19
1 Aakw Pilate kaah iitishuwaataat Jesus chaa chii chistuhtihaakiniwiyich chaa chii nituupishishtaahumaakiniwiyich.
2 Anichii maak nitupiyuuch chii ushihtaauch uchimaau ashtutiniyiu kaa kaashutaawaaskuniiyiyich niipisiiyaahtikw aah aapichihtaach. Kaa pushkimuyaahch Jesus aniyaayiu ashtutiniyiu. Kiyaah aa chinwaakiniiyich akuhpiyiu aa mihkwaakiniiyich chii pushchishkimutiyaauch.
3 Chii maayaayimaauch muyaam aa maamihchimaach aah iitaach, “waachiyaa chiiyi Jew iiyiyiuch uchihchiuchimaamuwaau.” Kiyaah chii utaamihkwaahwaauch utihchiiwaau aah aapichihtaach.
4 Miin kaa wiyiwiit Pilate kiyaah aataat aniyaayiu iiyiyiuh, “miin chiki paachi wiyiwiihtihaakiniu uu naapaau chaa chii chischaayihtimaakw aahaakaa miskimuch taan chaa chii iishi nishiwinaachimik niiyi wiiyi.”
5 Aakw Jesus paayaach wiyiwiit aa chichishkihk aniyaayiu chihchiuchimaau ashtutiniyiu, kaakaawaaskuniiyich niipisiyaahtikuhch kaa uhchi ushihtaakiniwiyich kiyaah maak aniyaayiu kaa chinwaakiniiyich akuhpiyiu kaa mihkwaakiniiyich aa chichishkihk. Aakw Pilate aataat aniyaayiu Jew iiyiyiu, “maau uu naapaau.”
6 Anichii maak kaa niikaanishiich ayimihaauchimaauch kiyaah anichii kaa chipihuwaasiwiyich anitaah chishaaayimihaaukimikuhch ishkutik wiyaapimaach Jesus, suuhk tiiyaapwaach aah iyich, “chiistaaskuhaahkw, chiistaaskuhaahkw.” Pilate aataat, “chiiyiwaau nituuchiistaaskuhaahkw. Nimui nimiskimwaan taan kaa iishi michihtuutimukwaa.”
7 Aakw anichii Jew iiyiyiuch kaa nishkwaaushihaach Pilate aah iitaach, “nitiyaanaan wiishuwaawin, akwaachishtaach anitih niwiishuwaawinaahch chaa chii iitishuwaaniwiyich chaa chii nipihaakinuut aniyaayiu uhchi aa chii iyit wiiyi aahaawit Chishaaminituu ukusish.”
8 Pilate maak kaa paahtihk uyaayiu aah iinaaniwiyich, atitiu chii saachisuu.
9 Aakw miin paahchaach anitaah chisaawaaskaahiikinihch aakw aataat Jesus, “taanitaah waahchiyin?” Nimui uhchi chistuutikuu Jesus.
10 Aakw Pilate aataat, “nimui aa chii wiih ayimihiiyin? Nimui aa chii chischaayihtaan aa iyaayaan tipaayihchichaawin chaa chii iitishuwaayaan chaa chii pichistinikiwiyin kiyaah maak chaa chii chiistaaskuhukiwiyin?”
11 Aakw Jesus aas nishkwaaushihiikut, “mikw chaashuwaat Chishaaminituu aa chii miyisk aniyaayiu tipaayihchichaawiniyiu chaa chii tuutuwit aaukw waahchi chiih tikuhch an chaa chiih tiyin. An maak awaan chiiyi aah taayin kaa iishi pichistisuwaasit aaukw atitiu maachituutihk.”
12 Uyaayiu maak kaa iiyiyich Jesus, Pilate chiwiih pichistinaau. Aakw mikw anichii Jew iiyiyiuch kaa taapwaach aah iyich, “paachishtinaakwaa Jesus nimui chii uwiichaawaakinitutiwaawaau chihchiuchimaau Caesar. Waash awaan kaa chihchiuchimaauhiisut nishkushtiwaau Caesar.”
13 Iishpih maak Pilate piyaahtihk aniyaayiu kaa iishi taapwaayich wiyiwiitimihch chii iituhtihaau Jesus, aakw kaa uwaayipit anitih tipaaskunichaau taahtipiwinihch, anitaah aa asiniihkaaniwiyich aa chii astaayich. Hebrew aa iishi ayiminaaniwich Gabbatha ishinihkaataakiniu anitih aniyaayiu kaa asiniihkaaniwiyich.
14 Maakwaach maak an aa chiishikaach miyaaskaachaawin mikushaawin aa iyaaskiwishtaakiniwich chii iishi chiishikaau. Chaakaat maak chii aapihtaachiishikaayiu, aakw aataat Pilate aniyaayiu Jew iiyiyiu, “kiniwaapimaahkw maau chichihchiuchimaamuwaau.”
