Iluluk ugwem eyi Ekwukwu Mbuban okikpulu
8
Eya orọ,
mgbọ keyi,
itip-oyerebet geege ìkayaka ìkup ìnyi ebi geelek ìrere ge melek Jisọs Karais.
2 Mije,
inan̄a me lek kè Jisọs Karais,
ikan Ekwukwu Mbuban eyi òkinyi ene ugwem,
înyan̄a emi isibi me irak ubọk ikan ijo inu eyi òkisa mkpa ijet ene.
3 Inu Ikan kè Mosis ikakọtge ìrọ,
mije akpalek ijo inu kiji orọbe inyi Ikan ya iwọ,
Awaji îrọ inu ya sa me lek îriabe Gwun̄ kan̄ gaalek inu me mbet ebilene ebi ìkirọ ijo inu,
inyi inisa lek kan̄ igwa ngwugwa iben ijo inu ebilene isan̄a.
Sa me ikeyi,
Awaji îfieek oyerebet itip ijo inu òkup me emen ebilene,
ìrere ebi ijo,
4 mè irọ otutuuk otu Ikan kè Mosis ya iso me emen kiji,
inyi eji enwọnọ itip-oyerebet,
mije,
eji ekiluk ugwem igọọk me nteme eyi Ekwukwu Mbuban,
kpeyaka ikiluk igọọk me ijo ulọk eyi akpalek ijo inu kiji.
5 Ebi ìkiluk ugwem igọọk me akpalek ijo inu kiban̄ ekikeek ubọk ema mêsabe ikirọ inu akpalek ijo inu ya okitọ inyi ema mgbọ geelek.
Ire,
ebi ìkiluk ugwem igọọk me nteme eyi Ekwukwu Mbuban ekikeek ubọk ema mêsabe ikirọ inu Ekwukwu Mbuban okiteme ema mgbọ geelek.
6 Ekiket irọrọ inu akpalek ijo inu okiweek mgbọ geelek ìkisa mkpa ijet ene.
Ire,
ekiket irọrọ inu Ekwukwu Mbuban okiweek mgbọ geelek ìkisa esuuk mè ugwem ikakaan̄ge itata ijet ene.
7 Mije,
ejit ene eyi ijo inu okikpulu ìkichacha Awaji,
ìkakima irọrọ Ikan Awaji,
ìkpokọkọt si irọ.
8 Ebi akpalek ijo inu kiban̄ okikpulu kpekikọt irọ inu òkibele Awaji ejit.
9 Ire,
eyi kinyi,
ìkare akpalek ijo inu kinyi okitọ ikọ inyi enyi,
îre Ekwukwu Mbuban okitọ,
mè ire Ekwukwu Awaji ikup me emen kinyi me atikọ.
Ene geelek ikakaan̄ge Ekwukwu kè Karais me emen kan̄,
ene ya ìkare ogwu eyi Karais.
10 Ire Jisọs Karais ikup me emen kinyi,
akpalek kinyi îkwu,
ìkpoyaka isi ikwaan̄ inyi ijo inu.
Ire,
ekwukwu kinyi òwa me ugwem,
mije,
enyi mîkana ebi ata irọrọ me isi Awaji.
11 Ire Ekwukwu Awaji ogwu òjojomo Jisọs Karais me mkpa ikiluk me emen kinyi,
ọmọ ogwu òjojomo Jisọs Karais môtap ugwem me akpalek kinyi ya òbokwukwu sa me Ekwukwu kan̄ ogwu òkiluk me emen kinyi.
12 Eya orọ,
bọn Nte n̄a,
eji mîkaan̄ urieek ikpekpe òfo me lek ubọk iluk ugwem.
Urieek ya ìkare iluluk ugwem igọọk me lek akpalek eyi ijo inu kiji.
13 Mije,
ire enyi ikiluk ugwem kubọk akpalek ijo inu ya okiweek,
enyi mêkwaan̄.
Ire,
ire enyi isa me unye eyi Ekwukwu Mbuban ikpan̄ ijo inu cha enyi ekisa akpalek kinyi irọ,
enyi mêluk ugwem ikakaan̄ge itata.
14 Ebi geelek Ekwukwu Mbuban okikpulu,
ebiba ere bọn Awaji.
