Pablo Cui'ne Bernabé Iconiore Pa'iye
14
Pablopi cui'ne Bernabépi Iconiore pa'ijë judío pa̱i tsi'si huë'ena cacani Maija'quë coca quëajëna,
jai pa̱i judío pa̱i cui'ne judío pa̱i peocohua'i sehuohuë.
2 Sehuojëna,
judío pa̱i sehuoma'cohua'ipi sa̱ñope yo'oja̱jë cajë judío pa̱i peocohua'ire cua̱ñejëna,
sehuosicohua'ire co'aye cuasa huëohuë.
3 Ja̱je co'aye cuasa huëo do'ire ai tsoe ja̱ daripëna pëani Maija'quë coca de'oyerepa quëahuë.
Quëajëna,
Maija'quëpi pa̱i yo'o ti̱'a ma'ñe yo'o tutu i̱siquëna,
jaiye de'oyere yo'ohuë.
Ja̱je yo'ojëna,
Maija'quë oiye i̱ohua'i quëaye do'i quë'yerepa pa'iye i̱ñopi.
4 Ja̱je pa'iquëta'are i̱ti daripë acohua'ipi caya tsëca huasicohua'i paë'ë.
Pa'ijë yecohua'ipi judío pa̱i cayere de'oye a'ë,
cacaë'ë.
Cajëna,
yecohua'ipi Ëjaë jëjo saocohua'i cayere de'oye a'ë,
cacaë'ë.
5 Ja̱je cajë pa'ijëna,
judío pa̱ipi cui'ne judío pa̱i peocohua'ipi Pablore cui'ne Bernabére co'aye yo'ojë quë̱na pë̱api je̱a jo'añu'u cajë i̱ti daripë ëjaohua'i ja̱'re coca cani te'e ja̱je yo'oye de'oji,
cuasa nëohuë.
6 Cuasa nëose'ere asani Pablopi cui'ne Bernabépi catihuë,
Listrana cui'ne Derbena Licaonia yejana cui'ne i̱ti yeja yequë daripë̱a pa'iyena.
7 Catini ja̱roje̱ quëahuë,
de'o cocare.
Pablore Quë̱na Pë̱api Je̱añe
8 Listra daripëre te'i ë̱më tsi̱'nëna cu'ima'quë ai de'osiquëpi paji'i,
coa ñu'iquëpi.
9 Coa ñu'iquëpi Pablo quëayere asaquë Maija'quëpi yë'ëre ne co'yaye pa'iji cuasaquë ñuji'i.
Ñu'ina,
Pablopi i̱ ja̱je Maija'quëre cuasaye asani
10 ai tutu capi:
“Huëni nëcajë̱'ë.”
Caquëna,
ca macarepa te'ere papi huëni nëcani cu'i huëopi.
11 Ja̱je Pablo yo'ouna,
ñani Licaonia cocapi tutu cuijë cahuë:
“Diusuohua'ipi pa̱ije pa'iohua'i de'oni mai quë'rona cajeni yo'oyë.”
12 Cajë Bernabéni diusu Zeus hue'yohuë.
Hue'yojë Pabloni i̱ti coca ca do'ire Hermes hue'yohuë.
Listra pa̱i diusu mamire hue'yohuë.
13 Ja̱ maca yureta'a pa̱i daripë caca sa'ro yë'quë macare diusu Zeuste se̱ huë'e paquëpi i̱ti huë'e ñacai ëjaëpi duruhue̱quëre cui'ne de'o joro nese'ere dapi.
Dani Jesús jëjo saocohua'ire de'ocohua'ire pa'ni caquë se̱si'i,
caquë yo'opi.
Yo'oquëna,
yecohua'ije̱ i̱ ja̱'re se̱ñu'u,
cajë yo'ohuë.
Yo'ojë i̱ohua'i ai yo'ojë pacohua'ini nëicohua'ire huani coa i̱sijë se̱ñu'u,
cajë yo'ohuë.
14 Yo'oyere asani Bernabépi cui'ne Pablopi co'aji,
ja̱ yo'oye cajë.
Ju'i ca̱ñana co'rëjë,
cuijë sa to̱mejaë'ë,
i̱ohua'i jopona.
15 Ñeje cuihuë:
“¿Merepa mësaru ja̱je yo'oye'ni?
