Jerusalénna Tsi'siye
15
Ja̱ mu'seña Judeapi Antioquíana cayao maña saisicohua'ipi Maija'quë do'ijëre ye'yajë cahuë huaso cua̱ñoñe peoji,
Moisés cua̱ñese'ere yo'oma'pë pani,
ca̱'ni tëama'pë pani,
cahuë.
2 Ja̱je cajëna,
Pablopi cui'ne Bernabépi co̱ni i̱ohua'i ja̱'re ai sa̱'ñe yo'ojë cahuë.
Ja̱je yo'ojë cajëna,
Pablore,
Bernabére cui'ne yecohua'i sehuosicohua'ire Jerusalénna sani Jesús jëjo saocohua'i ja̱'re cui'ne ja̱ daripë sehuosicohua'i ëjaohua'i ja̱'re ca̱'ni tëaye ayere coca caja̱'cohua'ire jëjo saoñu'u,
cani jëjo saohuë.
3 Antioquía daripë sehuosicohua'i pa'icohua'ipi jëjo saojëna,
saicohua'ipi Fenicia yejaja̱'a cui'ne Samaria yejaja̱'a sa saijë quëahuë,
judío pa̱i peocohua'ipi ja̱'në i̱tire pa'ë cuasajë pa'ise'ere je̱oconi Maija'quëre sehuose'ere quëajëna,
asani si'aohua'i sehuocohua'i sihuahuë.
4 Jerusalénna Pablo cui'ne Bernabé ti̱'arena,
sehuosicohua'ipi cui'ne Jesús jëjo saocohua'ipi cui'ne sehuosicohua'i ëjaohua'ipi co̱ni de'oye pëpahuë.
Pëparena,
pa'ijë si'aye Maija'quë i̱ohua'i ja̱'re yo'ose'ere quëahuë.
5 Quëajëna,
fariseo acohua'ipi Maija'quëre sehuosicohua'ipi huëni nëcani cahuë:
“Yequë pa̱ipi sehuosicohua'ire ca̱'ni tëaye pa'iji.
Ja̱ maca Moisés cua̱ñese'ere yo'o ti̱'ajë'ë,
cua̱ñeñe pa'iji.”
6 Cajëna,
asani ja̱ maca Jesús jëjo saocohua'ipi cui'ne sehuosicohua'i ëjaohua'ipi tsi'sihuë,
fariseo acohua'i case'ere sa̱'ñe coca cajë asañu'u cajë.
7 Ja̱je cajë tsi'sisicohua'ipi ai sa̱'ñe ca tëji maca Pedropi huëni nëcani capi:
“Maija'quë do'ijë mësarupi ta̱'ñe asayë,
yë'ëre mësaru aquëni Maija'quëpi jo'ya nese'e tsoe hue̱'ña i̱ huaso cocare judío pa̱i peocohua'ina quëaquëna,
ja̱ohua'ipi i̱tire pa'ë cajë sehuoja̱jë caquë.
8 Maija'quë pa̱i joñoa cuasaye ñaquëpi yë'ë tse̱cohua'ire neñë caquë i̱ñoquë,
de'o joyore i̱sipi,
judío pa̱i peocohua'ina maire i̱sise'eje̱ pa'ye.
9 Ja̱je pa'ina,
Maija'quë cato ja̱ohua'ire cui'ne maire ti̱ñe pa'iohua'ire ñañe pa̱ji,
si'aohua'ire cui'ne pa'iohua'ire ñaji.
Ja̱je pa'ina,
Maija'quëre cuasa do'ija̱'a de'o joñoa tsoa to̱caji'i,
ja̱ohua'ireje̱.
10 Yure ja̱je pa'ito,
¿me yo'ojë Maija'quë yo'oyere sa̱ñope uihuaye'ni,
sehuosicohua'ina dëquëcoje̱ pa'iore hue'ocaijë maije cui'ne mai aipëje̱ yo'o ti̱'añe pa̱se'ere?
11 Ja̱je pa'ina,
yëquë cato cuasayë ja̱ohua'ire huasose'eje̱ pa'yepi yëquëreje̱ Ëjaë Jesús oi coa i̱siyepi huasopi cuasayë.”
12 Caquëna,
si'aohua'i jo'cua je̱oni Bernabé cui'ne Pablo cayere asahuë.