15 Mije,
Ekwukwu Mbuban ogwu Awaji onyibe enyi ìkporọ inyi enyi eketet ukpook,
mè ekpọk esi enin̄ usun̄.
Kpan̄asi ikeya,
Ekwukwu Mbuban ìborọ inyi enyi ekana bọn Awaji,
mè ekegwen Awaji,
“Papa!
Nte n̄a!”
16 Ekwukwu Awaji me lek kan̄,
melek ekwukwu òkup eji me emen ekigbaan̄ itumu otu ge,
mè ikirọ inye ibe ke eji ìre bọn Awaji.
17 Mgbọ keyi eji erebe bọn Awaji,
eji mêbọkọ ìrot eyi Awaji osun̄be inyi ebi kan̄,
mè igọọk Jisọs Karais igbaan̄ ikaan̄ uche me lek ìrot ogwu Ute osun̄be iban ọmọ.
Mije,
ire eji igọọk Karais imun̄ ufialek îmun̄be me atikọ,
eji mêgọọk ọmọ si igbaan̄ ikaan̄ ujamgbugbo kan̄.
Ujamgbugbo eyi mgbọ òkup me isi
18 Mfuk isan̄a,
mè imun̄ ibe ke ufialek eji ekimun̄ mgbọ keyi ìkaso inu ebesa itọ me lek ujamgbugbo eyi Awaji obochili inyi eji.
19 Otutuuk inu geelek Awaji orombe ìkikup me mbem-lek ikikpọ mgbọ Awaji môsan̄abe ebi ìrere bọn kan̄ isibi ijeen̄ otutuuk ene.
20 Awaji îrọ inyi otutuuk inu îrombe ikup me irek usun̄ ere ema kpebekọt irọ inu geege òsibi oruru.
Ìkare inu chi me lek kiban̄ eweek ikukup ikeya,
îre Awaji osa me nkeek kan̄ isun̄ ema ikeya.
Ìsun̄ ema ikeya,
21 mè ikikpọ chieen̄ ibe ke ọmọ môsan̄a ema isibi me irek usun̄ ya ere ema ebekup ijọ,
mè isa ema itap me utelelek òkakaan̄ ujamgbugbo,
eyi esun̄be inyi bọn Awaji.
22 Eji mîriọọn̄ ibe,
mege inire mgbọ keyi,
ke otutuuk inu geelek Awaji orombe òkito mfi me irak uga ufialek kubọk nwa-owot uman okitet.
23 Ire,
ìkare ema gaalek,
eji me lek kiji ebi Awaji onyibe Ekwukwu Mbuban kubọk adasi mfut me lek ugbana òkinu me isi,
eji si mêkito mfi me emen kiji ike eji ekupbe me mbem-lek ikikpọ mgbọ Awaji môbọkọbe eji itap isa irọ bọn kan̄,
mè inwene akpalek kiji.
24 Îre ikpọchieen̄ keyi eji ekaan̄be ke esa inyan̄a eji.
Kpunu ene geege òkikpọ chieen̄ ikakaan̄ inu îwuukbe lek ikaan̄ isan̄a.
Eya orọ,
ikakaan̄ ikpọchieen̄ me lek inu eyi esabe chieen̄ imun̄ ìkare ikpọchieen̄ kubọk ge.
25 Ire,
ire eji ikikpọ chieen̄ ikakaan̄ inu eji kpewuuk lek ikaan̄,
eji ekikakat ejit ikikup ikpọ inu ya.
26 Ikeya si,
îre Ekwukwu Mbuban okitap ubọk inyi eji mgbọ lek kiji owọbe.
Eji kpekiriọọn̄ ubọk ògbegbe ibe eji ekeriaak uriaak.
Ire,
Ekwukwu Mbuban me lek kan̄ okibọkọ uriaak kiji iriaak inyi eji,
mè ikito mfi òdọdọk enenen me emen uriaak ya,
eyi ikọ otu ìkpokọt ibum ibot.
27 Awaji ogwu òkiriọọn̄ otutuuk inu òkup ene me ejit,
îriọọn̄ inu òkup Ekwukwu Mbuban me ejit,
mije,
Ekwukwu Mbuban ìkibeek mbeek me ibot bọn Awaji igọọk me nkeek Awaji.
