Ejo ikumu, Abụsalomu gbarụ Dévidi
15
Tọ dụ iya bụ, e megee, Abụsalomu bya emetaru onwiya ụgbo-ịnya, nweru ịnya agbagba mẹe ụkporo unwoke labọ l'unwoke iri, bụ ndu l'evutajeru iya ụzo mẹ o nweru ẹka l'ooje. 2 L'ọobuje, o rwua l'ishi ụtsu, Abụsalomu agbashi je akfụru l'agụga echi ụzo, lẹ mgboro ẹka l'eeshije bahụ l'ime mkpụkpu ono. Nteke bụ l'o nweru onye l'eje oku madzụ ikpe l'ibe eze, Abụsalomu ekua ya jị iya sụ: “?Ọo mkpụkpu awe b'i shi?” Ya asụ iya: “Nwozhi ghu shikwa ikfu lanụ l'ikfu ndu Ízurẹlu.” 3 Onye ọbu kfulewho nno, Abụsalomu asụ iya: “Iwhe i kfuru dụ ree, bụru iwhe kfụru nhamụnha. Obekwanu l'o to nwedu onye l'e-kwe eze onye ẹbo kpeshiaru unu iwhe l'adarụ unu.” 4 Iwhe ọdo, Abụsalomu l'ekfuje bụ: “Nggẹle ọ dụ g'e shi, ọ bụru mu b'a họtaru tẹ mu bụru onye ikpe l'alị-a. Ọ -bụ l'ọ dụ nno mẹ iwhe bụ onye wotaru mu okfu m'ọ bụ onye bya echia mu ichi, bẹ mu gege ekpejeru ikpe, kfụru nhamụnha.” 5 O nokwawho gẹ l'ọobuje, o nweru onye byakfutaru iya tẹ ya bua iwhu l'alị kele iya ekele, ya egbeenu rwụkota onye ọbu tsutsua ya ọnu. 6 O noo gẹ Abụsalomu shi emeje iwhe bụ ndu Ízurẹlu, gude ikpe abya ibe eze. O shi nno mee, ọ bụru yẹbedua bẹ ndu Ízurẹlu yeru obu.7 Awha ẹno ghatalẹwho, Abụsalomu sụ eze: “Byiko; mu l'aryọ ghu t'ị hanụa tẹ mu jee mkpụkpu Hiburọnu je emedzua ụkwa, mu kweru Onye-Nwe-Ọha. 8 O noo lẹ nteke ono, mụbe nwozhi ghu nọkwadu lẹ mkpụkpu Geshuru, dụ l'alị ndu Arámu bẹ mu kweru ụkwa sụ: ‘Onye-Nwe-Ọha -mezhiwa, mu lwawhu azụ lẹ Jerúsalẹmu bẹ mu l'e-je abaarụ Onye-Nwe-Ọha ẹja.’ ”
9 Eze sụ iya: “Jekwaa guu.” O noo ya, ọ bụru iya oje Hiburọnu. 10 Abụsalomu bya ezhifu ndu ozhi, l'e-je anọdu lẹ mpya l'ikfu g'ikfu ha lẹ Ízurẹlu sụ whẹ: “Unu -bebe anụ ụda opyi-ọku, t'unu ryashịa sụje: ‘Abụsalomu bụ eze lẹ Hiburọnu.’ ” 11 Ndu whẹ lẹ Abụsalomu shi lẹ Jerúsalẹmu lịru l'ije ono dụ ụkporo unwoke ugbo iri. Ndu ono bẹ nọdu ọnodu ndu e kuru oku, dụ iche tẹ whẹ bya. Whẹ gude obu gụru iwhoro jeshia lẹ ba ama iwhe l'akọ nụ. 12 Abụsalomu gude ngwo-ẹja ono l'ẹka egwo, o zhi t'e kuaru iya Ahitofẹlu, onye mkpụkpu Gilo t'ọ bya. Ahitofẹlu ono bẹ bụ onye l'agbazhijeru Dévidi égò. O noo ya, ejo ikumu ono, l'aagbarụ Dévidi l'asọ nyabanyaba, ndu l'awụ awụ-kfuta Abụsalomu l'aka shii aka eje eje.
