Jesus kaa ayimihaastimaasuut
17
1 Iishpih maak Jesus kaa chiish ayimit, chii iitaapiu chihchichiishikuhch iishi aakw iyaat, “nuuhtaa, aakw waatihchipiyihch aah chiinikwaanihtaat. Chistaayihtaakuhii chikusis chaa chistaayihtaakuuhiisk ukusiisiimaau.
2 Waash chichii miyaau tipaayihchichaawiniyiu misiwaa iiyiyiuh chaa chii tipaayimaat, aakw maak kaachich pimaatisiiwiniyiu chaa chii miyaat misiwaa aniyaayiuh awaayiuh kaa miyit.
3 Maautaa maak chaa chii uhchi iyaat awaan kaachich pimaatisiiwiniyiu, chischaayimiskaa chiiyi mikw aa paayikushiyin aa taapwaah Chishaaminituuwiyin, kiyaah maak Jesus Christ chischaayimaachaa, aniyaayiu kaa paachi iitishuhumit.
4 Nichiiwaapihtiiwaan utih aschiihch taan aa ishpish chistaayihtaakusiyin, aa chii chiishihtaayaan taakish an aapitisiiwin kaa paachi miyiyin chaa tutimaan.
5 Nuuhtaa, anuuhch maa chistaayihtaakuhiih muyaam an kaa ishpish chistaayihtaakusiyaan aashkw aa chii taayaan anitaah aah taayin, aashkw aakaa uhchi tikuhch uu aschii.”
Uchischinihamuwaakinh kaa ayimihaashtimuwaat Jesus
6 “Nichiih tutiwaauch uchii iiyiyiuch kaa paachi miyiyin utih aschiihch uhchi chaa chii chischaayimisch. Chiiyi chichii utiiyiyimin, niiyi chichii paachi miyin. Chii ninihiihtimuch maak chitiyimuwiniyiu.
7 Anuuhch maak chischaayihtimuch misiwaa an chaakwaayiu kaa miyiyin taapwaah chiiyi aaihtaayin aa uhchipiyiyich.
8 Nichii wiihtimuwaauch taan kaa iishi miyiyin chaa chii wiihtimuukwaau. Chii utinimuch maak taan kaa iishi wiihtimuukwaau. Chischaayihtimuch taapwaah chiiyi aa chii paachi iitishuhuyin, taapwaahtimuch kiyaah uyaayiu.”
9 “Wiiyiwaau nitutimaastimuwaauch, nimui wiih anichii aschiihch iiyiyiuch nitutimaastimuwaauch, mikw anichii kaa paachi miyiyin nitutimaastimuwaauch waash chii anichii chitiiiyiyimich.
10 Misiwaa an tipiyiwaawisiiyaan chiiyi chitipiyiwaawisiin, kiyaah chiiyi an tipiyiwaawisiin niiyi nitipiyiwaawisiin. Nichii chistaayihtaakuhiikiwin maak wiiyiwaau uhchi.
11 Aakw maak chaa nitiwaapimitaan. Shaash wiipich nimui niki uhchi taan utih aschiihch. Wiiyiwaau maak aashkw utih aschiihch chiki taauch. Nuuhtaa, chiiyi kaa piyaahchisiyin, maamuu kinuwaayimich chitiishinihkaasuwiniyiu uchii, aniyaayiu ishinihkaasuwiniyiu kaa paachi miyiyin anitih chaa chii uhchi paayikuch muyaam chiiyaaniu aa iishi paayikuyihkw.
12 Aashku chiih taauch aah taach nichii naakitiwaayimaauch aniyaayiu ishinihkaasuwiniyiu kaa paachi miyiwiit uhchi. Nichii kiniwaayimaauch, nimui maak waachi paayikw uhchi winishinich mikw an kaa iitaayihtaakuniiyikupinaa chaa winishihk chii winishin. Misiwaa uu kaa iispiyich chii iispiyiu chaa chii tipipiyich taan aa tishtaach chihchimisinaahiikinihch.
