Jesus kaa utinaakinuut
Matthew 26:47-56; Mark 14:43-50; Luke 22:47-53
18
1 Iishpih Jesus kaa chiish ayimihaat ayimihaawiniyiu aakw kaa chistuhtaach uchischinihamuwaakinh aa wiichaaukut. Aakw kaah aashuuskihch aniyaayiu siipiisiyiu kitrwaan kaa ishinihkaataayich. Chiih tikuniyiu maak anitih nihtaauchihchikin aschiiyiu aakutaah kaa iituhtaach.
2 Judas maak an kaa maamishimaat Jesus chii chischaayihtim taanitaah kaah tikuniiyich aniyaayiu waash mihchaatwaau chii nishtuwiuch anitih Jesus kiyaah uchischinihamuwaakinh.
3 Aakw Judas aa wiichaaukut nitupiyiuh kiyaah aniyaayiuh kaa chipihuwaasiwiyichh anitaah chishaaayimihaaukimikuhch kaah aapitisiiyichh. Aniyaayiu kaa niikaanishiich ayimihaauchimaauh kiyaah aniyaayiu Phariseeh chii iitishuhukuch chaa chii nitiwaapimaach Jesus. Chii tihkunimuch maak waashtaanimaakinh kiyaah ishkutaau waashtaanimaakinh kiyaah nitupiyuuhkumaanh.
4 Chii chischaayihtim maak Jesus misiwaa taan chaa iispiyihiikut, aakw kaa paachi apuuskuuwaat aakw aataat, “awaan kaa naanituwaapimaakw?”
5 Aakw aataach, “Jesus Nazareth kaa uhchiit ninaanituwaapimaanaan.” Aakw aatikuch Jesus, “aaukw niiyi.” Judas maak, an kaah maamishimaat Jesus aakutaah kaa niipuuwit aa wiichikaapushtiwaat aniyaayiu kaa paachi wiichaaukut.
6 Iishpih maak Jesus kaah iitikuch, “aaukw niiyi,” chii ashaakaapuwich kaah aati pihchishihch anitaah mustaaskimiihch.
7 Jesus miin kaa kukwaachimikuch, “awaan kaa naanituwaayimaakw?” Aakw aataach, “Jesus, Nazarethihch kaa uhchiit.”
8 Aakw Jesus aatikuch, “shaash chichii wiihtimaatinaawaau niiyi aah aawiyaan an. Niiyi niiyaanituwaapimuwaakwaa, pichistinaahkuch uchii kutikich.”
9 Aayuwikw waahchi chii iyit chaa chii tipipiyich aniyaayiu shaash anitaah kaah iyikupinaa, “nuuhtaa, nimui nuuhchi winihaauch waachi paayikw anichii kaa paachi miyiyin.”
10 Simon Peter chikiniwaayitimuhtaakupin unitupiyuuhkumaan kiyaah kaa kuikunihk, kaa minishimwaat uhtiukaayiu unihiiwiniiyihch iitaachaa aniyaayiu paayikw maauch kaa niikaanaayaayihtaakushiiyich chishaaayimihaauchimaau utaapichihaakiniyiu, Malchus kaa ishinihkaasuyich.
11 Aakw Jesus aataat aniyaayiu Simon Peter, “piihtaa an chii nitupiyuuhkumaan. Chititaayihtaanaa aakaa chaa minihkwaayaan an minihkwaakin wiisichaayihtaamuwin nuuhtaawii kaa paachi miyit?”
Jesus kaa iituhtihaakinuut Annas aah taayich
12 Anichii maak nitupiyuuch kiyaah aniyaayiu uchimaamuwaauh kiyaah maak anichii Jew kaa iitiskaanaasich kaa chipihuwaashuwich chishaaayimihaaukimikuhch, chii utinaauch aniyaayiu Jesus kiyaah chii maahkupitaauch.
13 Anitaah niishtim Annas aah taayich chii iituhtihaauch. Annas maak chiiwisiu Caiaphas. Uu Caiaphas wiiyi maauch kaah niikaanaayaayihtaakushit chishaaayimihaauchimaau chii iitaapitisiiu aniyaayiu kaa pipuniiyich.
14 Aaukw uu Caiaphas kaah iyitaataakupin aniyaayiu Jew iiyiyiu austaa chaa miyupiyihkupinaa paayikw naapaau chaa chii nipustimuwaayich misiwaa awaayiuh.
