Bernabé Cui'ne Saulo Yo'o Huëoye
13
Antioquía yejare Maija'quëre quëacaicohua'i cui'ne Maija'quë coca ye'yacohua'i paë'ë,
sehuosicohua'i ja̱'re co̱ni.
Icohua'ipi paë'ë,
Bernabé,
Simón yequë mami Negro hue'equë,
yequë Lucio Cirene aquë paji'i,
Manaén paji'i,
(Herodes ja̱'re ai de'osiquë Galilea yeja cua̱ñequë pa'isiquë) cui'ne Saulo paji'i.
2 Ja̱je pa'icohua'ipi te'e mu'se a̱ima'cohua'ipi mai Ëjaëre se̱jëna,
de'o joyopi capi:
“Ja̱ohua'ire Bernabére cui'ne Saulore jëjo saojë̱'ë,
yë'ë nejajë caquë soise'e neja'cohua'ire.”
3 Caëna,
a̱ima'pë Maija'quëre se̱ni tëjini ja̱ohua'ire jë̱ñapi jëjo pajë se̱cacani jëjo saohuë,
se ñajë saijë̱'ë cajë.
Chipre Pa̱ire Yëhuoye
4 Maija'quë joyopi jëjo saoquëna,
saicohua'ipi Bernabé cui'ne Saulo saë'ë,
Seleucia daripëna saicohua'ipi.
Ja̱ropi jai yohuëna aya mëni Chipre hue'e saodohuëna saë'ë.
5 Saicohua'ipi Salamina yo sa'rona ti̱'ani judío pa̱i tsi'si huë̱'ñana Maija'quë coca quëa huëohuë.
Juan i̱ohua'ire co̱casi'i caquë saisiquëje̱ i̱ohua'i ja̱'re paji'i.
6 Si'a saodohuë quëaroja̱ijë Pafos daripëna sa ti̱'ahuë.
Ti̱'ani ja̱rona ñahuë,
Israel pa̱ipi dahuëpi Barjesús hue'equëre.
Ja̱ëpi Maija'quë cocare cayë caquë pa̱ire cosoquë yo'oquë paji'i.
7 Ja̱ë dahuëpi Sergio Paulo ta̱'ñe asaquë ja̱'re pa̱i ëjaë ja̱'re paji'i.
Pa'ina,
pa̱i ëjaëpi Bernabére cui'ne Saulore quërëja̱ija'cohua'ire jëjo saopi,
Maija'quë coca quëajëna,
asayere yë.
8 Ja̱je yo'oquëta'are griego pa̱i coca cato Elimas hue'equëpi dahuëpi pa̱i ëjaë sehuoyere ë̱sequë Bernabére cui'ne Saulore sa̱ñope capi.
9 Caquëna,
Saulopi Pablo hue'equëpi Maija'quë joyo ti̱mësiquëpi i̱te ai ñani,
10 capi:
“¡Cosou,
co'aquërepa,
huati mamaquë si'aye de'oyere sa̱ñope yo'oquë ai!
¿Je yëhua Ëjaëre sa̱ñope yo'oye je̱oja'quë a'ni,
më'ë?
11 Yure Maija'quëpi më'ëre si'sesipi.
Si'sequëna,
tsoe mu'seña ñama'ë pa'i cui'ne ë̱së miañeje ñama'ë pa'ija̱'quë a'ë,
më'ë.”
Ca macarepa Elimas ñama'quë de'opi,
ñamije pa'iose'ere ñaquë de'oni.
Ja̱ maca i̱te jë̱tëna tse̱'ejë cuaja̱'cohua'ini co'epi.
12 Ja̱re ñani ai de'oyere pa'ë,
Ëjaë aye ye'yaye cuasaquë pa̱i ëjaë sehuopi.
Pablo Cui'ne Bernabé Antioquíare Pa'iye Pisidia Yejare
13 Pablo cui'ne i̱te co̱cohua'i jai yohuëna aya mëni Pafos daripë je̱oni Perge daripëna ti̱'ahuë,
Perge daripë Panfilia yeja quë'ro acona.
