Tesalónica Daripë Acohua'i Sa̱ñope Yo'ose'e
17
Pablo cui'ne Silas saicohua'ipi Anfípolis cui'ne Apolonia dari sa sani Tesalónica daripëna ti̱'ahuë.
Ti̱'arena,
ja̱rote Israel pa̱i tsi'si huë'e paji'i.
2 Pa'ina,
Pablopi i̱ noni yo'oroja̱iñe sëte Israel pa̱i tsi'si huë'ena saji'i,
toaso̱ semanarepa huajë mu'se ñape sai i̱ohua'i ja̱'re Maija'quë toyapëre ñaquë i̱ti cayeje̱ pa'ye,
3 caquë quëaquëpi.
Jesús ju̱'isiquëpi cui'naëpi huajëquë huëiye pa'iji.
“Ja̱je pa'ina,
yë'ë mësarute quëaquë Jesús i̱ api,
maire huasoquë.”
4 Caquëna,
Israel pa̱i acohua'ipi sehuoni Pablona cui'ne Silasna tsiohuë.
Cui'ne jai pa̱i Maija'quëre se̱cohua'ipi griego pa̱ije sehuohuë.
Sehuojëna,
cui'ne jai pa̱i ëja nomiohua'ije̱ sehuohuë.
5 Ja̱je sehuojëna,
ñani oijë pë̱ijë Israel pa̱i sehuoma'cohua'ipi co'a pa̱i ma'ñare nema'pë co'a nëcaroja̱icohua'ini tsi'sohuë,
ja̱ohua'ipi ca huëojëna,
si'a pa̱i daripë pa'icohua'ipi pë̱ti huëoni jo̱sa yo'ojë caja̱jë cajë.
Ja̱je yo'ojëna,
tsi'sisicohua'ipi Pabloni cui'ne Silasni coejë Jasón huë'ena to̱mejani cacani jo̱sa yo'ohuë,
pa'ijëna,
tse̱ani etoni pa̱ina i̱siñu'u cajë.
6 Yo'ojëna,
i̱ohua'i cajë yo'ocohua'ipi peojëna,
coa pa'iohua'ini Jasónni cui'ne yecohua'i sehuosicohua'ini tse̱ani quërë etoni ja̱ daripë pa̱i ëjaohua'i quë'rona sahuë.
Sani cuijë cahuë:
“Icohua'ipi si'a hue̱'ña pa'icohua'ire ti̱ñe pa'iyena po̱najë yo'ocohua'ipi i̱ñoje dani yo'oyë.
7 Yo'ojëna,
Jasónpi i̱ohua'ire oi i̱ huë'ena pëaye i̱sipi.
Ja̱je yo'ocohua'i si'aohua'i César si'a pa̱i ëjaë cua̱ñese'ere sa̱ñope yo'oyë.
Yo'ojë cayë,
yequë pa̱i ëjaërepa pa'iji,
Jesu api i̱repa cayë.”
8 Cajëna,
ja̱ daripë acohua'ipi cui'ne i̱ohua'i ëjaohua'ipi asani ¿ja̱ jerepa yo'ocohua'i a'ni?
cuasa huëohuë.
9 Cuasajëta'are Jasónpi cui'ne yecohua'i sehuosicohua'ipi mësaru cua̱ñeñe ti̱'acaija̱'cohua'i a'ë cani curiquëre i̱si nëoni eto cua̱ñohuë.
Pablo Cui'ne Silas Bereare Pa'ise'e
10 Ja̱ ñami sehuosicohua'ipi esa Berea daripëna saijë̱'ë cajë jëjo saohuë,
Pablore cui'ne Silasre.
Jëjo saojëna,
saisicohua'ipi ti̱'ani Israel pa̱i tsi'si huë'ena cacahuë.
11 Berea acohua'i Israel pa̱i de'o pa̱i paë'ë.
Tesalónica pa̱ire sa tëto saisicohua'i paë'ë.
Ja̱je pa'iohua'ipi Pablo quëaye de'oye asajë nuñerepa quëaquë cajë si'a mu'señapi Maija'quë toyapëre ñahuë.
12 Ja̱je yo'ojë jai pa̱i Israel pa̱i acohua'ipi sehuohuë.
Sehuojëna,
cui'ne griego pa̱i ë̱mëohua'i cui'ne ëja nomiohua'ije̱ sehuohuë.
13 Sehuojëna,
Pablopi Bereana Maija'quë coca quëaquë pa'iji asani Tesalónica Israel pa̱ipi Bereana dani Pablore pa̱ipi jo̱sa yo'o ja̱'ñe ne huëohuë.
14 Ja̱je yo'o huëojëna,
sehuosicohua'ipi Pablore esa eto saohuë,
jai tsiaya të̱'tëpa quë'rona.
Jëjo saojëna,
coa Silaspi cui'ne Timoteopi co̱ni pëahuë,
Bereana.
15 Pëarena,
Pablore co̱ni saijë sasicohua'ipi Atenas daripëja̱'a je̱ojani co'ihuë.
Co'ijë Timoteore cui'ne Silasre Pablo esa daijë̱'ë case'ere dani quëahuë.
Pablopi Atenas Daripëre Pa'iye
16 Pablopi Silasre cui'ne Timoteore Atenas daripëpi pa'i utequë si'a hue̱'ña pa̱i de'huasi diusure pase'e pa'ijëna,
ñaquë oji'i,
co'ayerepa yo'oye'ni cuasaquë.
17 Ja̱je pa'ina,
Israel pa̱i tsi'si huë'ena cacaquë Israel pa̱i ja̱'re cui'ne Maija'quëre se̱cohua'i ja̱'re co̱ni capi.