Simon Peter kaa ninitiyit kaah iyit aahaakaa chischaayimaat Jesus
Matthew 26:69, 70; Mark 14:66-68; Luke 22:55-57
15 Simon Peter kiyaah miin kutik chischinihamuwaakinh chii nuushuushkuwaauch Jesus. An maak kutik chischinihamuwaakinh naashch chii miyu chischaayimikuu aniyaayiu maauch kaa niikaanaayaayihtaakushiiyich chishaaayimihaauchimaau. Aakw kaa wiichaawaat Jesus anitaah aniyaayiu maauch kaa niikaanaayaayihtaakushiiyich chishaaayimihaauchimaau aah taayich aa piihchaayich aniyaayiu waaskaayaaskunikiniyiu.
16 Peter maak wiyiwiitimiskwaahch anitih chiih taau wiiyi. Aakw an kutik chischinihamuwaakinh kaa miyu chischaayimikut aniyaayiu maauch kaa niikaanaayaayihtaakushiiyich chishaaayimihaauchimaau kaau chii wiyiwiiu, kaa ayimihaat aniyaayiu iskwaash anitih ishkwaahtaamihch kaa taayihch kaa kukwaachimaat chaa chii piihchaayich Peter. Aakw kaa piihtikihaat aniyaayiu Peter.
17 An maak iskwaash anitih ishkwaahtaamihch kaah taat aakw aataat Peter, “aawaa chiiyi paayikw Jesus uchischinihamuwaakinh?” Aakw iiyaat. “Nimaa. Nimiyaau niiyi.”
18 Chii tihkaayaayiu maak. Aakw anichii aapichihaakinich aayiuh kiyaah chipihuwaasuyich kaa kutuwaach aakw kaa waaskaakaapushtihch aniyaayiu ishkutaayiu anitaah aa uhchi aushuch. Peter maak kiyaah wiiyi chii paachi wiichikaapushtiwaau aa paachi auushut.
Jesus kaa naanituchischaayimikut maauch kaa niikaanaayaayihtaakushiiyich chishaaayimihaauchimaau awaan wiiyi taapwaah iyaaut
Matthew 26:59-66; Mark 14:55-64; Luke 22:66-71
19 Aakw an maauch kaa niikaanaayaayihtaakushit chishaaayimihaauchimaau ninaahkiu kaa iishi kukwaachimaat Jesus aa wii nituchischaayimaat aniyaayiu uchischinihamuwaakiniyiuh kiyaah uchiskutimaachaawiniyiu.
20 Aakw Jesus aatikut, “misiwaa taan kaa iyaan chii paahtimuch iiyiyiuch. An maak taan kaa iishi chiskutimaachaayaan anitaah Jew ayimihaaukimikuhch kiyaah chishaaayimihaaukimikuhch anitaah misiwaa Jew iiyiyiuch kaa chii paachi nishtuwiich, nimui nihtaa chiimuch nuhchi ayimin.
21 Chaakwaan waahchi paachi kukwaachimiyin? Kukwaachimich maah anichii iiyiyiuch kaa chii paahtuuwich. Kukwaachimich taan kaa iitikwaau, waash chischaayihtimuch taan kaah iyiuch.”
22 Uyaayiu kaah yit Jesus, paayikw aniyaayiu kaa chipihuwaasiwiyich chii utaamihkwaahukuu aah iitikut, “nimui chiki chii iishi ayimihaau maauch kaa niikaanaayaayihtaakushit chishaaayimihaauchimaau.”
23 Aakw Jesus aatikut, “aakaa muyaam waahchi yiwaanaa chaakwaan, wiihtimuwich misiwaa iiyiyiuch utih kaah taach. Mikw maak kaa taapwaawaanaa misiwaa kaa iyaan, chaakwaan waahchi paachi utaamuhuyin?”
24 Aakw Annas kaah iitishihwaat aniyaayiu Jesus anitaah Caiaphas maauch kaa niikaanaayaayihtaakushiiyich chishaaayimihaauchimaau aah taayich aashkw aa maahkupisuyich.
Simon Peter kaah iyit aahaakaa chischaayimaat Jesus
Matthew 26:71-75; Mark 14:69-72; Luke 22:58-62
25 Simon Peter maak aashkw maakwaach chii niipuu anitih aa auushut. Aakw aataach anitih kaah taach, “nimiyaau aa chiiyi paayikw aniyaayiuh uchischinihamuwaakinh an naapaau?” Peter maak chii nitiyiu aah iyit, “nimaa. Nimiyaau niiyi.”
26 Paayikw maak aniyaayiu maauch kaa niikaanaayaayihtaakushiiyich chishaaayimihaauchimaau aapichihaakin chii waahkumaayihtaakupin aniyaayiu naapaau Peter kaa minihtiukaayaaswaat. Aakw aataat aniyaayiu Peter, “aaukw chichiisinaatin kaa waapimitaan kiyaah chiiyi anitaah nihtaauchihchikin aschiihch aa pipaawiichaaut Jesus, nimaa?”
