Timoteopi Pablore, Silasre Co̱ Huëoye
16
Pablopi Derbena cui'ne Listrana ti̱'ani ja̱rona Timoteore ñapi.
Judío nomiopi sehuosico mamaquëni cui'ne i̱ pëca ja'quëpi griego pa̱i paji'i.
2 Ja̱je pa'ini Timoteore sehuosicohua'ipi de'oquë api cahuë,
Listra cui'ne Iconia pa'icohua'ipi.
3 Ja̱je caquëni Pablopi i̱te co̱ja'quëre sasi'i,
cuasaquë.
Ja̱ yë'ta'a sama'në Timoteo ca̱'nihuëre yëto tëapi,
judío pa̱i i̱ saija̱'to pa'icohua'ipi co'aye cama'cohua'ini caquë.
Cui'ne si'aohua'i Timoteore griego pa̱i mamaquë api,
asa do'ire ja̱je yo'opi.
4 Ja̱je yo'osi jeteyo'je si'a daripë̱a maña i̱ohua'i sa saiyeje̱ pa'ye Jesús jëjo saocohua'i cui'ne Jerusalén pa'icohua'i sehuosicohua'i ëjaohua'i case'ere quëahuë,
sehuosicohua'ina ñeje yo'ojë̱'ë cajë.
5 Ja̱je yo'ojëna,
sehuosicohua'ipi i̱ohua'i sehuose'ere i̱tire pa'ë asajë tutu quë'i joñoa paë'ë.
Pa'ijëna,
mu'seña ñape jai pa̱i sehuojë jai saë'ë.
Pablo Ca̱ni Ñañe Macedonia Aquëre
6 De'o joyopi Asia yejana Maija'quë coca quëaye ë̱se do'ire Frigia yeja cui'ne Galacia yeja sa tëto sani,
7 Misia yeja niamona ti̱'ahuë.
Ti̱'ani ja̱ropi Bitinia sañu'u cuasahuë.
Cuasajëta'are Jesús joyopi ë̱sepi.
8 Ë̲sequëna,
Misia yejaje̱ sa tëto sani Troas yo sa'rona meñe cajehuë.
9 Cajeni ja̱rona Pablopi ca̱ni ñapi,
te'i Macedonia aquëpi nëcaquë i̱te yëquëre dani co̱caijë̱'ë caquëna.
10 Ja̱je Pablopi ca̱ni ñaëna,
ja̱ro Macedoniana de'o coca quëaye pa'iji caquë Maija'quëpi soiji cajë ne de'huahuë,
sañu'u cajë.
Pablo Cui'ne Silas Filipos Pa'iye
11 Troas yo sa'rona aya mëisicohua'ipi te'e mu'serepa saë'ë,
Samotracia saodohuëna.
Saisicohua'ipi ñatasi mu'se Neápolisna ti̱'ahuë.
12 Ti̱'ani ja̱ropi Filiposna saë'ë,
romano pa̱i daripëna.
Ja̱ro Macedonia yeja ai ëja daripëre pana saë'ë.
Sani ja̱rona pëahuë,
tsoe mu'seña maña.
13 Pëasicohua'ipi huajë mu'se pa'ina,
pa̱i daripëpi hue'sena etani saë'ë.
Tsiaya të̱'tëpa quë'rona sani cuasahuë,
judío pa̱i Maija'quëre se̱ hue̱'ña'ë.
I̱ño cuasani ja'runi ñu'ijë de'o cocare quëahuë,
nomiohua'ire i̱ti maca tsi'sini ñu'icohua'ire.
14 Quëajëna,
te'o nomio Lidia hue'ecopi,
Tiatira daripë pa̱iopi,
jai do'i ca̱ña ma ja̱'ñe i̱sicopi tsi'sicohua'i ja̱'re paco'ë.
Ja̱je pa'iona,
Maija'quëpi Pablo cayere de'oyerepa asaja̱co caquë necaina,
ai Pablo cayese'e asao,
si'aye i̱ quëaye.
Ja̱o cato Maija'quëre se̱co paco'ë.
15 Ja̱je pa'iopi i̱o tsëcapë ja̱'re co̱ni oco do cua̱ñoni yëquëre cao:
“Mësarupi yë'ëre sehuosicore pare ñani yë'ë huë'ena sani pëajë̱'ë.”
Ja̱je caco ai se̱ona,
i̱o huë'ena sani pëahuë.
16 Pëasicohua'ipi te'e mu'se Maija'quëre se̱ hue̱'ñana saijë te'o nomi tsi̱o ta̱'ñe yequë mu'seña pa'i ja̱'ñere quëa joyore hue'econi ti̱'ahuë.
Ja̱je pa'iopi i̱o ëjaohua'ire jaiye curiquë necaico paco'ë,
i̱o ta̱'ñe ca do'ipi.
I̱o cato i̱ohua'i jo'yao paco'ë.
Conversión del carcelero (Hechos 16.16-40)
“¡Icohua'i cato Diusu tutu quë'ire pare necaicohua'i a'ë.
Ja̱je pa'iohua'ipi mësarute huaso cocare pare quëayë!”
18 Ja̱jese'e si'a mu'seña cuico pe'teroja̱iona,
yo'o jujani Pablopi co'ye po̱nëni i̱ote ta̱'ñe ca cocare capi:
“Jesucristo mamipi cua̱ñeñë,
icore je̱oni etani saijë̱'ë,
co'a joyo.”
Ca macarepa ja̱re i̱ti macapi co'a joyo i̱ote etani saji'i.