Ja̱rona Juan je̱oni Jerusalénna co'ipi.
14 Perge sa sani Pisidia yeja quë'ro daripëna Antioquíana ti̱'ahuë.
Ti̱'ani huajë mu'se pa'ina,
Israel pa̱i tsi'si huë'ena cacani ja'ruhuë.
15 Ja'runi ñu'ijëna,
tsi'si huë'e ëjaohua'ipi cua̱ñese'e cui'ne Maija'quëre quëacaicohua'i toyasi pëpë ña tëjini cahuë:
“A'yë dohuë,
pa̱ire yëhuoye pa'ito quëajë̱'ë,
yurepi.”
16 Carena,
ja̱ maca Pablo huëni nëcani jë̱tëpi cama'pë caquë ja'jëni capi:
“Ë̲mëohua'i Israel pa̱i cui'ne si'aohua'i yequë pa̱i Maija'quëre ca'racohua'i asajë̱'ë.
17 Israel pa̱i Diusupi mai aiohua'ire jo'ya nepi.
Jo'ya neni ja̱ohua'ija̱'a jai pa̱i jojo saiye nepi,
yequë pa̱i yeja Egíptore pa'i maca cui'ne ja̱ jeteyo'je i̱ tutupi yo'oquë etopi,
ja̱ yeja pa'isicohua'ire.
18 Etouna,
Israel pa̱ipi cuarenta o̱metëca pa̱i peo hue̱'ña cue̱nesi yejaja̱'a cu'ijë yo'ojëna,
Maija'quëpi i̱ohua'ire de'oye ñacaiji'i,
yo'o jujama'ë.
19 Ja̱je yo'oquë siete tsëcapë̱arepa Canaán yeja pa'icohua'ire nejopi,
ja̱ohua'i yejare mai aipëna i̱sisi'i caquë.
20 Si'aye iye yo'oye cato cuatrocientos cincuenta o̱metëca paji'i.
Ja̱ pa'isi jeteyo'je yureta'a Maija'quëpi Israel pa̱i yo'oyere ñani ca tëji ëjaohua'ire i̱sipi,
Maija'quëre quëacaiquë Samuel pa'i macaja̱'a.
21 Ja̱je yo'oye pa'ina,
yureta'a se̱i'ë,
yëquëre cua̱ñe ëjaëre pare necaijë̱'ë cajë.
Se̱jëna,
Maija'quëpi Cis mamaquë Saúlni pa̱i ëjaëre necaji'i,
cuarenta o̱metëca i̱ohua'ire cua̱ñeja'quëre.
Ja̱ë cato Benjamín tsëcapë aquë paji'i.
22 Pa'ina,
jeteyo'je Maija'quëpi Saúlre pa̱i ëjaërepa pa'iye jioni Davidna i̱sipi,
pa̱i ëjaërepa pa'iye.
Davidni Maija'quë capi,
ñeje:
‘Isaí mamaquë David cato yë'ë yëyere yo'osi'i cuasaji.
Ja̱je pa'ipi,
yë'ë ña hue̱'ñaje de'oye yo'oquë api.’
23 Ja̱je pa'ina,
i̱ ca nëose'eje̱ pa'ye Israel pa̱ire huasosi'i caquë jëjo daopi,
Jesure.
Jesús cato David tsëcapë aquë paji'i.
24 Ja̱ yë'ta'a Jesús daima'në Juanpi si'a Israel pa̱ire Maija'quë coca quëapi.
Quëaquë capi,
ja̱'në cuasase'ere je̱oni Maija'quëna po̱nëjë'ë.
Po̱nëjëna,
oco doye pa'iji.
25 Casiquëpi je̱'në i̱ pani tëjiye ti̱'aquëna,
capi Juan:
‘Yë'ë mësaru cuasayeje̱ pa'i peoyë.
Yë'ë pa'isi jeteyo'je te'i jerepa pa'ipi daiji.