Yëquë cato mësaruje̱ pa'iohua'i a'ë.
Yure mësaru coa yo'oye je̱oni Maija'quë i̱ti yeja,
ma'tëmo,
jai tsiaya cui'ne si'aye i̱ote pa'iye de'huasiquëre pani sehuoni pa'ija̱jë cajë quëañu'u cajë daisicohua'i a'ë.
16 Ja̱je pa'iquëta'are yequë mu'seña cato i̱ohua'ise'e i̱ohua'i yëyeje̱ yo'ojë pa'ija̱jë caquë ñapi,
Maija'quë.
17 Ja̱je yo'ojë pa'itoje̱ Maija'quëpi de'oye yo'oyeja̱'a i̱ñopi,
yë'ë pa'iye caquë.
Ja̱je pa'ina,
i̱pi mësarute oco cui'ne de'oye quë̱quëna tëaye cui'ne a̱iñe cui'ne sihuajë pa'iye i̱siji.”
18 Ja̱je si'aye canije ai yo'ojë maña duruhue̱quëre huaiye pa̱jë'ë,
cajë ë̱sehuë,
diusuohua'ire i̱sijë se̱ñu'u cajë yo'ocohua'ire.
19 Ja̱je yo'ojë ca maca da ti̱tahuë,
Israel pa̱i,
Antioquía yeja cui'ne Iconia yeja pa'icohua'i.
Ja̱ohua'ipi ti̱tani ti̱ñe cuasayena pa̱ire po̱nahuë.
Po̱narena,
Pablore quë̱na pë̱api je̱a jo'ahuë.
Je̱a jo'ani huani je̱ohuë,
cuasajë pa̱i pa'i daripë hue'sena quërë etohuë.
20 Quërë je̱orena,
sehuosicohua'ipi i̱ u̱i hue̱'ñana tsi'sini nëcajëna,
huëji'i.
Huëni pa̱i daripëna cacapi.
Cacasiquëpi ñatasi mu'se Bernabé ja̱'re co̱ni Derbe daripëna saë'ë.
21 Sani ja̱ro Derbena de'o coca quëajëna,
jai pa̱i sehuohuë.
Sehuorena,
ñani ja̱ropi Listrana,
Iconiana cui'ne Antioquía darina co'ihuë.
22 Co'ini,
ja̱ro sehuosicohua'i pa'icohua'ire yo'o jujama'pë ñese tuijë̱'ë,
cahuë.
Cajë cui'ne Maija'quëre cuasare pajë pa'ijë̱'ë,
cahuë.
Ja̱je cajë cui'ne yequeje̱ cahuë,
Maija'quë cua̱ñe te̱'tena cacañu'u cani jaiye ai yo'oye pa'iji.
23 Ja̱je cajë cui'ne yequeje̱ sehuosicohua'i tsëcapë̱a ñape i̱ohua'i ëjaohua'i pa'ija̱'cohua'ire nehuë.
Neni a̱o a̱ima'cohua'ipi Maija'quëre se̱jë yo'o tëjini icohua'ire de'oye ñacaijë̱'ë,
cajë Maija'quëre se̱cacaë'ë,
i̱ohua'i sehuosiquëna.
Antioquíana Pablopi Cui'ne Bernabépi Co'iye
24 Pisidia yeja sa tëto sani Panfilia yejana ti̱'ahuë.
25 Ti̱'ani Perge yeja pa'icohua'ire de'o coca quëahuë.
Quëa tëjini Antalia daripëna saë'ë.
26 Sani ja̱rona yureta'a yohuëna aya mëni Antioquíana,
Maija'quë oiye ayepi necaijë̱'ë cajë cua̱ñe sitona,
i̱ohua'i de'oye i̱ti case'eje̱ ne tëji sitona co'ihuë.
27 Co'ini Antioquíana ti̱tani si'a sehuosicohua'ire si'soni Maija'quë i̱ohua'i ja̱'re co̱ni yo'oquëna,
Ëjaëpi judío pa̱i peocohua'ipi sehuoja̱jë caquë ja̱to sa'roje̱ pa'iore hui'yocaquëna,
de'oye sehuose'ere quëahuë.
28 Quëasicohua'ipi sehuosicohua'i ja̱'re co̱ni i̱ti macana pëani tsoe paë'ë,
ja̱rote.