Dévidi chịtaru ndibe iya ye ọkpa l'ọso
13 Ọ bya enweru nwozhi ọbu, gbarụ nụ bya asụ Dévidi sụ iya: “?Ị marụ-a l'obu ndu Ízurẹlu lile nọwaa lẹ Abụsalomu?”
14 Dévidi bya ekfuru yeru ndu ozhi iya gẹ whẹ ha, bụ ndu whẹ l'iya nọkota lẹ Jerúsalẹmu sụ whẹ: “Unu wụ-lihukwa t'anyi gbalashịa ntaa, ọ -dụa b'o to nwekwa onye bya l'a-nahụ Abụsalomu. Unu mekebe ẹgwegwa t'anyi tụgbua, a nọnyaanu ọ fụ-kfuta anyi lẹ nzirizẹhu l'ẹka-a bya emee anyi ejo-iwhe, gude ogu-ịgba gbugbushia ndu mkpụkpu-a.”
15 Ndu ozhi eze tụko sụ iya: “Iwhe gụbe onye-nwe-anyi, bụ eze sụru t'anyi mee bẹ anyịbe ndu ozhi ghu l'e-mekota iya jịa ya ọgvu.” 16 Ọo ya bụ, eze tụgbua, ndibe iya l'owhu tsoru iya. Eze bya ahaa ụmadzu iri, bụ ụnwanyi, l'ẹte ọlua l'ọkpoku nwanyị tẹ whẹ leta uwhu.
17 Eze tụgbua mẹe ndu whẹ l'iya lị, whẹ jetabe rwua l'uwhu ikpazụ, dụ lẹ mkpụkpu ono, whẹ kpọo beru. 18 Ndu ozhi iya bya awụghakota iya, mbụ ndu Keretu mẹe ndu Peletu mẹe ụnu madzụ l'ụkporo madzụ ugbo iri ono, shi lẹ mkpụkpu Gatu tsoru iya. Whẹ ghata eze vuta ụzo. 19 Tọ dụ iya bụ, eze bya aghachi l'ẹka Itayi onye Gatu nọ sụ iya: “?Ndẹe g'o gude i tsoru anyi? Dawhukwa azụ lakfu eze, bụ Abụsalomu. Nkele ị bụ onye ọha ọdo, bya abụru onye l'agba ọso ọgu l'ibe unu. 20 Lẹ gụbe onye byaworua ụnyawhu, ?ndẹe gẹ mu l'e-shi mee t'ị bya etsoru anyi aghawhe ririri-a l'ẹka l'abụkwaanu lẹ mu marụ ẹka anyi cheberu echebe. Chịta ndibe unu dawhu azụ. Tẹ Onye-Nwe-Ọha goshikwa lẹ ya yeru ghu obu, bya abụru o-me-g'o-kfuru.”
21 Ọo ya bụ, Itayi gbeenu sụ eze: “Onye-Nwe-Ọha vuru-a ishi iya g'o vu iya, gụbe onye-nwe-mu nụ, bụ eze vuru-a ishi ghu g'i vu iya, ọo ẹka gụbe onye-nwe-mu nụ, bụ eze cheberu bẹ mụbe nwozhi ghu l'e-chebe, m'ọ bụ anwụhu bẹ l'iije anwụhu, m'ọ bụ ndzụ bẹ l'iije anọno.”
22 Dévidi sụ Itayi sụ iya: “Ngwa ghata vuta ụzo tụgbua.” Ọo ya bụ, Itayi onye Gatu bya aghata mẹe ndu whẹ l'iya tso, ọwaa ụnwegirima, whẹ chị. 23 O noo ya, ụzu ẹkwa tụ l'alị ono gẹ ndu ono tụkoru l'awụghashi. Eze yẹle ndu ono, whẹ l'iya lị je aghajaa ọnu-iyi Kidirọnu, whẹ wụghata chebe ụzo echi-ẹgu ẹka ono.
