Santiagore Huaiye Cui'ne Pedrore Coye
12
Ja̱ mu'seña pa̱i ëjaë Herodespi sehuosicohua'i acohua'ire jo̱sa yo'oquë,
2 Santiagore hua'tipi huani je̱ojë'ë cua̱ñeina,
huani je̱ohuë,
Juan maja'yëre.
3 Yo'orena,
judío pa̱ipi ñani sihuajëna,
Herodespi Pedroreje̱ tse̱ani copi,
sihuaja̱'cohua'i a'ë caquë.
Iye cato yo'opi,
levadura ne ma'ñe pan a̱ijë tsi'si maca.
4 Ja̱je yo'oquë Pedrore tse̱ani co hue̱'ñana copi,
cuatro tsëca soldado pa̱i ñajë nëca hue̱'ñana,
te'e tsëcapëre cuatro pa'iohua'i pa'i hue̱'ñana.
I̱ cato Egíptopi Maija'quë Israel pa̱ire etoquë pa'ise'ere cuasajë,
tsi'si tëjisi maca tse̱asiquëre etoni pa̱ire i̱ñosi'i cuasaquë yo'opi.
5 Ja̱je pa'ina,
Pedro cato tse̱a cua̱ñosiquëpi paji'i,
etama'quë cajë ña hue̱'ñare.
Ja̱je pa'itoje̱ sehuosicohua'i cato Maija'quëni se̱jë paë'ë,
si'a joyorepa cuasajë Pedroni cajë.
Pedro Cosiquëni Maija'quëpi Etoye
6 Herodes ñamina'a Pedrore etoni pa̱ire i̱ñosi'i cuasaquëna,
Pedro cato huëore ca̱ji'i,
caya soldado pa̱ina quë̱na mepi se sëasiquëpi jopore pare u̱i.
Ca̱ina,
yequë soldado pa̱ipi pa̱ire co huë'e eta sa'rore etama'quë cajë ñajë nëcahuë.
7 Ja̱je pa'i macarepa mai Ëjaë hui̱ñaë si'a co tu'rihuë mia merepa ñai nëcapi.
Ja̱ maca Pedrore pato sëtoni capi:
“Esa huëijë̱'ë.”
“Më'ë ca̱ña su̱ñajë'ë,
cui'ne zapatoje̱ su̱ñajë'ë.”
Caquëna,
yo'oquëna,
cui'ne yequeje̱ capi:
“Më'ë dëi ju'i ca̱je su̱ñani yë'ë ja̱'re daijë̱'ë.”
9 Caëna,
mai Ëjaë jëjo daoquë jeteyo'je dani etapi,
coa huesërepa.
Mai Ëjaë jëjo daoquëpi yo'oji,
cuasama'ë paji'i,
coa ca̱ni ñañë cuasaquëpi.
10 Cuasaquëta'a du'ru nëcajë ñacohua'ire sa tëto sani cayaye acohua'ire sa tëto sani yureta'a ma'ana eta hue̱'ñarepa acore ti̱'arena,
i̱ose'e hui'yo eta sa'ro hui'yona,
etani ma'aja'a te'e saë'ë.
Ja̱je co̱ni saiquëpi mai Ëjaë jëjo daoquëpi peo hue̱'ña saji'i,
te'ire je̱oni.
11 Je̱o saquëna,
yureta'a Pedropi capi:
“Yureta'a asayë,
Herodes ñamina'a yë'ëre yo'o ja̱'ñere cui'ne Israel pa̱i yë'ëre yo'oye yëyere Ëjaëpi asani i̱ hui̱ñaëre huasoja̱'quëre jëjo daopi.”
12 Ja̱je yo'ou cuasani Pedropi saji'i,
Juan pëca ja'co María huë'ena Juanpi yequë mamije Marcos hue'equë pëca ja'co quë'rona.
Ja̱rote jai pa̱i tsi'sicohua'ipi paë'ë,
Maija'quëni se̱jë.
13 Pa'ijëna,
Pedropi ma'a eta sa'rona ti̱'ani të'capi,
soiquë.
