Jọn îmun̄ anam ukpook iba
13
Nnenimun̄ anam ukpook ge okinan̄a me emen mun̄ me emen awaji isibi.
Anam ya ìkaan̄ ibot jaaba,
mè akọp iko,
mè ikwuun̄ akọp okpibot ubọọn̄ me inyọn̄ akọp iko kan̄ cha,
mè ikaan̄ erieen̄ unyechieen̄ me lek ibot cha me ge me ge.
2 Anam ukpook mmun̄be ya ìbet lek egbe ntọọk ntọọk.
Ire,
ukot kan̄ ìkup kubọk ibo nriọk.
Sà otu kan̄ onikup kubọk otu egbe àtat.
Ijijinu ya onenikana unye kan̄,
mè irek ubọọn̄ kan̄,
melek ikpele unye eyi mkpulu kan̄,
inyi anam ukpook ya.
3 Me etete ibot jaaba cha,
ge ìkup kubọk unan osak me lek igbet mkpa,
mè iyaka inita isan̄a.
Anam ukpook ya îke otutuuk ebi linyọn̄ chieen̄ enenen.
Otutuuk ene egbugbuku ikigọọk ọmọ.
4 Ebilene etọtọbọ ebum inyi ijijinu òkaan̄ ukot ya mije îkanabe unye eyi mkpulu kan̄ inyi anam ukpook ya,
mè ikitọbọ ebum si inyi anam ukpook ya,
mè ikitumu ibe,
“Ìre ekene okaan̄ unye kubọk anam ukpook yi?
Ìre ekene obokọt itim akọn̄ me lek kan̄?”
5 Ijijinu ya onyinyi anam ukpook ya unye ibe ikitumu ikpele otu ikọ,
mè ikinye chieen̄ inyi Awaji akọp onyan̄ ini mè iba.a
6 Anam ukpook ya obebene ikinye chieen̄ inyi Awaji,
mè ikitumu erieen̄ Awaji ifiat,
mè ikitumu si emen inyọn̄ ere Awaji olukbe ifiat,
mè ikinye chieen̄ inyi otutuuk ebi ìluk me emen inyọn̄.
7 Ijijinu ya înyi si anam ukpook ya unye ibe itim akọn̄ me lek bọn Awaji,
mè itim ikpan̄ ema.
Înyi ọmọ unye si ibe ikikpulu ebi ido geelek,
mè ebi ife geelek,
mè ebi otu usem geelek,
mè ebi ere geelek me linyọn̄.
8 Otutuuk ebi ìluk me linyọn̄ mêtọbọ ebum inyi anam ukpook ya.
Ebi ìbetọbọ ebum inyi ọmọ ìre ebi kpege erieen̄ kiban̄,
karake sabum enirom linyọn̄,
me emen ikpa ugwem eyi Gwun̄ Arọọn̄ ya ogwu ekpan̄be.
9 Ogwu ikaan̄ utọn̄,
inọ!
10 Ene geelek esun̄be inyi ibe ke mêtet me akọn̄,
mêtet si me akọn̄.
Ene geelek esun̄be inyi ibe ke ìbokwu me otu oge akọn̄,
môkwu si me otu oge akọn̄.
Eya orọ,
îkup me uyọt ibe bọn Awaji geelek ekaan̄ ukarajit,
mè ekeke enye me ichechieek kiban̄ mgbọ geelek.
11 Mgbọ eya orakabe,
nnenimun̄ ofifi anam ukpook okinan̄a me irak ijọn̄ itibi isibi,
mè ikaan̄ iko iba me ibot kubọk gwun̄ arọọn̄.
Ire,
ìkitumu ikọ kubọk ijijinu òkaan̄ ukot ya.
12 Ikekisa otutuuk ikpele unye eyi mkpulu eyi adasi anam ukpook ya okaan̄be ikirọ ikpele inu me isi adasi anam ukpook ya,
mè irọ ibe otutuuk linyọn̄,
mè otutuuk ebi ìluk me linyọn̄ etọbọ ebum enyi adasi anam ukpook ya,
eyi unan osakbe me ibot igbet mkpa,
mè iyaka ita.
13 Ikekirọ ikpele uyeke uyeke inu,
mè igwen ukan̄ inan̄a me isinyọn̄ igwook me ijọn̄ me isi otutuuk ene.
14 Mije ikpele uyeke inu cha enyibe ọmọ unye ibe ikirọ me isi anam ukpook keyilọ ya,
ifafiaan̄ otutuuk ebi ìluk me linyọn̄,
mè inyi ema ida ibe ebot inu ge òbet lek adasi anam ukpook ya,
eyi esabe oge akọn̄ ikep itap unan me lek igbet mkpa,
itutuun̄ isi igat ugwem.
15 Mînyi ọmọ unye ibe itap efuuk me emen inu ya ebotbe inyi adasi anam ukpook ya,
inyi ikifuuk efuuk,
mè itumu ikọ.
Mînyi ọmọ unye si ibe ikpan̄ otutuuk ebi geelek ìjijit itọtọbọ ebum inyi inu ebobot ya òbet lek adasi anam ukpook ya.
16 Anam ukpook òso iba ya onenitet otutuuk ene,
ebi sọntiik mè ebi ilile,
ebi ìbọbọọn̄ ubọọn̄ mè ebi ugbọọn̄,
ebi usun̄ mè ebi ekarege usun̄,
me unye ubọk,
ibe etap iman̄ òriọọn̄ me inyọn̄ ubọk kiban̄ agan̄ ulom,
mè ìre inyọn̄ okwut isi kiban̄.
17 Ene geelek ikakaan̄ge iman̄ òriọọn̄ ya ìkpokọt ilep inu geege,
ìkpokọt si inyam inu geege.
Iman̄ òriọọn̄ ya ìre erieen̄ anam ukpook ya,
mè ìre otu ifuk òkekeke inyi erieen̄ kan̄.
18 Ikọ yi ìkido ibe ebi ene ekaan̄ iriọọn̄-inu sabum mênikọt igobo itet.
Ogwu òkakaan̄ ifuk-ibot môkọt iriọọn̄ inu otu ifuk eyi anam ukpook ya osibibe,
mije,
otu ifuk ya ìkeke inyi erieen̄ ene.
Otu ifuk ya ìre efit gweregwen,
mè akọp gweregwen,
mè gweregwen.