15 Uyaayiu suuhk chii taapwaauch aah iyich anichii Jew iiyiyiuch, “nipihaahkw, nipihaahkw, chiistaaskuhaahkw,” aah iitaach. Aakw Pilate aataat, “chinitiwaayiminaawaau aa chaa chii pichistinihk chichihchiuchimaamuwaau chaa chii chiistaaskuhwaakinuut?” Aakw aniyaayiu kaa niikaanishiich ayimihaauchimaauh chii nishkwaaushihiikuu Pilate aah iyich, “mikw Caesar nuuchihchiuchimaaminaan nimui kutik awaan.”
16 Aakw Pilate kaa pichistinaamuuwaat aniyaayiu nitupiyiu chaa chii chiistaaskuhwaayich aashitaayaahtikuhch. Aakw kaa chistuhtihaach.
Jesus kaa chiistaaskuhwaakinuut aashitaayaahtikuhch
Matthew 27:32-44; Mark 15:21-32; Luke 23:26-43
17 Aakw waayiwich, Jesus aa unikaatuhwaayich utaashitaayaahtikumiyiu anitaah kaa iituhtihaach “mishtikwaanikin kaah tikuhch” kaa ishinihkaataayich. Uu maak Hebrew aa iishi ayiminaaniwich “Golgatha” iinaaniu.
18 Aakutaah maak anitaah kaa chiistaaskuhwaach kiyaah maak niishu naapaau chii chiistaaskuhuumaakiniwiyiu kaa chimiyimaakiniwiiyich yaaiituu anitih aah taat.
19 Pilate maak aa chii misinihiichaat chii chikimuhtaakiniyiu anitih ishpimihch Jesus utaashitaayaahtikumiyich aah iitishtaayich, “Jesus Nazarethihch kaa uhchiit aayiukun uyaayiu Jew iiyiyiuch uchihchiuchimaamuwaauh.”
20 Mihchaatu Jew iiyiyiuch chii paachi ayimihtaauch aniyaayiu misinihiikiniyiu waash nimui uhchi yaawinaakuniyiu aniyaayiu cheruusilim ihtaawiniyiu anitih kaah taach. Nishtuyich maak ayimuwin chii aapitiniiyikupin anitih aniyaayiu misinihiikiniyiu, Hebrew aa iishi ayiminaaniwich, Latin kiyaah Greek.
21 Aakw anichii Jew iiyiyiuch kaa niikaanishiich utiyimihaauchimaamuwaauh aataach Pilate, “nimui chipih uhchi iitishtaan an chuuwich uchihchiuchimaamuwaauh kaah iitishtaayin.” Aahtisinihaah an miishkuch chaa chii iitishtaach, “chii iyiu, niiyi Jew iiyiyiuch uchihchiuchimaamuwaauh.”
22 Pilate aak aatikuch, “taan kaah iitishtaayaan aaukw chaa iitishtaach.”
23 Iishpih kaa chiistaaskuhwaach aashitaayaahtikuhch anichii nitupiyuuch aniyaayiu Jesus aakw aniyaayiu uchaakwaanimiyiu kaa maatinimaatuwaach aa naautaawaach paahpaayikw chaa chii iyaach paayikw chaakwaayiu. Aniyaayiu maak akuhpiyiu uschich kaa chii chichishkimiyich aa misawaayaakiniiyich chii isinaakuniyiu nimui uhchi tikuniyiu anitih chaa chii pimikwaataayich.
24 Aakw atituuch anichii nitupiyuuch, “aakush aakaa uhchi piikushimwaataau uyaayiu utikuhp. Kuchihiitutaau awaan chaa taauhiichaakwaa aniyaayiu akuhpiyiu.” Uyaayiu maak kaah tich aakutaah kaa tipipiyich taan kaa iitisinihiikiniwiyikupinaa chihchimisinihiikinihch,
Chii maamaatinimaatuuch nichaakwaanim aa taauhiikaachaanuuch nitikuhp.
25 Jesus maak ukaawiih paashuch chii niipuuyiu anitih Jesus utaashitaayaahtikumihch kiyaah ukaawiih wiichishaaniskwaamiyiu aakutaah kaa niipuuwiyich kiyaah Mary, Cleopas wiiuh kiyaah Mary Magdalene.
26 Iishpih Jesus wiyaapimaat ukaawiih kiyaah uchischinihamuwaakinh kaa saachihaat aa niipuuwiyich anitih, aakw aataat ukaawiih, “maau chikusis.”
27 Aakw aataat aniyaayiuh uchischinihamuwaakinh, “maau chikaawii.” An maak chischinihamuwaakin aakutaah nichisk kaa uhchi chihchi kiniwaayimaat Jesus ukaawiiyiu anitaah wiichihch.
Jesus kaa puunipimaatisiit
Matthew 27:45-56; Mark 15:33-41; Luke 23:44-49
28 Paatimaa maak Jesus chii chischaayihtim shaash misiwaa chaakwaayiu aa chii chiishipiyiyich aakw kaah iyit, “niwiih minihkwaan.” Kaah iyit chaa chii tipipiyich taan kaa iishi niikaan wiihtaakuniwiyich anitaah chihchimisinihiikinihch chaa iyikupinaa.