24 Abyata bya bya aghata; Zédọku ghatakwawhọ mẹe ndu ọgbo Lívayi whẹ, pa igbe-ọgbandzu Chileke. Whẹ bya apazeta igbe-ọgbandzu Chileke ono dobe l'alị jeye nteke ndu ono tụkoru wụfutakota lẹ mkpụkpu ono. 25 Eze bya asụ Zédọku: “Pawhu igbe-ọgbandzu Chileke ono azụ lẹ mkpụkpu. Ọ -bụruwho lẹ mu dụ Onye-Nwe-Ọha l'obu bẹ l'oo-dulatawhu mu-a azụ, mu awhụ igbe-ọgbandzu Chileke ono ẹnya, whụkwawho ẹka ono, l'ọoduje. 26 Nteke bụ l'ẹhu ta atsọdu Chileke ụtso l'ẹka mu nọ, t'o mele mu whọ gẹ dụ iya ree.” 27 Eze sụkwawho onye ono, l'agbajẹ ẹja nụ Chileke, bụ Zédọku sụ iya: “Leeduwho, tụgbua dawhu azụ lẹ mkpụkpu l'ẹhu-guu, gụ lẹ nwa ghu, bụ Ahimaazu mẹe Jonatanu nwa Abyata. 28 Mu l'a-kpọ ụkfu l'ọkpa ẹnyimu Jọ́danu, ibe iya ọwhu l'eerwuje erwu l'ụzo echi-ẹgu, gude ngabẹ t'unu wolataru mu ozhi.” 29 O noo ya, Zédọku yẹle Abyata pata igbe-ọgbandzu Chileke ono dawhushia azụ lẹ Jerúsalẹmu je anọ-kirishia l'ẹka ono.
30 Dévidi tụgbuleru-a g'ọ tụgburu arya ẹkwa eje enyikota eli ugvu Ólivu. Dévidi kwebe iwhe l'ishi gbarụ ọkpa ọto eje. O noo gẹ ndu l'etso iya nụ kwechishikwaruwho iwhe l'ishi awụ etso iya, arya ẹkwa echi ụzo echi ụzo. 31 A bya ekfuaru Dévidi sụ iya: “Ahitofẹlu bẹ tsokwa Abụsalomu gbaa ejo ikumu ono.” O noo g'o gude Dévidi kfuru nụ Chileke sụ: “Byiko Onye-Nwe-Ọha, menua tẹ mgbazhi ono, Ahitofẹlu gbazhiru bụru iwhe eswe.”
32 O noo ya, Dévidi nyirwulewho ọnunu swọngu-swọngu ugvu ono, bụ ẹka l'aabajẹru Chileke ẹja, lekwa Hushayi, bụ onye Akụ g'ọ byarụ tẹ ya gbata Dévidi ndzuta, uwe iya gbajashịhu agbakashịhu, ntụ wukoru iya l'ishi. 33 Dévidi sụ iya: “I -tsowaru mu bẹ l'ịi-bụkwa ivu ẹrwa dụru mu. 34 Ọ ka ree t'ị dawhushia azụ lẹ Jerúsalẹmu je asụ Abụsalomu l'ịi-bụ nwozhi nkiya, l'i shihaakwa bụru nwozhi nna iya Dévidi nteke mbụ, ọle nta-a bẹ l'ịi-bụ nwozhi nkiya. Sụ, ọo ya bụ nteke ono gụ eyeru mu ẹka chibyishiaru iya ejo idzu ono, Ahitofẹlu l'achị. 35 Zédọku yẹle Abyata, bụ ndu l'agbajẹ ẹja nụ Chileke bẹ gụ lẹ whẹ l'a-tụkonu-a nọdu l'ẹka ono. Gụ ekfukotaru whẹ iwhe lile, ị nụtaru l'ibe eze. 36 Ụnwu whẹ whẹ labọ, mbụ Ahimaazu nwa Zédọku yẹle Jonatanu nwa Abyata bẹ whẹ lẹ whẹ nọduanaa l'ẹka ono. Gụ ezhia whẹ tẹ whẹ bya ekfuru mu iwhe ị nụtaru.”
37 O noo ya, erwurwu, ọnya Dévidi, bu Hushayi l'erwu Jerúsalẹmu, ọwhube Abụsalomu l'abatalẹwho abata l'ime mkpụkpu.