Jọn îmun̄ ogwu enenwaan̄ ge mè ijijinu òkaan̄ ukot
12
Nnenimun̄ ikpele inu ijejeen̄ ge òkup uyeke uyeke osibibe ikeke me isinyọn̄.
Mmun̄ ogwu enenwaan̄ ge otapbe ura kubọk ofọnti,
mè isa onyan̄ ibene ukot,
mè ikwuun̄ okpibot ubọọn̄,
eyi òrere akọp mè ntoronyan̄ iba,
me ibot.
2 Owot îmin me lek ogwu enenwaan̄ ya iso mgbọ ìboman gwun̄.
Mgbọ uman okitet,
ikekitaan̄ ukpo.
3 Ofifi inu òkup uyeke uyeke osisibi ikeke si me isinyọn̄.
Eya ìre nga ijijinu ile ge òkaan̄ ukot mè ikaan̄ uwop,
mè inin̄ ikup irio irio.
Ijijinu ya ìkaan̄ ibot jaaba,
mè akọp iko,
melek okpibot ubọọn̄ jaaba me inyọn̄ ibot jaaba kan̄ cha.
4 Ijijinu yi osasa edim kan̄ igbaan̄ irek ge me etete irek ita me lek otutuuk ntoronyan̄ òkup me isinyọn̄ igwook me ijọn̄,
mè inikeke me isi ogwu enenwaan̄ ya uman okitet,
ikikpọ mgbọ ìboman gwun̄ ya ito,
inyi ọmọ iben gwun̄ ya imen mgbọ yaage.
5 Ogwu enenwaan̄ ya oneniman gwun̄ enerieen̄,
ogwu òbonikisa okuba okwukwut ikpulu otutuuk ido linyọn̄ keyi me unye.
Mgbọ yaage îmanbe gwun̄ ya ito,
esisik gwun̄ ya isan̄a me ere ya,
mè isa isi lek Awaji,
mè ogboon̄ ubọọn̄ kan̄.
6 Ogwu enenwaan̄ ya olilibi ifo emen èwê,
ere Awaji onen̄ebe isun̄ iban ọmọ,
inyi ekpọ ọmọ chieen̄ me lek me ere ya obop usen ge mè efit iba mè akọp gweregwen.
7 Akọn̄ obubumu me emen inyọn̄.
Ogwu osat ge ekigwen Maiken mè owuwa ebi osat melek kan̄ etitim akọn̄ me lek ijijinu ya.
Ijijinu ya melek ebi osat kan̄ etitim si ubọk ema ekọtbe.
8 Ire,
ema kpenye lek kubọk Maiken mè ebi melek kan̄.
Eya orọ,
akọn̄ ofefieek ema,
ema efifiin̄ irek kiban̄ me emen inyọn̄.
9 Sa me ikeya ke elap ikpele ijijinu òkaan̄ ukot mè uwop ya,
ọmọ melek ebi osat kan̄,
isibi me emen inyọn̄ igwook me linyọn̄.
Ikpele ijijinu ya ore ijijinu mgbọ ukot ikaan̄ ya eyi ekigwen Yọk,
mè ègwen si Setan,
ogwu òfafiaan̄ otutuuk ebi linyọn̄ inyi eje elọ oniin̄.
10 Nneninọ ida ge okitaan̄ ukpo me emen inyọn̄ ikitumu ibe,
“Me mgbọ keyi,
unyan̄a Awaji kiji înu!
Awaji kiji îjeen̄ ikpele unye kan̄!
Mkpulu kan̄ îsibi utoon̄!
Unye eyi mkpulu kè Karais
ogwu ọmọ oriabe inu,
îsibi si utoon̄!
Mije,
mîben ogwu òkitumu ikeme bọn Nte kiji me isi Awaji
eririeen̄ mè ikarek itọp isibi me emen inyọn̄.
11 Bọn Nte kiji cha mîtim ikpan̄ ọmọ sa me lek eje Gwun̄ Arọọn̄ ya,
melek ema ekekebe ata-ikọ ibe ke ikọ Awaji ìre atikọ,
mè ichieek si ibe ekpan̄ ema,
inyi ema ekwu mkpa mije ikọ Awaji.
12 Eya orọ,
ìnwọọn̄ unwọọn̄,
enyi ebi ìkup me emen inyọn̄,
mè unwọọn̄ ikup me emen inyọn̄!
Ire,
ikpele ujaralek îra inu inyi enyi,
linyọn̄ mè okwaan̄,
mije,
Yọk îra isibi inu me lek kinyi!
Unaan̄-ejit òjot me emen kan̄ ìkare sọntiik,
mije,
îriọọn̄ ibe ke mgbọ kan̄
ìsik sọntiik mgbidim gaalek.”
13 Mgbọ ijijinu ya omun̄be ibe ke mîlap ọmọ inito me linyọn̄,
igọgọọk ogwu enenwaan̄ òman gwun̄ enerieen̄ ya.
14 Ire,
Awaji onyinyi ogwu enenwaan̄ ya uwop iba kubọk echi ikpele igo,
inyi isa iwulu ifo ere enen̄ebe isun̄ iban ọmọ me emen èwê,
mè ekpọ ọmọ chieen̄ me lek acha ita mè okpọkọ,a
inyi ijijinu ya ikakọt ìsoon̄ ọmọ.
15 Ijijinu ya ogbọgbọ mun̄ isibi me otu kan̄ kubọk okwaan̄,
inyi ukot mun̄ ya iben ogwu enenwaan̄ ya ite ichep.
16 Ire,
ijọn̄ okaka otu,
mè imeen̄ okwaan̄ ijijinu ya ogbọbe isibi me otu isan̄a kpai,
mè isa me ikeya itap ubọk inyi ogwu enenwaan̄ ya.
17 Ijijinu ya onanaan̄ ejit enenen me lek ogwu enenwaan̄ ya,
mè inan̄a isi isisi itim akọn̄ me lek bọn kan̄ kechilọ,
òrere ebi ìkisun̄ Ikan Awaji,
mè ikisa me ichechieek itet atikọ Jisọs ochilibe ijeen̄ ema inye.
18 Ijijinu ya onenisi ikeke me inyọn̄ okpoon̄ me agba awaji.