Soiquëna,
asani te'o nomi tsi̱o Rode i̱o mami hue'ecopi ¿nepi soiye'ni?
cuasani sani ñasi'i caco eta sa'ro quë'rona daco'ë.
14 Dani Pedro yë'ore asani sihuaco eta sa'ro hui'yocaima'o co'ye huë'huë cacao,
Pedropi eta sa'rore pa'iji quëasi'i caco.
15 Quëacona,
i̱ohua'ipi i̱ote cahuë:
“Cuepeco,
caco.”
Cajëna,
cao:
“Nuñerepa cayë.”
Cacona:
“Pedrore ñacaiquë ma'tëmo aquë pa'ini.”
16 Cajëna,
ja̱ yë'ta'a Pedropi të'caye je̱oma'ë paji'i.
Pa'ina,
hui'yoni i̱te ñani ai quëquëhuë.
17 Quëquëjëna,
jë̱tëpi cama'pë caquë yo'oni je̱orena,
i̱te co hue̱'ñapi etose'ere quëapi.
Quëaquë capi:
“Santiagore cui'ne yecohua'ire sehuosicohua'ire quëacaijë̱'ë,
yë'ëre etose'ere.”
Cani yequë hue̱'ñana saji'i.
18 Ñata to̱mesi maca Pedro peoquëna,
soldado pa̱i ai cuasajë huesëjë sa̱'ñe ai yo'ojë cahuë.
19 Yo'ojë cajëna,
Herodespi cua̱ñepi,
Pedrore co'ejë̱'ë caquë.
Cua̱ñeina,
co'e jujahuë.
Co'e jujarena,
de'oye ñajë'ë casicohua'ipi ñama'pë pa'isicohua'ire huani je̱ojë'ë,
cua̱ñepi.
Cua̱ñeina,
huani je̱ohuë,
soldado pa̱ire.
Ja̱je yo'osi jeteyo'je Herodes Judea pa'iye je̱oni Cesareana sani paji'i.
Herodes Ju̱'ise'e
20 Herodes Sidón pa̱ire cui'ne Tiro pa̱ire pë̱i paji'i.
Pa'ina,
i̱ohua'ipi pa̱i ëjaë Herodesre ca de'huañu'u,
cajë te'e.
Ja̱je yo'oñu'u cahuë.
Casicohua'ipi i̱ quë̱no macarepa co̱cai pa'iquë Blasto hue'equëna cajeohua'i de'ohuë.
De'oni ja̱ëja'a se̱i'ë,
Herodesre de'oye pë̱ima'ëna,
pa'iyere.
Tiro cui'ne Sidón pa̱i cato Herodes yejana a̱o huerocohua'i paë'ë.
Ja̱je pa'ina,
ja̱je yo'ohuë.
21 Ja̱je yo'osicohua'ini yequë mu'se Herodespi capi,
ja̱ mu'se pa̱i tsi'siye pa'iji,
caëna,
tsi'sirena,
de'o ca̱ñarepa su̱ñasiquëpi i̱ ñu'i pa̱ire cua̱ñe hue̱'ñana ja'runi cocare capi,
pa̱ire.
22 Caquëna,
asacohua'ipi tutu cuihuë.
Ñeje cajë:
“Maija'quëpi caji,
pa̱ipi caye pa̱ji.”
23 Cajëna,
Ëjaë hui̱ñaëre jëjo daoquëpi ju̱'iñe nepi,
i̱te,
ja̱re i̱ti yo'ojë ca macapi.
Neina,
pecona a̱o ju̱ji'i.
Maija'quëre jerepa pa'ipi cacaima' do'ire ju̱ji'i,
i̱ja'a co'ye Maija'quëje̱ pa'i a'ë caquë sihuaquë asa do'ire.
24 Ja̱je yo'ojë pa'ijëna,
Maija'quë coca cato jerepa jai saji'i.
Jai saina,
si'a hue̱'ña i̱ti cocare quëahuë.
25 Bernabé cui'ne Saulo co'amaña ne tëjini Jerusalénpi co'ijë Juanreje̱ dahuë,
yequë mami Marcos hue'equëreje̱.