16
1 “Chichii wiihtimaatinaawaau misiwaa uu kaa iishi ayimutimaatikuch aakaa chaa chii puuniyaakw aa taapwaayaayihtaamaakw.
2 Uchii iiyiyiuch chiki wiyiwiitisinikuwaauch Jew utiyimihaaukimikuwaahch. Aahaa, chaak taapwaah chiki utihchipiyiu awaan chaa chii nipihiitaakw aa iitaayihtihk Chishaaminituu aah aapitishiishtiwaat.
3 Aayuwikw uyaayiu chaa tutaataakuch waash nimui nihtaa uhchi chischaayimaauch uhtaawiimaau kiyaah maak niiyi nimui nuuhchi chischaayimikuch.
4 Mikw maak chiwiih wiihtimaatinaawaau uu chaa chii chishchisiyaakw taan kaa iishi aayimuumikwaau iishpih utihchipiyiyichaa uyaayiuh chaakwaayiuh chaa chii tutaataakuch. Nimui kuuhchi wiihtimaatinaawaau uskich anitaah kaa paachi chiskutimaatikuch waash aakutaah kaah taayaan anitih aah taayaakw.”
Taan aataapitisit kaa piyaahchisiit ahchaahkw
5 “Anuuhch maak wii aakw chaa nitiwaapimik an kaa paachi iitishuhut. Nimui maak waawaach paayikw aa tishiyaakw chikukwaachiminaawaau taanitaah aatuhtaayaan.
6 Anuuhch maak aa chii wiihtimaatikuch aakw naashch maasimaayihtimaakw chitaahiiwaahch.
7 Mikw maak kuiskw aa wiihtimaatikuch austaa waash chiki wiichihiikunaawaau aa chistuhtaayaan, waash aakaa chistuhtaayaanaa nimui chiki uhchi paachi nitiwaapimikuwaau an chaa wiichihiitaakw, chistuhtaayaanaa maak aaukw an chaa paachi iitishihaamaatikuch.
8 Tikushihkaa maak kiti tutiwaau aschiihch iiyiyiu chaa chii nistuhtimiyich aa winipiyiyich taan aa iishi kiniwaapihtimiyich michihtwaawiniyiu, kuiskutaatisiiwiniyiu kiyaah maak Chishaaminituu uwiyaaskunichaawiniyiu.
9 Winipiyuuch taan aa iishi kiniwaapihtihch michihtwaawiniyiu waash aahaakaa taapwaayaayimich.
10 Winipiyuuch taan aa iishi kiniwaapihtihch kuiskutaatisiiwiniyiu, waash uhtaawiimaau aah taat aakutaah aatuhtaayaan, nimui maak miin chiki uhchi waapiminaawaau.
11 Winipiyuuch taan aa iishi kiniwaapihtihch Chishaaminituu uwiyaaskunichaawiniyiu waash michiminituu, an kaa uchimaakaatihk utih aschiihch, shaash wiiyi chii tipaaskunikuu Chishaaminituuh.”
12 “Aashkw atitiu mishtiih tikun chaa chii iitikuch mikw maak nimui chiki uhchi utinaawaawaau anuuhch.
13 Tikushihkaa maak uu ahchaahkw kaa chischaayihtimihiiwaat taapwaawiniyiu, an chaa chischinuhtihiitaakw misiwaa taapwaawinihch. Nimui wiiyi waachihch kiti iyiu chaakwaayiu, aniyaayiu maak taan chaa iishi paahtiwaat Chishaaminituu aah iiyiyich aayuwikw uyaayiu chaa iishi waawiihtihk. Chiki waawiihtimaakuwaau aniyaayiu chaakwaayiu chaa aati ispiyiyich.
14 Niki chistaayihtaakuhiikw waash taan chaa iishi aayimuutimuch aayuwikw uyaayiu chaa iishi aashuu waawiihtimaataakw.
15 Misiwaa taan aa iishi iyaat uhtaawiimaau nitipiwaausiin. Aaukw waahchi iitikuch chaa uhtinihk utih aahtaauch aniyaayiu aashuu chaa waawiihtimaataakw uu ahchaahkw taaniyaayiu chaa iishi aayimuutimuch.”
16 “Shaash wiipich nimi chiki waapiminaawaau, mikw waaipishchiish aakw miin chaa waapimiyaakw.”
17 Aakw pisch aniyaayiuh uchischinihamuwaakinh aatituyich, “chaakwaayiu uyaayiu kaa iitikw aashkw miin waaipishchiish chaa wiichaauhkw aakw miin aakaa chaa uhchi waapimihkw kiyaah aniyaayiu kaah iyit miin waaipishchiish aakw chaa waapimihkw, kiyaah maak aniyaayiu aah iyit, ‘Uhtaawiimaau aa nitiwaapimaat?’
18 Nimui chii chischaayihtimwaanaaniu chaakwaayiu aniyaayiu waahchi iyit, ‘waaipishchiish.’ ” Nimui chichischaayimaaniu chaakwaayiu aayaayimwaahiikut.