Caquë cui'ne si'a mu'señapi huero hue̱'ñana tsi'sisicohua'ireje̱ yëhuoquë capi.
18 Caquëna,
pa̱i pa'iye asacohua'i epicúreos pa̱ipi cui'ne estoicos pa̱ipi i̱te ca huëoni cajë yecohua'ipi cahuë:
“¿I̱quere iquë caquë'ni,
jai cocaë maca?”
Cajëna,
yecohua'ipi cahuë:
“Yequë pa̱i diusuohua'i ayere quëacaiquë api cuasayë.”
Ja̱je cahuë,
Pablopi de'o coca Jesús ayere cui'ne i̱ ju̱'isiquëpi huëise'ere quëaquëna.
19 Ja̱ maca Pablore Areópago cu̱tihuëna sahuë,
ëjaohua'i tsi'si hue̱'ñana.
Sani i̱te se̱i'ë:
“¿Yëquë asaye yëyë,
i̱que huajë ye'yaye a'ni,
iye më'ë yëquëre quëaye?
20 Yëquë asa ma'ñere më'ëpi caquëna,
asa jujani ¿i̱quere më'ë caye quëaquë'ni?
cajë se̱ñë,
më'ëre.”
21 Atenas pa̱ipi cui'ne ti̱ pa̱ipi i̱ti maca pa'icohua'ipi ja̱'a yo'ose'ere pase'e asacohua'i paë'ë.
Ja̱je pa'iohua'i sëte ja̱je cahuë.
22 Cajëna,
i̱ohua'i joporepa pa'iquëpi Pablo huëni nëcani Areópago cu̱tihuëpi nëcaquë i̱ohua'ire capi:
“Atenas pa̱i yë'ë mësarute ñañe cato mësaru diusuohua'ire cuasañu'u cajë ai yëjë yo'ocohua'i a'ë.
23 Ja̱je yo'ocohua'ini yë'ë mësaru se̱ hue̱'ñana cacani i̱ti tëojë se̱ hue̱'ñana ñeje toyase'e pa'ina,
ñahuë:
‘Ti pa̱i ñama'a diusure se̱ hue̱'ña'ë.’
Ja̱je pa'ina,
yë'ë,
ja̱ë mësaru ti ñama'pë se̱ diusu ayere quëaquë a'ë.
24 Ja̱ëpi yeja cui'ne i̱ote pa'iye nesiquë ja̱je pa'ina,
i̱ api,
ma'tëmo cui'ne yeja ëjaërepa.
Ja̱je pa'ipi pa̱i nesi huë̱'ñare pa'ima'quë api.
25 Pa̱ini necaijë̱'ë,
yë'ëre cama'quë api.
I̱ api,
maire pa'iye si'aye yë'eye cui'ne yequë co'amañaje i̱sisiquë.
26 Te'ire pa̱ire de'huasiquëpi ja̱ëpi te'ipi jai pa̱i daripë̱a nepi,
Maija'quëpi si'a yeja pa'ija̱jë caquë.
Ja̱je pa'ina,
i̱pi i̱ohua'i pa'ija̱'to cui'ne i̱te i̱ohua'i co'eja̱'a macaje̱ ca nëopi.
27 Ja̱ohua'ipi Maija'quë mai quë̱no macare pa'iquëta'are coa cuasarepa i̱na co'e ti̱'ajajë caquë nepi.
28 Ja̱je pa'ina,
mai i̱na pa'iyë,
huajëcohua'i pa'ijë cu'iyë.
Mësaru aipë ta̱'ñe coca cacohua'i case'erepa:
‘Mai cato Maija'quë tsëcapë acohua'i a'ë’.
29 Ja̱je Maija'quë tsëcapë acohua'i sëte pa̱i i̱ohua'i cuasayepi huëojë curiquëpi,
po curiquëpi cui'ne quë̱napi de'huase'ere Maija'quëje̱ pa'i api,
cuasama'pë pañu'u.
30 Ai tsoe cato Maija'quë pa̱i huesëjë yo'oye coa ñaquë paji'i.
Ja̱je pa'isiquëta'a yure cato Maija'quë cua̱ñeji,
si'a hue̱'ña pa'icohua'ire i̱na sehuojë daijë̱'ë caquë.
31 Ja̱je pa'ina,
Maija'quëpi pa̱i yo'ose'e nuñerepa caquë ne de'huaja̱'a mu'se ca nëopi:
Jesu api,
ja̱ yo'oye yo'oja̱'quë,
i̱ jo'ya nesiquëpi.
Ja̱je pa'ina,
Jesuna cuasaye pa'iji caquë si'aohua'ire i̱ñopi,
ju̱'isiquëni huëoquë.”
32 Ja̱je ju̱'isicohua'i huëiye ayere caquëna,
asani cue'cuehuë.
Cue'cuejëna,
yecohua'ipi cahuë:
“Yequë mu'se asañu'u,
më'ë caye.”
33 Cajëna,
ja̱ohua'ire quëaye je̱opi.
34 Ja̱je pa'iquëta'are yecohua'ipi sehuohuë.
Sehuoni i̱ ja̱'re co̱ni tsiohuë.
Cui'ne ja̱ohua'i ja̱'re co̱ni paë'ë,
Dionicio.
Cui'ne te'e nomio Dámaris hue'eco paco'ë.
Ja̱ohua'i cato Areópago tsëcapë acohua'i paë'ë.
Pa'ijëna,
cui'ne yecohua'ije̱ co̱ni paë'ë,
i̱ohua'i ja̱'re co̱ni.