Aakwakọbe t'a pafụ igbe-ọgbandzu Chileke l'ibe Óbẹdu-edọmu
15
Dévidi bya atụshiaru onwiya ụlo lẹ mkpụkpu Dévidi, o dozhia ẹka igbe-ọgbandzu Chileke l'a-dụ bya akpọberu iya ụlo-ẹkwa. 2 Tọ dụ iya, bụ Dévidi sụ: “Ọ tọ dụdu onye ọdo bya l'a-pa igbe-ọgbandzu Chileke ono, gbahaa ẹpa Lívayi. O noo nkele ọo whẹ bẹ Onye-Nwe-Ọha họtaru tẹ whẹ pajẹ igbe-ọgbandzu Onye-Nwe-Ọha ono, bya ahọta whẹ tẹ whẹ l'ejeru iya ozhi jeye lẹ gbururu.”3 Dévidi bya ekukobe ndu Ízurẹlu gẹ whẹ ha lẹ Jerúsalẹmu tẹ whẹ je apata igbe-ọgbandzu Onye-Nwe-Ọha ono bya edobe l'ẹka ọ kwakọberu iya t'ọ dụ. 4 O kukobe ẹpa Érọnu mẹe ikfu Lívayi. 5 Ẹpa Kohatu, o kuru bẹ dụkota ụkporo ụmadzu ugbo ishii. Ọ bụru Yuriyẹlu bụ onye ishi whẹ. 6 Ẹpa nke Merari bẹ dụkota ụkporo ụmadzu ugbo iri lẹ nnanụ. Ọ bụru Ayizáya bụ onye ishi whẹ. 7 Ẹpa nke Gẹshonu bẹ dụkota ụkporo ugbo ishii l'ụmadzu iri. Ọ bụru Jowelu bụ onye ishi whẹ. 8 Ẹpa nke Elízafanu bẹ dụkota ụkporo ụmadzu ugbo iri. Ọ bụru Shemaya bụ onye ishi whẹ. 9 Ẹpa nke Hiburọnu bẹ dụkota ụkporo ụmadzu ugbo eno. Ọ bụru Eliyẹlu bụ onye ishi whẹ. 10 Ẹpa nke Úziyẹlu bẹ dụkota ụkporo ugbo ise l'ụmadzu iri l'ẹbo. Ọ bụru Amínadabu bụ onye ishi whẹ.
11 Dévidi kua Zédọku yẹle Abyata, bụ ndu l'agbajẹ ẹja nụ Chileke, bya ekua Yuriyẹlu kua Ayizáya kua Jowelu kua Shemaya kua Eliyẹlu kua Amínadabu, bụ ndu Lívayi. 12 Ọ sụ whẹ: “Ọo unubẹdua bụ ndu ishi l'ẹnya-uwhu ibe nna unu l'ikfu Lívayi. Unu je edobe onwunu nsọ, unu l'unwune unu nke ọwhu unu l'a-pata igbe-ọgbandzu Onye-Nwe-Ọha, bụ Chileke nke Ízurẹlu bya edobe l'ẹka mu kwakọberu iya t'ọ dụ. 13 Iwhe meru g'o gude Onye-Nwe-Ọha, bụ Chileke anyi mee anyi emerekete whọ, o meru anyi lẹ nke mbụ whọ bẹ bụ l'unubẹdua te etsodu je apata iya, nkele anyi te evudu ụzo jịa ya t'ọ karụ anyi gẹ bụ anyi -mee ya, ya adụ iya mma.”
14 Ọo ya bụ, ndu l'agbajẹ ẹja nụ Chileke ono, mẹe ndu eri Lívayi ono bya edobe onwowhe nsọ, nke ọwhu whẹ l'e-je apata igbe-ọgbandzu Onye-Nwe-Ọha, bụ Chileke nke Ízurẹlu ono. 15 Ndu eri Lívayi bya atukobe mkpara, e gude apa igbe-ọgbandzu ono l'ukuvu gude parụ iya bụ iya bụ gẹ Mósisu tụru l'iwu, lẹge Onye-Nwe-Ọha sụru Mósisu t'o mee ya.