Ja̱ëre yë'ë i̱ zapato dutacaiyeque peoquëpi,
teaye pa'i a'ë.’
26 Ja̱je pa'iye sëte ë̱mëohua'i Maija'quë do'ijë Abraham tsëcapë acohua'i,
cui'ne mësaru ti̱ohua'i,
Maija'quëre ca'rajë i̱ yëyeje̱ pa'icohua'i,
iye huaso coca mësaru asa ja̱'ñere jëjo daose'e a'ë.
27 Jerusalén pa'icohua'i cui'ne i̱ohua'i ëjaohua'ije̱ Jesure huesëjë coa pa̱ije pa'ire ñahuë.
Ñajë cui'ne huajë mu'seña ñape pa̱i tsi'si huë'epi Maija'quëre quëacaicohua'i toyase'ere ñanije asa ti̱'añe pa̱huë.
Pa̱jë ja̱re i̱ohua'ipi Maija'quëre quëacaicohua'i case'ere yo'o ti̱'acaë'ë,
Jesure huani je̱o maca.
28 Jesús co'aye yo'ose'ere ti̱'ama'pëta'a Jesure huani je̱oñere Pilatopi soldado pa̱ina cua̱ñejaquë cajë se̱i'ë.
29 Ja̱ jeteyo'je yureta'a si'aye iye yo'o ja̱'ñere toyase'e cayere yo'o tëjini so̱quë sarahua dequëni casani yejana ta̱huë.
30 Ja̱je yo'osiquëta'are Maija'quëpi i̱te huajëquëre huëopi.
31 Huëosiquëpi Jesús jai so̱ mu'seña ñaiquë i̱ñopi,
i̱ ja̱'re co̱ni Galileapi Jerusalénna saina,
saisicohua'ire.
Yure ja̱ohua'ipi i̱ coca quëacohua'i pa'iyë.
32 Ja̱je pa'iye sëte yëquë mësarute de'o cocare quëayë,
mai aiohua'ire ca nëose'ere yo'o ti̱'api,
mai pa'i maca i̱ ca nëosi tsëcapë acohua'ina.
33 Ja̱ i̱ ca nëose'ere yo'o ti̱'aquë Jesure ju̱'isiquëni huajëquëre huëopi,
Maija'quëpi.
Salmos cayaye acore toyase'eje̱ pa'ye yo'opi.
Ja̱pi caji,
ñeje:
‘Më'ë yë'ë mamaquë a'ë.
Yurepi yë'ë më'ë ja'quë a'ë.’
34 Ja̱je pa'ina,
Maija'quë yequë hue̱'ña toyase'eja̱'a capi:
‘Davidre i̱sija̱'quë a'ë,
ca nëose'ere.
De'oyere pare nuñerepa ca nëose'ere i̱sija̱'quë a'ë,
më'ëre.’
Ja̱je pa'ina,
tsoe Maija'quëpi quëapi,
ju̱'isiquëpi huëi ja̱'ñe cui'ne i̱ ca̱pë ja̱'juñe pa̱ ja̱'ñe.
35 Ja̱je pa'ina,
yequë hue̱'ña toyase'e caji:
‘Më'ë jo'yaë de'oquërepa ca̱pë ja̱'ju huesëye më'ëpi ë̱seja̱'quë a'ë.’
36 De'oji,
yure ja̱je pa'iye sëte casi'i.
David cato Maija'quë i̱te cua̱ñese'eje̱ pa'ye i̱ pa̱ire necani tëjini ju̱ni huesëpi,
i̱ aiohua'i ju̱'ise'eje̱ pa'ye.
Ja̱je ju̱ni i̱ ca̱pë ja̱'ju huesëpi.
37 Ja̱je pa'iquëta'are ja̱ë,
Maija'quë huëosiquë Jesús ca̱pë cato ja̱'juñe pa̱pi.
38-39 Ja̱je pa'iye sëte mësaru Maija'quë do'ijëpi asaye pa'iji,
Jesuja̱'a co'aye yo'ose'e oni yeje cua̱ñoñe pa'iji,
cajë.
