̱'re coca capi.
20 Caquëna,
asani i̱ohua'ipi i̱te pëajë̱'ë cajë se̱i'ë.
Se̱jëna,
pa̱ñë,
pëaye cani.
21 Pëpani sai capi:
“Maija'quëpi yëna cui'naëpi yeque co'ini ñasi'i.”
Cani ja̱ jeteyo'je yohuëna aya mëni Efesopi yequë hue̱'ñana saji'i.
22 Ja̱ maca Cesareana ti̱'ani sehuosicohua'ire pëpasi'i caquë Jerusalénna saji'i.
Sani ja̱ropi yureta'a Antioquíana saji'i.
23 Sani ja̱rona tsoe maca pani yureta'a cui'naëpi cu'i huëo co̱pi,
pa̱i ñape darina,
Galacia cui'ne Frigia yeja daripë̱ana,
sehuosicohua'ire tutu quë'iohua'ire quëa huasoquë.
Apolos Efeso Pa̱ire Yëhuoye
24 Ja̱ mu'seña te'i Israel pa̱i aquëpi Apolos hue'equëpi Efesona ti̱tapi,
Alejandría daripë aquëpi.
Ja̱ë cato ai ta̱'ñe coca caquë cui'ne Maija'quë toyapë ai de'oyerepa asaquë paji'i.
25 Ja̱je pa'ipi mai Ëjaërepa coca pa'iyena ye'yesiquë paji'i.
Ja̱je pa'ipi tuturepa caquë Jesús ayere ti̱ñarepa ye'yapi,
coa Juan oco doyese'e asaquëta'a.
26 Ja̱je pa'ipi Apolos Israel pa̱i tsi'si huë'ena jai pa̱i asajëna,
caquëna,
Priscila cui'ne Aquilapi asani i̱te te'ire ti̱rona sani quëahuë,
ai ti̱ñarepa Maija'quë coca ayere.
27 Quëasiquëpi Apolos Acayana sasi'i caquë yo'oquëna,
sehuosicohua'ipi i̱ sai ja̱'ñe co̱caë'ë.
Co̱caijë cui'ne te'e carta toyahuë,
Acaya sehuosicohua'i pa'icohua'ina de'oye i̱te pëpacaijë̱'ë cajë.
Ja̱je yo'orena,
Acaya ti̱'ani Maija'quë oi do'ipi sehuosicohua'ire ai de'oyerepa co̱caji'i.
28 Co̱cai si'aohua'i ña hue̱'ñana Israel pa̱ire toyapëna ñaquë Jesús i̱repa maire huasoquë paji'i caquë sa̱ñope capi.
I̱ohua'ije̱ më'ë coa cayë caye peoyere papi,
capi.