16 Dévidi sụkwawho ndu ishi ndu ikfu Lívayi tẹ whẹ tụa ẹka l'ụnwunna whẹ, bụ ndu l'a-nọ agụ egvu. Tẹ ndu ọbu gude ngwa-egvu, mbụ une, mẹe ogumogu, mẹe ogele gụje egvu ọbu. 17 Ọo ya bụ, ndu Lívayi bya atụa Hemanu nwa Jowelu ẹka mẹe Asafu nwa Berekaya, bụ onye lanụ l'ụnwunna iya mẹe Etanu nwa Kushaya, bụ ẹpa Merari. 18 Ụnwunna whẹ ọdo, whẹ họtaru tsobe whẹ bụ Zakaráya, Jaziyẹlu, Shemiramotu, Jehiyẹlu, Uni, Eliyabu, Benaya, Maseya, Matitiya, Elifelehu, Mikuneya, Óbẹdu-edọmu ọwaa Jeyẹlu, bụ ndu nche ọnuzo. 19 Ndu ono l'agụ egvu agụgu bụ iya bụ Hemanu mẹe Asafu mẹe Etanu bẹ l'anọje akụ ogele, e meru l'ope. 20 Ọwhube Zakaráya, Aziyẹlu, Shemiramotu, Jehiyẹlu, Uni, Eliyabu, Maseya ọwaa Benaya l'a-nọ akpọ ogumogu t'ọ dajẹ gengu-gengu.
21 Matitiya, Elifelehu, Mikuneya, Óbẹdu-edọmu, Jeyẹlu ọwaa Azazíya akpọ une t'ọ dajẹ zhịnguzhingu.
22 Kenaniya, onye ishi-egvu ndu Lívayi bẹ bụ iya l'a-nọ l'edu l'egvu ono, nkele o doru iya ẹnya.
23 Berekaya yẹle Ẹ́lukana l'a-bụru ndu nche ọnu ẹka igbe-ọgbandzu ono dụ.
24 Shebanaya, Joshafatu, Netanẹlu, Amasayi, Zakaráya, Benaya ọwaa Eliyéza bẹ bụ whẹ l'e-gbuje opyi-ọku l'atatiwhu igbe-ọgbandzu Chileke ono. Whẹbedua bụkota ndu l'agbajẹ ẹja nụ Chileke l'ẹhu l'ẹhu. Ndu ọdo, l'a-bụfua ndu nche ọnu ẹka igbe-ọgbandzu ono dụ bụ Óbẹdu-edọmu yẹle Jehiya.
Aapafụta igbe-ọgbandzu Chileke
25 Ọo ya bụ, Dévidi mẹe ndu bụ ọgurenya ndu Ízurẹlu, mẹe ndu ishi ụnu ndu ojọgu ugbo labọ l'ụkporo iri wụbe jeshia ọpata igbe-ọgbandzu Onye-Nwe-Ọha ono l'ibe Óbẹdu-edọmu. Ẹswa ria whẹ ẹfonu. 26 Whẹ gbua oke-eswi ẹsaa mẹe ebyila ẹsaa nkele Chileke bẹ yeru ndu Lívayi ono, pa igbe-ọgbandzu Onye-Nwe-Ọha ono ẹka. 27 Dévidi yeru uwe-mkpẹelanu, l'acha ụcha; o nokwawho gẹ whẹ yeru, mbụ iwhe bụ ndu Lívayi ono, l'apa igbe-ọgbandzu ono mẹe ndu egvu mẹe Kenaniya, bụ onye ishi-egvu ono. Dévidi weru ifọdu ọcha. 28 O noo ya, ndu Ízurẹlu l'owhu yeko ẹka vulia igbe-ọgbandzu Onye-Nwe-Ọha ono, whẹ l'atụ orooroo etso iya, awhụ opu, egbu opyi-ọku, akụ nkwa, bya egude ogumogu mẹe une azụ egvu.
29 G'igbe-ọgbandzu Onye-Nwe-Ọha ono rwuru mkpụkpu Dévidi bẹ ada Sọlu, ẹwha iya bụ Mikalu pyofuru ẹnya lẹ windo lee ẹnya, bya awhụ eze Dévidi gẹ l'oote aswachashi, ọ dụ iya nde l'ẹnya.