Ja̱je pa'ina,
si'aye Moisés cua̱ñese'e oni yejeye pa̱se'ere Jesure i̱re pare asacohua'ire oni yejeye pa'iji,
i̱tire pa'ë.
40 De'hua ñajë'ë,
mësaruna Maija'quëre quëacaicohua'i toyase'e to̱mequë i̱ohua'i toyase'e cato caji:
41 Nuñere pare ñajëta'a co'aji cajë coecohua'i,
ne huesëjë̱'ë.
Mësaru pa'i mu'seña yë'ëpi co'amañare nequëna,
Yecohua'ipi mësarute quëatoje̱ care payë cajë sehuocaiye pa̱ja'cohua'i a'ë.”
42 Judío pa̱i tsi'si huë'epi Pablo cui'ne i̱ cajeohua'i co̱ni etajëna,
tsi̱'nëna,
judío pa̱irepa peocohua'ipi cahuë:
Yequë semana huajë mu'se pa'ina,
cui'nare quëajë̱'ë,
yëquëre.
43 Ca tëjisi maca tsi'si huë'epi Pablo cui'ne Bernabé saijëna,
jai pa̱i judío pa̱ipi cui'ne judío pa̱i peocohua'ipi judío ye'yayena huero ye'yesicohua'ipi i̱ohua'i ja̱'re saë'ë.
Saijëna,
i̱ohua'ipi yëhuojë cahuë.
Nuñerepa Maija'quë mësarute oi soise'ere pa'ijë̱'ë,
yo'o jujama'pë.
44 Casicohua'ipi yequë semana huajë mu'se ti̱'aëna,
ja̱ daripë pa'icohua'ipi si'aohua'i tsi'siye ja'i maca jai pa̱i tsi'sihuë,
Maija'quë coca asañu'u cajë.
45 Tsi'sijëna,
ñani Israel pa̱ipi ë̱sejë oijë Pablo ai co'aquë api sa̱ñope ca huëohuë.
46 Cajëna,
Pablopi cui'ne Bernabépi quëcojë sa̱ñope cahuë,
i̱ohua'ire:
“Mësaru judío pa̱ini du'ru macarepa Maija'quë coca quëaye pa'iji.
Pa'isiconi mësarupi coejë cui'ne ti pani huesëyere paye cuasama'pëna,
yure cato judío pa̱i peocohua'ina sani quëaye pa'iji.
47 Ja̱je pa'ina,
Ëjaëpi yëquëre cua̱ñequë capi:
Si'a pa̱ire miacaija̱'quëre je̱oñë,
mësarute.
Yë'ë huaso cocare si'a hue̱'ña so'o pa'icohua'ire quëacaijë̱'ë.”
48 Ja̱je caquëna,
asani judío pa̱i peocohua'ipi sihuajë si'aohua'i Maija'quë coca ai de'oye a'ë,
cajë ti pani huesëyere ti̱'aja'cohua'i a'ë,
caquë ña nëosicohua'ipi sehuohuë.
49 Sehuojëna,
ja̱je Maija'quë coca quëahuë,
ja̱ yeja pa'icohua'ire.
50 Ja̱je sehuojëta'are judío pa̱ipi Pablore cui'ne Bernabére eto saoñu'u cajë,
de'o nomiohua'i ja̱'re cui'ne de'o ë̱mëohua'ire cui'ne i̱ti daripë ëjaohua'i ja̱'re coca cahuë,
sa̱ñope ja̱ohua'ire yo'oñu'u cajë cani sa̱ñope yo'ojë etohuë.
51 Etorena,
saijë i̱ohua'i nëcañoa ya'ore ti̱'to to̱huë,
ja̱ohua'i yo'oyere sa̱ñope cayere i̱ñojë.
Ja̱je yo'oni Iconiana saë'ë.
52 Ja̱je pa'iquëta'are i̱ti sehuosicohua'i cato sihuahuë,
de'o joyopi i̱ohua'i ja̱'re pa'ina.