Ndibe Dévidi
14
Hiramu, bụ eze ndu Taya bya eye ndu ozhi iya tẹ whẹ jee ibe Dévidi. Ọ nụ whẹ oshi sida, yeru whẹ iya ndu l'edo ụlo mẹe ndu kapịnta tẹ whẹ bya atụaru Dévidi ụlo. 2 Dévidi bya amarụ lẹ Onye-Nwe-Ọha bẹ mewaru t'abụbu ono, ya bụ eze ndu Ízurẹlu kpọru g'ọo abara, ọ makwarụwho lẹ Onye-Nwe-Ọha bẹ gudewaa iswi ndu nkiya ono, bụ ndu Ízurẹlu kutsewaa alị-eze iya ekutse.3 Tọ dụ iya bụ, Dévidi bya alụshibaa igwe nwanyị lẹ Jerúsalẹmu, bya anwụshibaa ụnwu, unwoke mẹe ụnwanyi. 4 Ọ waa ẹwha ụnwegirima, ọ nwụshiru lẹ Jerúsalẹmu ndọwa: Shamuwa, Shobabu, Nétanu, Sólomọnu, 5 Ibuha, Elishuwa, Elipeletu, 6 Noga, Nefegu, Jafiya, 7 Elishama, Beliyada ọwaa Elifẹletu.
Dévidi l'alwụ-gbu ndu Fílistiya
8 O be nteke ndu Fílistiya nụru l'a wụwaru Dévidi mmanụ l'ishi t'ọ bụru eze ndu Ízurẹlu l'owhu, whẹ wulihu gẹ whẹ ha jeshia ọcho ụzo whẹ l'e-shi kpawhua Dévidi ishi. Dévidi nụa ya bya ejekfushia whẹ. 9 Nteke ono bẹ ndu Fílistiya byawaru bya egwoo tụtua lẹ nsụda Refayimu. 10 Dévidi kwee bya ejekfu Chileke njịta sụ: “?Ọo tẹ mu jekfu ndu Fílistiya ọgu? ?Ịi-chịru whẹ ye mu l'ẹka?”
Onye-Nwe-Ọha yeru iya ọnu sụ iya: “Ee jero ya lẹ mu l'a-chịru-a ndu Fílistiya ye ghu l'ẹka.”
11 Ọo ya bụ, Dévidi bya ejeshia mkpụkpu Bálu-perazimu je alwụ-gbua whẹ l'ẹka ono. Ọ sụ; “Ọo lẹge ukporo-mini l'ekpoje bụ gẹ Chileke shiwa l'ẹka mu kpota ndu ọhogu mu whẹ.” Ọo ya meru; a gụa ẹka ono Bálu-perazimu. 12 Ndu Fílistiya gbaghashịa ọgvu whẹ l'ẹka ono; Dévidi tụa iwu t'a nwụru ọku ye iya.
13 Ndu Fílistiya nọnyakwa bya egwoo tụtua lẹ nsụda ono ọdo. 14 Dévidi byakwa ajịa Chileke gẹ l'ọojije iya, Chileke sụ iya: “Be eshikwa whẹ atatiwhu nhamụnha, shichia okotazụ gbaa whẹ mgburumgburu l'iwhu ẹka ono, oshi balusamu gvugeeru lwụshi whẹ ọgu. 15 Unu bebelewho anụ ụda iwhe l'ada g'ọo igidi ọkpa l'eli oshi balusamu ono, unu emekebe garagara nkele ọo nteke ono bẹ Chileke vutaru unu ụzo t'unu je egbugbushia ndu ojọgu ndu Fílistiya” 16 O noo ya, Dévidi melewho lẹ gẹ Chileke zhiru iya. O shi lẹ mkpụkpu Gibyiyọnu gbuzhia whẹ whọ mkpụrudumulanu jasu lẹ mkpụkpu Gaza. 17 Ude Dévidi degbakota mgboko l'owhu. Onye-Nwe-Ọha mee mba gẹ mba ha; whẹ l'atsụkota iya egvu.