3 Cajë i̱te se̱i'ë:

“¿Me yo'oquë Israel pa̱i peocohua'i huë'ena cacani i̱ohua'i ja̱'re co̱ni a̱i yo'o u'ni?”

4 Cajëna,

Pedropi si'aye i̱te du'ru macarepa huëoni yo'ose'eje̱ pa'ye ja̱ohua'ire quëapi:

5 “Jope daripëre pa'i Maija'quëre se̱i ca̱ni ñañeje pa'ye ñahuë.

Ñaquëna,

ma'tëmopi jai ca̱'tipëje̱ pa'iona,

ayasi tu'ure cajese'e si̱capë̱a que̱'quesicona,

yë'ë quë'rona casaëna,

ñahuë.

6 Ayasi tu'ure ñaquëna,

si'aohua'i nëicohua'i,

a̱ñaje pa'iohua'i coti saihuëpi cu'icohua'i,

cui'ne ja'jëcohua'i paë'ë.

7 Pa'ijëna,

yë'ëre yë'ose'e jutapi:

‘Pedro huëijë̱'ë.

Huëni huani a̱ijë'ë,’

capi.

8 Caquëna,

cahuë:

‘Pa̱si'i,

Ëjaë.

A̲i ma'ñe a'ë.

Si'si a'ë.

Si'siohua'ire yë'ë ti a̱ima'quë a'ë,’

cahuë.

9 Caquëna,

ti̱jupë yë'ose'e yë'ëre juta co̱pi:

‘Maija'quë tsoa to̱se'ere si'si a'ë cama'ë pa'ijë̱'ë,’

capi.

10 Ja̱je toaso̱ñe Maija'quë cui'ne pa'ye capi.

Ca tëjina,

ayasi tu'upi ma'tëmona mëni huesëo.

11 Ja̱ macarepa toaso̱ ë̱mëohua'i Cesarea yejapi jëjo daosicohua'ipi yë'ëre co'ecohua'ipi yë'ë pa'i huë'ena ti̱tahuë.

12 Ti̱tarena,

Maija'quë joyopi yë'ëre cua̱ñepi:

‘I̱ohua'i ja̱'re co̱ni saijë̱'ë,’

caquë ‘ai cuasama'ë,’

capi.

Caëna,

asani saë'ë,

icohua'i seis sehuosicohua'i ja̱'re co̱ni.

Sani si'aohua'i pa'i huë'ena cacahuë.

13 Cacarena,

Maija'quë jëjo daoquëre i̱ huë'ena ñase'ere cui'ne ñaquëna,

i̱ case'ere quëapi.

Jopena më'ë jo'yare jëjo saojë̱'ë,

Simón Pedro hue'equëre daja̱'cohua'ire.

14 Ja̱ëpi dani huaso coca quëaquëna,

asani më'ë cui'ne më tsëcapë huasosicohua'i pa'ija̱'cohua'i a'ë capi,

quëapi.

15 Quëaquëna,

asani yë'ëpi cocare quëa huëoquëna,

de'o joyopi i̱ohua'ina daji'i,

maire du'ru macarepa daise'eje̱ pa'ye.

16 Ja̱ maca mai Ëjaërepa case'ere cuasahuë,

‘Juan cato ocopi dopi.

Ja̱je pa'iquëta'are mësaru cato de'o joyore i̱si cua̱ñoja'cohua'i a'ë.’

17 Ja̱je pa'ina,

Maija'quëpi maire Ëjaë Jesucristore sehuocohua'ire i̱sise'eje̱ pa'ye i̱siru,

¿me sa̱ñope Maija'quë yo'o ma'ñe a'ë caye'ni?”

Capi,

Pedro.

18 Caquëna,

asani Jerusalén acohua'i sehuosicohua'ipi sa̱ñope caye je̱oni Maija'quë ai de'oyerepa yo'oji,

cajë cahuë:

“Ja̱je yo'oquë judío pa̱i peocohua'ire i̱siji,

i̱te sehuoni ti pani huesëye ti̱'añe.”

19 Estebanre huani je̱osi jeteyo'je Jesure sehuocohua'ire jo̱sa yo'o huëohuë.

Jo̱sa yo'o huëorena,

yecohua'ipi Feniciana,

Chipre saodohuëna,

cui'ne Antioquía daripëna cati saë'ë.

Saisicohua'ipi ja̱rona Israel pa̱ise'ere Maija'quë coca quëahuë.

Yequë pa̱ireta'a quëaye pa̱huë.

20 Pa̱jëta'are Chipre cui'ne Cirene quë'ro acohua'i sehuosicohua'ipi Antioquía daripëna ti̱'ani griego pa̱ire mai Ëjaë Jesús de'o cocare quëahuë,

judío pa̱i peocohua'ina.

21 Mai Ëjaë i̱ohua'i ja̱'re co̱ni pa'ina,

de'oye quëajëna,

jai pa̱i ja̱'në i̱tire pa'ë cuasase'e je̱oni Ëjaë Jesuna sehuohuë.

22 Ja̱je yo'ojëna,

sehuosicohua'i Jerusalén pa'icohua'ipi asani Bernabére Antioquía daripëna jëjo saohuë.

23 Jëjo saorena,

Bernabépi ti̱'ani Maija'quëre sehuosicohua'ire Maija'quë de'oye yo'ocaiyere ñapi.

Ñani ai sihuapi.

Sihuaquë Bernabé yëhuopi,

de'oyerepa.

Ti je̱oma'pë tuijë mai Ëjaërepa case'eje̱,

caquë yëhuopi.

24 Bernabé cato ai de'oquë paji'i.

Maija'quëre ai cuasaquëpi cui'ne de'o joyo ti̱mësiquëpi paji'i.

Ja̱je pa'ipi yëhuoquëna,

asani jai pa̱i sehuohuë,

mai Ëjaë case'ere.

25 Ja̱ jeteyo'je Bernabépi Saulore co'esi'i caquë Tarso daripëna saji'i.

26 Sani ti̱'ani i̱te Antioquía daripëna sapi.

Sani ja̱rona te'e o̱metëcahuë pëahuë,

sehuosicohua'i ja̱'re co̱ni.

Pëani pa'ijë jai pa̱ire ye'yahuë.

Ja̱rona Antioquía daripëna du'ru macarepa Cristiano hue'yohuë,

sehuosicohua'ire.

27 Ja̱ mu'seña Antioquíana ti̱tahuë,

Maija'quëre quëacaicohua'ipi Jerusalén daicohua'ipi.

28 Ti̱tasicohua'i aquëpi Agabo hue'equëpi nëcaquë capi,

de'o joyopi quëaquëna,

yequë mu'seña pa'i ja̱'ñere.

Yequë mu'seña si'a hue̱'ña a̱iñe peoquëna,

pa̱i a̱i ëa ju̱'ija'cohua'i a'ë.

Ja̱je tëto saji'i,

Claudio César pa̱i ëjaërepa pa'i maca.

29 Ja̱je caëna,

asani Antioquía sehuosicohua'ipi Judea sehuosicohua'ire co̱cai ja̱'ñere i̱sini jëjo saoñu'u cahuë,

pa̱i ñape cuasaye ja'ye.

30 Cani i̱sini yureta'a i̱ti i̱sise'ere jëjo saohuë,

Bernabé cui'ne Saulo ja̱'re sehuosicohua'i aiohua'ina Judeana.