10
Bọn Nte n̄a,
inu mbenbe me ejit,
mè ikiriaak Awaji me lek me ibot ebi Ijeren ìre,
mè Awaji inyan̄a ema.
2 Mije,
emi me lek n̄a mâkọt ikeke ata-ikọ inyi ema ibe,
me atikọ,
ke ema mîkaan̄ ulọk òmimin enenen me lek Awaji.
Ire,
ulọk kiban̄ ya ìkaje melek ata ifuk-ibot.
3 Ema mîtele oniin̄ ata irọrọ eyi ònan̄a me ubọk Awaji,
mè ikiweek ikakana ebi ata irọrọ me oniin̄ eyi akpalek kiban̄ gaalek.
Sa me ikeya,
ema mîjit ikakana ebi ata irọrọ me oniin̄ eyi Awaji osan̄abe isibi.
4 Karais îra isa Ikan kè Mosis isi ire òta kan̄.
Eya orọ,
ikakana ebi ata irọrọ ìyaka inikup inyi ebi geelek ìchechieek me lek kè Karais.
Unyan̄a ìkup inyi otutuuk ene
5 Òfo me lek ikakana ebi ata irọrọ sa me isusun̄ Ikan kè Mosis,
Mosis me lek kan̄ ìtumu ibe,
“Ene geelek òkisun̄ Ikan ìboluk si inan̄a me lek Ikan.”a
6 Ire,
inu ekitumu òfo me lek ikakana ogwu ata irọrọ inan̄a me ichechieek ìre ikeyi,
“Kakitumu me ejit kwun̄ ibe:
Ìre ekene obonene ifo emen inyọn̄?”b
(Eya ìre isasa Karais isibi inu me ijọn̄.)
7 “Kakitumu si ibe:
Ìre ekene obokwala isibi ifo ere òdọdọk ichit?”c
(Eya ìre ibebene Karais isibi me ama ekwukwu inu me linyọn̄.)
8 Ikọ ekitumu ìre ikeyi:
“Ikọ Awaji ya îgbet owu lek enenen,
ìkup me otu kwun̄,
mè ikup si me ejit kwun̄.”d
Etip yi ore etip eyi ichechieek eyi eji ekilook ibe:
9 Ire owu osa otu kwun̄ itumu isibi ibe ke Jisọs Karais ore Okaan̄-ene,
mè ichieek si me ejit kwun̄ ibe ke Awaji îjomo ọmọ me mkpa,
mênyan̄a owu.
10 Mije,
ejit kwun̄ ke obosa ichieek,
mè inwọnọ itip-oyerebet Awaji.
Otu kwun̄ ke obosa itumu ichechieek kwun̄ isibi,
mè ikaan̄ unyan̄a.
11 Ikeya ke ege me Ikpa Mbuban ibe,
“Ogwu geelek òtotoon̄ ọmọ ejit me lek,
kpunu inu geege òborọ inyi esip itet ene ya.”e
12 Kpunu esese geege òkukup me etete ebi Ju mè ebi kpere ebi Ju.
Okaan̄-ene yaage ore Okaan̄ kiban̄ otutuuk,
ọmọ yaage si okisa ikpele ugbana igbana otutuuk ebi geelek ìgwegwen erieen̄ kan̄.
13 Mije,
Ikpa Mbuban îtumu ibe,
“Ene geelek ògwegwen erieen̄ Okaan̄-ene,
mênyan̄a ene ya.”f
14 Ire ikeya,
ìre ema ebejeje igwen erieen̄ ogwu ema kpechieek me lek?
Ofifi si,
ìre ema ebejeje ichieek me lek ogwu ema kpewuuk lek inọ etip ofolek?
Sà ìre ema ebejeje inọ etip ya,
ire ene geege ìkasi ìlook ema etip ya?
15 Ìre ife cha ebejeje ikọt isi ilook etip ya,
ire ìkakaan̄ ogwu òraria ema isibi?
Ikeya ke ege me Ikpa Mbuban ibe,
“Inunu ebi ìkilook ata etip mikijaan̄ igak eke!”g
16 Ire,
ìkare otutuuk ebi Ijeren ebọkọ ata etip ya itap.
Ikeya ke Asaya otumu si ibe,
“Okumugwem,
ìre ekene ochieek etip kiji?”h
17 Eya orọ,
îre inọnọ ata etip okisa ichechieek inu.
Ata etip ya ìre ata etip kè Karais eyi eji ekilook.
18 Ire,
mâdo enyi nu,
ìre ema ebi Ju kpenọ ata etip ya?
Ema otutuuk ene mînọ iso kpai,
kubọk Ikpa Mbuban orọbe inye ibe,
“Ida kiban̄ îtaan̄ ikana otutuuk linyọn̄;
ikọ kiban̄ îso ikana ntutun̄ ere geelek me linyọn̄.”i
19 M̀kpọk ǹdo si,
ìre ebi Ijeren kperiọọn̄ ibot usem ya?
Ema mîriọọn̄!
Me adasi irek,
Awaji ìtumu me otu kè Mosis ibe,
“Mâsa ido ebi ekariọọn̄ge Awaji
irọ inyi enyi emin ejit me lek n̄a.
Mâsa ido ebi kpekikọt igobo
inu geege itet irọ inyi ejit inaan̄ enyi.”j
20 Ikeya si,
Asaya ìkatet ukpook itutumu ibe ke Awaji ìbe,
“Ebi kpeweweek emi ere ebi ìmumun̄ emi,
ebi kpedodo inu ofolek n̄a,
ebiba ke nchili lek n̄a ijeen̄.”k
21 Ire,
ofolek ebi Ijeren ke Awaji otumu ibe,
“M̀kpọkpọ inyana ubọk iba n̄a itele,
ibene me ewelegwe ifit egwe,
ikigwen,
mè ikiriaak ebi unye-ibot kechi,
ebi ìkikpaka ibot,
ibe enu.
Ema kpechieek inunu.”l