19 Jesus chii chischaayimaau aa wiih kukwaachimikut uyaayiu. Aakw aataat, “an kaa iyaan, shaash wiipich nimui chiki uhchi wiichaautinaawaau. Miin maak waaipishchiish aakw miin chaa waapimiyaakw. Aawaa uu waah nituuchischaayihtimaakw chaakwaan an kaah aayimuutimaan?
20 Kuiskw aa wiihtimaatikuch chiki maatuunaawaau kiyaah chiki mimaatwaanaawaau. Aakw uchii utih aschiihch iiyiyiuch kaah taach chiki sichiyaasiwich. Chiki misimaayihtaanaawaau chiiyiwaau. Mikw maak an aa misimaayihtimaakw chiki kwaaschipiyiu tiyikuch chaa chii muuchichaayihtimaakw.
21 Miyaakwaahiitihk iskwaau misimaayihtim waash utihchipiyiyiu aakw chaa wiisichaayihtihk. Iishpih maak kaa pimaatisiiyich aniyaayiu utiwaashishiim winichishchisiu taan kaa iishi wiisichaayihtihk waash naashtaapwaah miywaayihtim awaashish aa chii pimaatisiiyich utih aschiihch.
22 Aaukw aan maak muyaam kiyaah chiiyiwaau, anuuhch chimisimaayihtaanaawaau. Mikw maak miin waapimitikuchaa naashtaapwaah chiki miywaayihtaanaawaau chihtaahiiwaahch. Nimui maak awaan chiki uhchii tutaakuwaau chaa chii miskimitaakw chimuuchichaayihtimuwiniwaayiu.”
23 “Utihchipiyihchaa maak uu kaa iishi aayimuutimaatikuch, nimui chaakwaan chiki uhchi nitutimunaawaau. Kuiskw aa wiihtimaatikuch mikw taan chaa iishi nitiwaayihtimuwaakw uhtaawiimaau nitishinihkaasuwin aah aapichihtaayaakw chiki miyikuwaau.
24 Nimui aashkw kuuhchi nitutimaanaawaau chaakwaan nitishinihkaasuwinihch uhchi. Nitutimaakw aakw maak chaa miyikuwiyaakw, aakw mitun chaa miywaayihtimaakw.”
Jesus kaah aayimuutihk aa shihkuchihtaakiniwiyich aschiiyiu
25 “Uhii chaakwaanihii kaa wiihtimaatikuch ahaapichihtaayaan chiskutimaachaau ayimuwin. Chiki utihchipiyiu maak chaak chaah aakaa aapichihtaayaan uhii siitiu kuiskw chaa aayimutimaatikuch uhtaawiimaau.
26 Utihchipiyihchaa maak an, chiiyiwaau aakw chaa nitutimuwaakw Chishaaminituu nitishinihkaasuwinihch uhchi. Chiwiihtimaatinaawaau maak, nimui chiki uhchi nitiwaayihtaakun chaa chii ayimihaayaan aa nitutimuk Chishaaminituu chaa chii miyitaakw taan aa iishi nitiwaayihtimaakw.
27 Waash chii saachihiikuwaau wiiyi uhtaawiimaau aa chii saachihiiyaakw kiyaah aa chii taapwaahtimaakw Chishaaminituu aah taat aa chii uhtuhtaayaan.
28 Taapwaah maak uhtaawiimaau aah taat nichii uhtuhtaan kaa paachi tikushiniyaan utih aschiihch, niki nikitaan maak miin uu aschii, kaau maak uhtaawiimaau niki naataau.”
29 Aakw iyaayich uchischinihamuwaakinh, “aakw maak iyaakw kuiskw ayimihiiyaahch. Aahaakaa aapichihtaayin chiskutimaachaau ayimuwin aawiihwiihtimuyaahch chaakwaan.
30 Anuuhch maak nichischaayihtaanaan misiwaa chaakwaan aa chischaayihtimin, nimui nitiwaayihtaakusuu awaan chaa chii kukwaachimisk chaakwaayiu, aaukw maak uu waahchi taapwaahtimaahch Chishaaminituu aah taat aa chii uhtuhtaayin.”
31 Aakw Jesus aataat, “aawaa aakw tiyaapwaahtimaakw anuuhch?
32 Chiki utihchipiyiu, shaash maak taapwaah utihchipiyiu anitih misiwaa paahpaayikw chaa taayaakw, kichaapaan chaa taayaakw tipiyiwaa chiichiwaahch. Aakw niiyi chaa paayikushiyaan aa nikisiyaakw. Nimui mikw chihchiwaa niki uhchi paayikushin waash uhtaawiimaau taau utih aah taayaan.
33 Chichii wiihtimaatinaawaau uu chaa chii uhchi iyaayaakw chiyaamaayihtimuwin anitaah niiyi aah taayaan. Chiki ninaakaataayimuhiikunaawaau utih aschiihch. Suuhk wiih suuhchitaahaakw, waash shaash niiyi nichii shihkuchihtaan uu aschii.”