27 Miin maak ayaapich Peter chii nitiyiu aah iyit, “nimiyaau niiyi.” Tiiwaahch kaa uhchi paahtaakusiiyich naapaapaahkihaahkwaan.
Jesus kaa iituhtihaakinuut Pilate aah taayich
Matthew 27:1, 2, 11-14; Mark 15:1-5; Luke 23:1-5
28 Wiipich aniyaayiu kaa chaachishaapaayaayich anitih Caiaphas aah taayich chii uhchi chistuhtihaakiniu Jesus, anitaah ruum uchimaauh uchisaawaaskaahiikinimiyihch kaa iituhtihaakinuut. Pilate chii ishinihkaasuu an ruum uchimaau. Anichii maak Jew iiyiyiuch nimui uhchi wiih piihchaauch wiiyiwaau anitaah aahaakaa chiwiih michinaakuhiisiwich utiyimihaawiniwaahch. Kiyaah atuuch uhchi chii miichiwich miyaashkaachaau mikushaawiniyiu chii piihchaawaakupinaa utih.
29 Aayuwikw maak uyaayiu waahch chiih wiyiwiit Pilate, kaa nitiwaapimaat aakw kaa kukwaachimaat, “taan aa iishi ataamaayihtaakusit uu naapaau?”
30 Aakw aataach, “aatuch nuuhchi paashuwaanaan kaa uhchi michihtutihk.”
31 Aakw Pilate aatikuch, “chiiyiwaau utinaahkw uu naapaau chiiyiwaau chii wiishuwaawiniwaau chaa aapichihtaayaakw aa tipaaskunaakw.” Aakw anichii Jew iiyiyiuch aataach, “nimui nipichistinikunaan niwiishuwaawinaanh chaa chii iyiyaahch chaa chii nipihaakinuut awaan.”
32 Aaukw maak uu waahchi iispiyich chaa chii tipipiyich taan nihaau kaa iishi niikaan wiihtihk Jesus chaa iishi punipimaatisiikupinaa.
33 Miin kaau paahchaat Pilate aniyaayiu chisaawaaskaahiikiniyiu aa nituumaat Jesus aakw kaa kukwaachimaat, “aawaa chiiyi Jew iiyiyiuch uchihchiuchimaamuwaau?”
34 Aakw Jesus aatikut, “chiiyi uu waachihch chitiiitaayihtimuwin kiyaah maak kutikich aa chichii wiihtimaakuch uyaayiu kaa ishiyin?”
35 Aakw Pilate aataat, “Jew aa niiyi chitiiitaayimin? Chii tipiyiwaa chitiiiyiyimich kiyaah anichii kaa niikaanishiich ayimihaauchimaauch chichii paachi iitishuhukuch. Chaakwaan maak kaah tutimin?”
36 Aakw Jesus aatikut, “nimui utih aschiihch uhchipiyiu nuuchimaawin. Utih chii uhchiimaakinikupinaa nuuchimaawin suuhk chipih maashihchaauch anichii nitaapichihaakinich aakaa chaa chii pichistinikuwich anitaah Jew iiyiyiuh aah taayich. Mikw nimui utih aschiihch uhchipiyiu nuuchimaawin.”
37 Aakw Pilate aataat, “taapwaah kiyipwaa chaah chihchiuchimaawiyin.” Aakw Jesus aatikut, “chishin aa chihchiuchimaawiyaan. Aaukw waahchi iiyiyiwiyaan kiyaah aaukw waahchi paachi tikushiniyaan utih aschiihch chaa chii chischaayihtaakunihchaayaan an taapwaawin. Tihtu awaan taapwaawinihch kaah taat aaukw an piyaachi nituuhtiwit.”
38 Pilate kaa kukwaachimaat aataat, “chaakwaan an taapwaawin?” Aakw miin kaau kaa wiyiwiit aakw aataat aniyaayiuh Jew iiyiyiuh, “nimui nichischaayihtimwaan chaakwaayiu kaa winitutimukwaa aaniti chaa chii uhchi tipaaskunaakinuut.
Matthew 27:15-31; Mark 15:6-20; Luke 23:13-25
39 Tikun maak iyihtiwin paayikw chipuuhwaakin chaa chii pichistinimaakuyaakw maakwaach aa miyaashkaachaau mikushaaniwiyich. Chinitiwaayimaawaau aa chaa chii pichistinimaakuyaakw uu Jew iiyiyiuch uchihchiuchimaamuwaau?”
40 Aakw miin tiyaapwaach aah iyich, “nimui wiiyi an. Barabbas aaukw naatuwaayimichiht chaa chii pichistinimaakuyaahch.” Uyaayiu maak Barrabas chii chimutiskuuyiu.