19 Ja̱je huatipi etaëna,
i̱o ëjaohua'ipi ñani yure curiquë neñe peoji cuasajë Pablore cui'ne Silasre tse̱ahuë.
Tse̱ani co'amaña huero hue̱'ñana sahuë,
ja̱ daripë ëjaohua'i quë'rona.
20 Dani ëjaohua'ire cahuë:
“Icohua'i Israel pa̱i a'ë.
Ja̱ohua'ipi mai daripë ai jo̱sa yo'oyë.
21 Israel pa̱i yo'oyere ye'yayë,
ja̱ohua'i.
¿Me mai romano pa̱i i̱ohua'i caye asani yo'oye'ni?”
22 Cajëna,
si'aohua'i cui'ne cahuë.
Cajëna,
ja̱ daripë pa̱i yo'oye ñacohua'ipi Pablore cui'ne Silasre ju'i ca̱ña du'teni si'sejë̱'ë,
cua̱ñehuë.
23 Cua̱ñejëna,
ai si'sehuë.
Si'se tëjini co hue̱'ñana sani cosicohua'ire ñaquëre de'hua ñajë'ë,
icohua'ire cajë cua̱ñeni co huesohuë.
24 Cua̱ñerena,
asani ai sa̱'nahuë tu'rihuëna sani copi.
Coni so̱quë totona co̱ña nesicona nëcañoa jua nëoni hue̱ñopi.
25 Hue̱ñosicohua'ipi ñu'ijë jopo ñami pa'ina,
Pablopi cui'ne Silaspi co̱ni Maija'quëre se̱jë cui'ne jë̱jë yo'ojëna,
si'a cosicohua'i asahuë.
26 Ja̱ macarepa yejapi ai ñu'cueo.
Ñu'cuecona,
co hue̱'ña eta sa'noapi si'aye hui'yo sao,
cui'ne pa̱ire quë̱na meapi hue̱se'eje̱ to̱me sapi,
peo hue̱'ña.
27 Ja̱ maca cosicohua'ire ñaquëpi sëtani hui'yose'e eta sa'noa pa'iona,
ñani cosicohua'ipi tsoe etahuë cuasaquë i̱ hua'tipi dutani co'ye huasi'i caquë yo'opi.
28 Yo'oquëna,
Pablopi tutu capi:
“Yo'oma'ë.
Si'aohua'i yëquë iye macare pa'iyë.”
29 Caquëna,
asani miañe dajë̱'ë cani tsasiquë ca'raquë huë'huë cacani Pablo cui'ne Silas quë̱o quë'rona do're ja'rupi.
30 Yo'o tëjini huëni nëcani Pablore cui'ne Silasre etoni se̱ji'i:
“¿Huasosiquë pa'iye cani me yo'oye pa'iquë'ni,
yë'ë?”
31 Se̱ina cahuë:
“Jesucristoni sehuojë̱'ë.
Sehuoni huasosiquë pa'ija̱'quë a'ë,
më'ë.
Cui'ne më'ë huë'e acohua'i huasosicohua'i pa'ija̱'cohua'i a'ë.”
32 Ja̱ maca i̱te cui'ne si'aohua'i i̱ huë'e acohua'ire mai Ëjaë cocare quëahuë.
33 Ja̱re i̱ti quëa tëji maca,
cosicohua'ire ñaquëpi Pablore cui'ne Silasre si'sese'e a'si tsoapi.
Ja̱ jeteyo'je i̱ cui'ne si'aohua'i i̱ huë'e acohua'i oco do cua̱ñohuë.
34 Do tëjisi maca tu̱mani Pablore cui'ne Silasre i̱ huë'ena sani a̱opi.
I̱ cui'ne i̱ tsëcapë acohua'i Maija'quëre sehuosicohua'i pa'ijë ai sihuahuë.
35 Nea hue̱'ña pa'i maca pa̱i yo'oye ñani ca de'huacohua'ipi Pablore cui'ne Silasre eto saojë̱'ë cajë cosicohua'ire ñaquëre quëaja̱'a soldado pa̱ire jëjo daohuë.
36 Sani quëarena,
cosicohua'ire ñaquëpi capi,
Pablore:
“Pa̱i yo'oye ñacohua'ipi yë'ëre mësarute eto saojë̱'ë,
cua̱ñehuë.
Ja̱je pa'iye sëte se̱ñajë de'oye saijë̱'ë,
yure.”
37 Caquëna,
Pablopi capi:
“Quëañu'u cajë daisicohua'ire soldado pa̱ire yëquë romano pa̱ini mësaru ti co'aye yo'ose'eje̱ cama'pë do'i peocohua'ini si'a pa̱i ñajëna,
si'sehuë.
¿Yure ja̱je yo'osicohua'ipi yahuerepa etoñu'u cayë?
Ja̱je yo'oye coeyë,
i̱ti yëquëre cosicohua'ipi dani eto saoja̱jë.”
38 Caquëna,
soldado pa̱ipi sani romano pa̱i a'ë,
quëarena,
pa̱i yo'oye ñani ca de'huacohua'ipi quëquëhuë.
39 Quëquësicohua'ipi dani pa̱i yo'oye ca de'hua ëjaohua'ipi yëquë mësarute co'aye yo'ose'e oijë̱'ë cajë se̱i'ë,
Pablore cui'ne Silasre.
Ja̱je cani etoni iye daripëpi etani saijë̱'ë cajë se̱i'ë.
40 Se̱tena,
Pablopi cui'ne Silaspi co hue̱'ñapi etani Lidia huë'ena saë'ë.
Sani sehuosicohua'ire ñajë cui'ne je̱oma'pë tuijë̱'ë cajë yëhuo tëjini etani saë'ë.