2 naꞌntza ju tyol axix toc xi ttziyan teya, aya Tdios Jacob nim tipumala.

3 Mlay chin ocxe tuj njaye ex mlay chin cub coẍeꞌye ojlal;

4 mlayx cub nmaltzꞌuꞌne nwitze ex mlay chin icꞌ tane jun rat,

5 ka naꞌnxtok tbant jun tnajbil Kman wuꞌne, aju Tdios Jacob at nim tipumal, chi David tma.

6 Tuj Efrata o kbiye tkanil tiꞌj cax cꞌubl tley Dios, ex o cnet kuꞌne tuj cojbil te tnam Jaar.

7 Koꞌke tuj lugar jatum taꞌ tnajbil Dios ex ko ẍmejeꞌc twitz tkꞌukbil.

8 Weꞌctza Nman tucꞌix tcaxa at nim tipumal ex tzaja tuj lugar jatum tuꞌn tcub tena te jumajx.

9 Ke pal in che ajben teya, cucxwit che bet tuj tumel, ex cucxwit che schꞌin tuꞌn tzalajbil ke ocslal tiꞌja.

10 Nok tuꞌn tlaj ju yol xi ttziyana te David aju tmajena, miꞌn tzꞌel ticꞌuna ju rey scꞌoꞌmaj tuꞌna.

11 Xi ttziyan Kman jun yol axix toc te David ex mlay chꞌexpet tuꞌn, porque tma cyjaꞌ: Ax jun tcꞌwaꞌla cꞌoquel nkꞌoꞌne te rey te t-xela.

12 Ka ma japun cyuꞌn ke tcꞌwaꞌla aju yol cyaj bant tiꞌj wuꞌne tucꞌila, ex ka ma che japun ke nmandamyente cyuꞌn, akeju cxel nxnakꞌtzaꞌne cye, icx ke cycꞌwaꞌl che oquel te rey te t-xela te jumajx.

13 Aju witz Sión ax Kman jaw scꞌonte. Jaw t-scꞌoꞌn tuꞌn tajben te tnajbil.

14 Chi Kman tma: Atzun witz lu jatum waje tuꞌn ntene te jumajx; chin tele tzalu porque ictzun wajbile.

15 Che bel ncyꞌiwlaꞌne ke xjal tuꞌn tchmet nim cywa ex cnojel cycꞌuꞌj ke meba xjal wuꞌne.

16 Che bel ncyꞌiwlaꞌne ke pal tuj tcyakilju cyajbebl, ex che bitzal ke ocslal tuꞌn tzalajbil.

17 Tzul itzꞌj jun colol wuꞌne cyxol ke tiyjil David aju scꞌoꞌmaj wuꞌne, ex cucx ctel jun tcꞌwaꞌl te rey ic tzaꞌn jun candil mintiꞌ in yupj.

18 Ke aj kꞌoj tiꞌj David cbel nim cychꞌixwi wuꞌne, atzun te David cxel nkꞌoꞌne tajwalil.