I̱ohua'i ja̱'re Maija'quë pa'i co̱caina,
yequë mu'seña pa'i ja̱'ñe i̱ñose'e cui'ne pa̱i yo'o ti̱'a ma'ñe yo'ose'e quëajëna,
asahuë.
13 Ja̱ maca quëa tëjijëna,
Santiagopi capi:
“Maija'quë do'ijë asajë̱'ë.
14 Maija'quëpi judío pa̱i peocohua'ire de'oye yo'ocai ja̱ohua'i acohua'ini sahuani i̱ pa̱irepa pa'ija̱'cohua'ire nese'ere Simónpi maire quëaquëna,
asahuë.
15 Ja̱je pa'ina,
iye toyase'e cato Maija'quëre quëacaicohua'i toyase'eje̱ pa'ye yo'ose'e a'ë.
Ja̱je pa'ina,
ñeje caji,
toyase'e:
16 Ja̱ jeteyo'je co'i co̱ni
David huë'e ta̱isicore ne de'huacasi'i
Cui'ne i̱o co'a de'ose'e si'aye ne de'huasi'i.
17 Ne de'huaëna,
ëjaëre judío pa̱i co'eja̱jë,
yë'ë mami se̱cohua'i judío pa̱i peocohua'i ja̱'re.
18 Tsoe hue̱'ña iye yo'o ja̱'ñe quëasiquëpi,
ëjaëpi i̱sipi iye coca.
19 Ja̱je pa'ina,
yë'ë cato cayë,
judío pa̱i peocohua'ipi ja̱'në i̱tire pa'ë cuasase'ere je̱oni Maija'quëni tuicohua'ire cua̱ñese'ere yo'ojë̱'ë cajë cua̱ñeñe peoji.
20 Ja̱je pa'ina,
coa iyese'e yo'oma'pë pa'ijë̱'ë cajë toyase'e tsoe ti̱'api.
Pa̱i de'huasi diusure i̱sisi hua'ire a̱ima'pë pa'ijë̱'ë,
ë̱mëre cui'ne nomiore coa yo'oroja̱ima'pë pa'ijë̱'ë,
quio hue̱asicohua'ire a̱ima'pë pa'ijë̱'ë,
pa̱nita'a tsie a̱ima'pë pa'ijë̱'ë.
21 Ja̱ maña toyañu'u,
Moisés cua̱ñese'e cato tsoe hue̱'ñapi pa̱i ñape daripë̱a pa'icohua'ire quëajë pa'iyë,
huajë mu'seña ñape tsi'si huë̱'ñapi i̱ti toyase'ere ñajë.
Ja̱je pa'ito me airepa caye'ni.”
Judío Pa̱i Peocohua'ina Toyani Jëjo Saose'e
22 Ja̱ maca yureta'a Antioquíana i̱ohua'i acohua'ini sahuani Pablo cui'ne Bernabé ja̱'re jëjo saoñu'u,
cajë si'a sehuosicohua'i.
Sehuosicohua'i ëjaohua'i cui'ne Jesús jëjo saocohua'i te'e cuasahuë.
Cuasani yo'ojë Judas hue'equëni,
ja̱re i̱pi yequë mami Barsabás hue'equëni cui'ne Silasni saija̱'cohua'ire nehuë,
de'ocohua'ire pare.
23 Neni ja̱ohua'i ja̱'re ñeje toyasicore jëjo saohuë:
“Yëquë Jesús jëjo saocohua'ipi cui'ne sehuosicohua'i ëjaohua'ipi mësaru a'yëohua'ije̱ pa'iohua'ipi mësarute yëquë yo'je tsi̱je pa'iohua'ire cuasajë judío pa̱i peocohua'ipi sehuosicohua'ire pëpayë,
ja̱ro Antioquía daripë,
cui'ne Siria cui'ne Cilicia yeja pa'icohua'ire.
24 Cui'ne yëquë jëjo saoma'cohua'ipi i̱ñopi.
Saisicohua'ipi mësarute jo̱sa yo'ojë huesë ëaye ca co̱'me huesojëna,
ai yo'ojë asahuë.
25-26 Ja̱je pa'ina,
asani si'aohua'i ja̱je yo'oye de'oji cuasani mësarute yëquë acohua'ipi sani ñaja'cohua'ire neñu'u cani nehuë,
yëquë ai oicohua'i Pablo cui'ne Bernabé ja̱'re saija̱'cohua'ire,
ju̱'iñe pa'itoje̱ quëcojë Jesucristo coca do'ire quëaroja̱icohua'i ja̱'re saija̱'cohua'ire.
