Ebi ata-ikọ iba ebi ìtutumu ikọ Awaji
11
Eya iraraka,
eneninyi emi ujọn̄ọ uti ge òkup kubọk uti itọ-inu,
mè itumu inyi emi ibe,
“Nan̄a keke,
mè je si tọ Uwu Mbuban Awaji,
mè tọ ntook ngwugwa òkup me Uwu Mbuban ya,
mè fuk otu ifuk ebi ìkitọbọ ebum me Uwu Mbuban ya.
2 Ire,
katọ oyet egep Uwu Mbuban Awaji.
Tele ere keya,
katọ,
mije,
mîra ikana ere ya itap me ubọk ebi ekarege ebi Ju.
Ife cha mêjak ama mbuban yi me ukot otuuk kè akọp onyan̄ ini mè iba.
3 Mâria ebi ata-ikọ n̄a iba isibi.
Ema mêtap ofọnti ufieejit,
mè inilook etip eyi Awaji obop usen ge mè efit iba mè akọp gweregwen.”
4 Ebi ata-ikọ iba chi ere uti olifu iba cha,
mè ngugọọn̄ mkpukan̄ iba cha òkeke me isi Okumugwem ogwu òkikpulu otutuuk linyọn̄.
5 Ire ene iweek itatap ema unan me lek,
ukan̄ mônan̄a me otu kiban̄ isibi,
mè itaka ebi ochicha kiban̄ ikpan̄.
Ikeya ke ene geelek òweweek itatap ema unan me lek obokwu.
6 Ebi ata-ikọ iba chi mîkaan̄ unye ichichit isinyọn̄,
inyi ibot ikarep otutuuk mgbọ ema ekilook etip eyi Awaji.
Ema mîkaan̄ unye irọrọ mè mun̄ okwaan̄ geelek ikana eje,
mè ikaan̄ si unye igwegwen esese chieen̄ orukan̄ geelek itap me linyọn̄ otu ifuk mbubak mgbọ geelek òneneme ema.
7 Mgbọ ema isi itumu ikọ Awaji ema ekitumu isan̄a,
anam ukpook ge ònan̄a me emen udọn̄ kpunube okputut ya isibi mônitim etim me lek kiban̄,
mè itim igak ema,
mè ikpan̄ ema.
8 Nkwukwu kiban̄ môlaak ibia me eden̄ oniin̄ me ama ile ya,
eyi ekebe erieen̄ ikigwen Sodọm mè Ijipiti,
ere ema egonbe Okaan̄ kiban̄ ikpan̄ me inyọn̄ uti nkwurieen̄.
9 Ebi geelek ìnan̄a me ido geelek,
mè otu usem geelek,
mè etete ebi ife geelek,
mè ere geelek mênu inikeke ikikpọ nkwukwu ife cha,
mè itele mè elaak ikeya egwe ita mè okpọkọ.
Kpebechieek ibe efuun̄ ema.
10 Ebi linyọn̄ mêbele ejit enenen mije mkpa ebi nriran iba chi.
Ema mêto ijọk,
mè ikichon inu ikana,
ogwu ikup,
oche inu onyi ebi melek kan̄.
Ema mênwọọn̄ unwọọn̄ enenen,
mije,
etip eyi Awaji eyi ebi nriran iba cha elookbe îtap ikpele ufialek me lek ebilene me linyọn̄.
11 Mgbọ egwe ita mè okpọkọ cha orakabe,
Awaji onenifuuk efuuk ugwem itap me emen nkwukwu ebi nriran iba cha.
Ema enanan̄a ikeke,
mè ikeke me ukot kiban̄.
Uga ukpook otetet otutuuk ebi ìmumun̄ ema.
12 Ema eneninọ ida ge ònan̄a me emen inyọn̄ okitaan̄ ukpo igwen ema ibe,
“Ìnene ìna me ere keyi.”
Me chieen̄ otutuuk ebi ochicha kiban̄ ìkeke me ere ya ikikpọ ema,
oduku inyọn̄ okakana ichit ema,
mè iben ema ibene ifo emen inyọn̄.
13 Mgbọ yaage,
ijọn̄ obebene isisik atalek unye unye.
Irek ge me etete akọp irek me ama ile ya ogbugbugbọ igwook.
Obop ene jaaba ekwakwaan̄ me emen sikisik-ijọn̄ ya.
Ukpook otetet ebi ìsisik me ugwem.
Ema ebebene ikitọn̄ Awaji òkup me inyọn̄,
mè ikinyi ọmọ umin.
14 Ikpele uyọrọlek eyi òso iba înu mè iraka.
Eyi òso ita òkinu me ikafiatge mgbọ.
Ogwu osat òso jaaba îwut otita òso jaaba
15 Mgbọ eya orakabe,
ogwu osat òso jaaba oneniwut otita kan̄.
Mgbọ yaage îwutbe,
nnọnọ owuwa ida okitaan̄ ukpo me emen inyọn̄ itumu ibe,
“Otutuuk mkpulu òkup me linyọn̄ îra ikana echi Okumugwem
mè echi Karais kan̄.
Ọmọ môkikpulu mege ire mgbọ ikakaan̄ge itata.”
16 Akọp ebi ugane iba mè ini cha,
ebi ìkweek irek me inyọn̄ ogboon̄ ubọọn̄ kiban̄ me isi Awaji,
egegele igwook me ijọn̄,
mè itọbọ ebum inyi Awaji,
17 mè ikibe,
“Eji mîtọn̄ owu Okumugwem Awaji Ogwu Òkaan̄ Unye Geelek,
ogwu òkukup karake akat,
mè ikup si mgbọ keyi,
mije,
owu omọnọ ikpele unye kwun̄ ikaan̄,
mè ibene ikikpulu me atikọ.
18 Ido ebi kperiọọn̄ owu mînaan̄ ejit inyi owu,
ire,
mgbọ unaan̄-ejit kwun̄ îkem.
Îkem si mgbọ owu obosibi oyerebet me ibot ebi ìkwakwaan̄,
mè ikpe ebi ikwaan̄ kwun̄,
ìrere ebi nriran ukot ikaan̄ mkpukpe,
mè ikpe si otutuuk ebi bọn kwun̄,
mè otutuuk ebi ìnyinyi erieen̄ kwun̄ umin,
bene me ebi sọntiik re lek ebi ilile.
Mgbọ owu obokpan̄ ebi ìkifiat linyọn̄ keyi îre.”
19 Enenichili isotu Uwu Mbuban Awaji eyi òkup me emen inyọn̄ ibook.
Mmumun̄ okop inyan̄a-ibot Awaji me emen Uwu Mbuban ya.
Mgbọ yaage,
isinyọn̄ obebene ikikebe,
mè ikigbugbut,
mè ikisook.
Ijọn̄ okekisisik,
mun̄ ònyenye ikup kubọk ewuuk okekirep unye unye igwook me ijọn̄ kubọk unye otu ibot.