29 Chii tikun maak anitih aatutipaawaakin aa saakischinaapaayaach aa wiisikaakimiihch shuuminaapui, aakutaah anitih kaa akuhtaach uhpinishich kaa isinaakuniiyich kaa akwaapihkaatihch mistikuhch aakw anitaah utuuniiyihch kaa iitaaskunimwaach.
30 Iishpih Jesus kaa minihkwaat aakw iyaat, “shaash chiistaakiniu.” Aakw kaa achistaawiniskwaayit a pichistinaat utihchaahkw kaah aati puunipimaatisiit.
Uspikaahch kaa tihkimaakinuut Jesus
31 Anichii Jew iiyiyiu nimui uhchi nitiwaayimaauch aniyaayiuh kaa chiistaaskuhumaakiniwiyich aashkw chaa chii iitikuchiniiyich waapiniiyichaa waash aayuwikw aniyaayiu chaa chistimaau ayimihaauchiishikaayich, aakw kaah iitaach Pilate chaa chii iitishuwaayich chaa chii naatwaakaataahuumaakiniwiyich aniyaayiuh naapaauh, kiyaah chaa chii niihtinikiniwiiyich wiiuwaayiu chaa chii nihiihkaakiniwiiyich.
32 Aakw anichii nitupiyuuch kaa naatwaakaataahwaach aniyaayiuh niishuh naapaauh kaa chiistaaskuhuumaakiniwiiyich Jesus kaa chiistaaskuhumihch.
33 Jesus maak shaash chii puunipimaatisiiu wiiyi iishpih waatihtaach anichii nitupiyuuch nimui maak uhchi naatwaakaataahwaauch.
34 Paayikw maak an nitupiyiu chii tihkimaau Jesus anitaah uhpimaayiu. Tiiwaahch kaa uhchi kuikwaasikaawiich umihkuyiuh kiyaah nipiiyiuh.
35 An awaan tipiyiwaa ushchiishikuhch aa chii uhchi waapihtihk uyaayiu taapwaah wiihtim taan kaa iispiyiyich chaa chii taapwaahtimaakw kiyaah chiiyiwaau. Chischaayihtim aa taapwaat taan aa iishi wiihtihk.
36 Waash uu chii tutaakiniu chaa chii tipipiyich anitih kaah iitishtaach chihchimisinihiikinihch,
Nimui waachipaayikw uhchi naatwaahiikinuuyiu wiiyi uskin.
37 Kiyaah akwaachishtaach chihchimisinihiikinihch,
Chiki kiniwaapimaauch aniyaayiu kaa tihkimaach.
Jesus wiiyiu kaa nihiikaakiniwiyich
Matthew 27:57-61; Mark 15:42-47; Luke 23:50-56
38 Paatimaa maak Joseph, Arimatheahch ihtaawinihch kaa uhchiit naapaau chii nitiwaayihtimuwaau Pilate Jesus wiiyaayiuh chaa chii nihiikimwaat. Uu Joseph mikw chiimuch chii taapwaayaayimaau Jesus waash chii kushtaau aniyaayiuh Jew iiyiyiuh kaa niikaanishkiwaayich. Chii niskumuu maak Pilate taan kaa iishi nitiwaayihtimiyich Joseph. Aakw maak Joseph kaa utinimwaat Jesus wiiyaayiu kaa chistuhtitaawaat.
39 Nicodemus maak chii wiichaaukuu. Aaukw uu Nicodemus aa tipiskaayich niishtim kaa paachi naataat Jesus. Chii iyaau maak tuuminikiniyiu niipisii mir kiyaah alwaa kaa ishinihkaataayich aa chii uhchi ushihtaakiniwiyich. Wiyaash mitaahtumitiniu tipaapaaskuchikin chii iispihtinikuniyiu uyaayiu tuuminikiniyiu.
40 Aakw uchii niishu naapaauch Nicodemus kiyaah Joseph kaa utinimwaach Jesus wiiyaayiu kaa tihtipaayaachinimwaach pichiwiyaanaachinich kiyaah chii miyumaakutaawaauch waash aaukw kaa chii tich Jew iiyiyiuch.
41 Anitih maak aniyaayiu kaa chiistaaskuhwaakinuut Jesus chiih tikun nihtaauchihchikin aschii kiyaah chiih tikun anitih aahaakaa nihtaa uhchi aapitihch chiipiikimikuhkaan.
42 Aniyaayiu maak kaa iishi chiishikaayich, aa iyaaskiwiihkaakiniwiyich miyaashkaachaau mikushaawiniyiu, kiyaah maak aa paashunaakuniiyich aniyaayiu chiipiikimikuhkaaniyiu, aayuwikw aniyaayiu waahchi anitaah chii ashtaawaach Jesus wiiyaayiu.