27 Ja̱je yo'osicohua'ipi yure mësaru quë'rona jëjo saoyë,
Judasre cui'ne Silasre mësaru ja̱'re te'e tsiarepa ñajë coca si'aye quëaja̱'cohua'ire,
yëquë quëase'eje̱ pa'ye.
28 Ja̱je pa'ina,
de'o joyoje̱ de'oji,
ja̱je yo'oye caquëna,
ñaquëna,
yëquëje̱ mësarute jaiye yo'ojë̱'ë cajë cua̱ñeñe peoyë.
Coa do'i quë'yese'e yo'ojë̱'ë caye yëyë,
iyese'e:
29 Pa̱i de'huasi diusuna i̱sisi hua'i a̱ima'pë pa'ijë̱'ë,
quio hue̱asicohua'ire a̱ima'pë pa'ijë̱'ë,
tsieje̱ a̱ima'pë pa'ijë̱'ë,
cui'ne ë̱mëpi nomiohua'ire coa yo'oroja̱iñe yo'oma'pë pa'ijë̱'ë,
nomioje ë̱mëohua'ire coa yo'oroja̱iñe yo'oma'o pa'ijë̱'ë.
Iye case'ere yo'oni mësaru de'oye pa'ija̱'cohua'i a'ë.
De'oye pa'ijë̱'ë.
Ca tëjihuë.”
30 Ja̱ maca sai huëoni pëpa tëjini yureta'a Antioquíana saë'ë.
Sani ti̱'ani sehuosicohua'ire tsi'soni toyasicore i̱sihuë.
31 I̱sirena,
sehuosicohua'ipi toyase'ere ñajë cajëna,
asajë jai pa̱i sihuahuë,
i̱te yëhuoyere asajë.
32 Sihuajë asajëna,
Judas cui'ne Silaspi Maija'quë caye asani quëacai tutu pacohua'ipi ai tsoe quëahuë,
yëhuojë.
Ja̱je yëhuojëna,
asa huajëjë jerepa tutu quë'i joñoa paë'ë.
33 Ja̱je quëajë pani tëjirena,
sehuosicohua'ipi sani pëpacaijë̱'ë si'aohua'ire mësarute jëjo daosicohua'ire cajë pëpa tëjihuë,
co'ija̱'cohua'ire.
34 Ja̱je pa'iquëta'are Silasse'e de'oji pëaye cuasani pëapi.
35 Pëaquëna,
cui'ne Pabloje̱ cui'ne Bernabéje̱ pëahuë,
Antioquíana,
Maija'quë coca ye'yajë cui'ne quëaroja̱ijë yo'oja̱'cohua'ipi.
Pëarena,
jai pa̱i sehuosicohua'ipi i̱ohua'i ja̱'re co̱ni yo'ohuë,
i̱ti co'amaña.
Maija'quë Coca Quëasi'i Caquë Pablo Cayaye Acore Saise'e
36 Ai tsoe pa'iquëpi Pablo capi,
Bernabére:
“Sehuosicohua'ire ti̱jupë do'i sani ñañu'u,
mai ja̱'në Ëjaë coca quëasi daripë̱ana.
¿Me pa'iye'ni?”
37 Caquëna,
Bernabépi Juanre yequë mami Marco hue'equëre sañu'u capi.
38 Caquëna,
Pablopi ë̱sepi,
saye.
Ja̱ë Marcopi ja̱'nëje Panfiliana i̱ yo'oye je̱oconi te'e nema'ë yo'osiquëre me caquë.
39 Ja̱je pa'ina,
te'e cuasaye peoquëna,
te'ohua'ise'e huahuë.
Huani Bernabépi Marcore sapi.
Saquë jai yohuëna aya mëni Chiprena saë'ë.
40 Saijëna,
Pablopi i̱te co̱ja'quëre Silasni ti̱'api.
Ti̱'aëna,
sehuosicohua'ipi Maija'quëre se̱cacatena,
etani saji'i.
41 Saiquëpi Siria yejaja̱'a cui'ne Cilicia yejaja̱'a sa tëto sai Maija'quëre sehuosicohua'ire quëa huasoquë cuji'i.