Eji mîgak ebi ìkitim ikpan̄ me linyọn̄
28 Eji mîriọọn̄ ijaan̄ lek ibe ke Awaji ìkisa otutuuk inu igbaan̄ irọ ata ikwaan̄ inyi ebi ìmumun̄ ọmọ me chieen̄,
òrere ebi ọmọ ogwenbe ibe enerọ inu ọmọ odọmọbe isun̄.
29 Mije,
ebi Awaji owuukbe lek iriọọn̄,
ebiba ere ebi îwuukbe lek igobo isibi isun̄ esese,
inyi enebet lek Gwun̄ kan̄,
mè ekup kubọk Gwun̄ kan̄ okupbe,
inyi Gwun̄ kan̄ ya inikup me etete kiban̄ kubọk adasi gwun̄ me etete owuwa ngwan̄.
30 Ebi îgobobe isun̄ esese cha,
ebiba si ke îgwen.
Ebi îgwenbe cha,
ebiba si ke îben itip-oyerebet isan̄a me ibot.
Ebi îbenbe itip-oyerebet isan̄a me ibot,
ebiba si ke înyi ujamgbugbo kan̄.
31 Eyi Awaji orọbe otutuuk inu chi inyi eji,
ìre keke ke eji ebeyaka itumu?
Ire Awaji ikeke inyi eji,
ìre ekene obokọt irọ ikeme eji?
32 Ire Awaji iria ogwu Gwun̄ inu ibe inibọkọ ufialek me ibot kiji otutuuk ene,
ìkatet ìkaan̄,
ìre Awaji ya ìkpofat inyi eji otutuuk inu geelek me ikike igbaalek Gwun̄ kan̄ ya înyibe eji?
33 Ìre ekene obokọt ifuk ikan ikeme ebi Awaji ogobobe inyi lek kan̄?
Awaji me lek kan̄ okiben itip-oyerebet isan̄a ema me ibot.
34 Ìre ekene obotip ema oyerebet?
Jisọs Karais ogwu òkwukwu,
mè ijomo si me mkpa,
ọmọ òwa osikibe ikweek me agan̄ ubọk ulom Awaji ikitumu ikọ ibot kiji inyi Awaji.
35 Ire ikeya,
ìre ekene obokọt iche eji isan̄a me lek imumechieen̄ Karais okaan̄be me lek kiji?
Ìre uyọrọlek môkọt,
sà ìre uga ufialek,
sà ìre saasaak,
sà ìre una inorie,
sà ìre ijeje njak,
sà ìre unan,
sà ìre mkpa?
Kpunu inu geege òbokọt iche eji isan̄a me lek imumechieen̄ Karais okaan̄be me lek kiji!
36 Kubọk egebe me Ikpa Mbuban ibe,
“Mije kwun̄,
eji ekikup me otu mkpa egwe geelek;
emọnọ eji kubọk arọọn̄ ebesa isi ifieek ebek.”a
37 In̄-in̄,
kpan̄asi ikeya,
me emen inu chi geelek,
eji mîgak ebi ìkitim ikpan̄ me linyọn̄ keyi,
sa me unye kè Jisọs Karais ogwu òmumun̄ eji me chieen̄!
38 Mije,
emi nriọọn̄ ijaan̄ lek ibe ke kpunu inu geege òbokọt iche eji isan̄a me lek imumechieen̄ Awaji,
mè ìre mkpa mè ìyaka ire ugwem,
mè ìre ebi osat Awaji,
mè ìyaka ire ijo erumun̄,
mè ìre inu òkukup me mgbọ keyi,
mè ìyaka ire echi òkup me isi,
mè ìre unye eyi mkpulu geelek,
39 mè ìre ere òbebene ichit,
mè ìre ere òdọdọk ichit,
mè ìyaka irere ofifi inu geelek me etete otutuuk inu geelek Awaji orombe.
Kpunu inu geege obokọt iche eji isan̄a me lek imumechieen̄ Awaji okaan̄be me lek kiji,
eyi eji ekaan̄be sa me lek kè Jisọs Karais Okaan̄ kiji.