13 Anuuhch maak chii paachi naatitin. Uhii maak chaakwaanihii niwiihtaan utih aschiihch aashkw aah taayaan, taakish chaa chii saakischinaashkaakuch nimuuchichaayihtimuwiniyiu.
14 Nichii wiihtimuwaauch chitiyimuwiniyiu. Chii uhkaatikuch aschiihch iiyiyiuuh kaah taayich uhchi aniyaayiu aah aakaa wiich itaatisimaach, waash taapaa utih aschiihch iishi tipaayihtaakusiwich muyaam niiyi aa iishi aakaa tipaayihtaakusiyaan utih aschiihch.
15 Nimui wiih chinitutimaatin chaa chii utinitwaau utih aschiihch uhchi, chinitutimaatin chaa chii kiniwaayimitwaau aakaa chaa chii pimaayimikuch michiminituu.
16 Muyaam aa iishi aakaa tipaayihtaakusiwich utih aschiihch aaukw muyaam kiyaah wiiyiwaau aa isinaakusich. Nimui kiyaah wiiyiwaau utih aschiihch uhchi tipaayihtaakusiwich.
17 Piyaahchihiich chitaapwaawinihch. Chitiyimuwin aaukw taapwaawin.
18 Muyaam chikaa paachi iitishuhuyin utaah aschiihch muyaam kiyaah niiyi kaa pipaa iitishuhukwaau aschiihch.
19 Wiiyiwaau maak uhchi, mitun niti iishi pichishtaayimiisun chaa chii uhchi taapwaah pichishtaayimisuustaasch chiiyi aah taaut.”
Jesus kaa ayimihaashtimuwaat misiwaa aniyaayiu kaa nuushuushkaakut
20 “Nimui mikw uchii utih nitutimaastimuwaauch. Nitutimaastimuwaauch kiyaah isch kaa taapwaayaayimich aniyaayiu uhchi taan kaa iishi paachi aayimuumiyich uyaayiu,
21 Misiwaa chaa chii paayaakuch. Muyaam chiiyi nuuhtaa aa pihchiskuwiyin, niiyi maak aa pichiskaataan, wiiyiwaau kiyaah chaa chii piihchishkaatihkuuhch, chaa chii taapwaahtihch aschiihch iiyiyiuch chii aa chii paachi iitishuhuyin.
22 Nichiih tutiwaauch chaa chii chistaayihtaakusich muyaam chiiyi kaah tutiwiyin chaa chii chistaayihtaakusiyaan aati chaa chii uhchi paayikuch muyaam chiiyaaniu aa iishi paayikuyihkw.
23 Niiyi aa piihchishkuukwaau kiyaah chiiyi aa paachi piihchishkuwiyin aakutaah uhchi naashtiyish chaa paayikuhaakiniwich. Aakutaah maak chaa chii uhchi taapwaahtihch aschiihch iiyiyiuch kaah taach chiiyi taapwaah aa chii paachi iitishuhuyin kiyaah maak taapwaah aa saachihiitwaau muyaam niiyi aa ishpish saachihiiyin.”
24 “Nuuhtaa, chiiyi chichii paachi miyin uchii, nitiwaayimaauuch kiyaah wiiyiwaau aashkw chaa chiih taach anitaah aahtaauch, chaa chii waapihtihch nichistaayihtaakusuwiniyiu, aniyaayiu chichistaayihtaakusiwiniyiu kaa paachi miyiyin, waash chichii saachihiin aashkw aamwaayaa uhchi ushihtaayin uu aschii.
25 Nuuhtaa, chiiyi muush kaa kuiskutaatisiyin, nimui chichischaayimikuch anichii aschiihch iiyiyiuch, niiyi maak wii chii chischaayimitin. Uchii maak kiyaah kaa paachi miyiyin chischaayihtimuch taapwaah chiiyi aa chii paachi iitishuhuyin.
26 Nichiih tutiwaauch chaa chii chischaayimisch kiyaah maak nimui niki uhchi puuniiwaan anitih wii chaa chii uhchi chischaayimikuwipinaa. Aakw maak aan saachihiiwaawin aa ishpish saachihiin chaa chii piihchishkaakuch, aakw maak kiyaah niiyi chaa piihchishkuukwaau.”