Ikween̄-inu ònan̄a me lek ikan òbọbọp olom mè nwa
7
Bọn Nte n̄a,
enyi ìre ebi ìrọriọọn̄ ikan ijaan̄.
Ìre enyi kperiọọn̄ ibe ke ikan ìkikaan̄ unye me lek ene mgbọ ene okupbe me ugwem gaalek?
2 Eji esa enenwaan̄ òbat olom ekween̄ inu.
Ikan ìbọp ogwu enenwaan̄ òbat olom ikam me lek ogwu olom me mgbọ ogwu olom okupbe me ugwem gaalek.
Ire,
ire ogwu olom ikwu,
ogwu enenwaan̄ ya ìkayaka ìkup me irak ikan olom mè nwa ya.
3 Ire ogwu enenwaan̄ òbat olom itele ogwu olom,
mè isi ibat ofifi ene,
me ere ogwu olom okupbe me ugwem,
ogwu enenwaan̄ ya îrọn̄ ikan òsi-ugan.
Ire,
ire ogwu olom ikwu iraka sabum înisi ibat ofifi ene,
ikan òsi-ugan ìkayaka ìbọp ọmọ.
Mgbọ ya,
ọmọ môkọt ibat ofifi ene,
mije,
ọmọ ìkup me lek kan̄.
4 Ìkup ikeya si me lek kinyi,
bọn Nte n̄a,
me inu ofolek Ikan kè Mosis.
Mije enyi melek Karais erebe akpalek ge sa me mkpa kan̄,
enyi mîkwaan̄ isibi itele Ikan kè Mosis.
Me mgbọ keyi,
enyi mîkana ebi eyi Karais ogwu òjojomo me mkpa,
inyi eji eneluk ugwem òkaan̄ oruru enyi Awaji.
5 Mije,
mgbọ eji ekupbe me irak ubọk akpalek ijo inu kiji,
ijo ulọk eyi Ikan kè Mosis okisan̄a isibi ke eji ekigọọk,
mè ikiluk ugwem eyi òkisa mkpa ijet eji.
6 Mgbọ keyi,
mije eji ekwaan̄be isibi itele inu ya òbọbọp eji ikaan̄,
eji mîsibi itele Ikan kè Mosis.
Eya orọ,
eji mêsi ikwaan̄ inyi Awaji me aya oniin̄ eyi Ekwukwu Mbuban,
ìkayaka ìre me oka oniin̄ eyi Ikan kè Mosis egege isibi.
Ijejeen̄ ofolek Ikan kè Mosis mè ijo inu
7 Ìre keke ke eji ebeyaka itumu?
Ìre Ikan kè Mosis ìre ijo inu?
In̄-in̄,
ìkpokọt ire ikeya!
Ikwaan̄ Ikan okirọ ìre ikpọkpọk mbum ijo inu.
Me atikọ,
mebe kpunu Ikan,
emi kpamariọọn̄ inu ijo inu orebe.
Mije,
mebe Ikan ìkatumu ibe,
“Kakaan̄ ijo ulọk me lek inu ofifi ene,”
emi kpamariọọn̄ ibe ke îkaan̄ inu ekigwen chieen̄ ile.a
8 Ire,
mgbọ yaage Ikan osan̄abe irek isibi,
ijo inu onwenween̄ lek iraka inin̄ emen ugwem n̄a,
mè inisan̄a owuwa ijo ulọk eyi chieen̄ ile òkup esese esese isibi me emen n̄a.
Mije,
ere ikan ikakupge,
ijo inu ìre inu òkwukwu.
9 Emi me lek n̄a,
nluk ugwem mgbọ ge me kpunube ikan.
Ire,
mgbọ ikan onube,
ijo inu obebene unye me emen n̄a,
10 mè irọ inyi emi ǹkwu.
Ikan eyi morọ inyi ene iluk ugwem,
irere lek n̄a,
ìyaka inisa mkpa ijet emi.
11 Mije,
mgbọ yaage ikan osan̄abe irek isibi,
ijo inu onenifiaan̄ emi,
mè ije me irak ikan ya inikpan̄ emi ito.
12 Eya orọ,
Ikan kè Mosis me lek kan̄ îkup me mbuban,
nteme geelek enyibe me Ikan kè Mosis ya si îkup me mbuban,
mè itat,
mè inwọn.
13 Ire ikeya,
ìre Ikan ya òrere inu ònwọnwọn ìyaka inikana mkpa inyi emi ni?
In̄-in̄,
ìkpokọt ire ikeya!
Ire,
ijo inu ìje me irak inu ònwọnwọn inisa mkpa ijet emi,
inyi otutuuk ene esa eriọọn̄ ibe ke ijo inu ìre ijo inu me atikọ.
Ikeya si,
inan̄a me lek ikan,
îsibi utoon̄ ibe ke ijo inu ìre inu òfefieek enenen isaba iraka iman̄.
Nyan̄anyan̄a òkup me ugwem ene
14 Eji mîriọọn̄ ibe ke Ikan ìre inu eyi ekwukwu.
Ire,
emi ǹkiluk ugwem igọọk me orọmijọn̄ eyi akpalek.
Ijo inu îlep emi isa irọ usun̄ inyi lek kan̄.
15 Ǹkakiriọọn̄ inu nkirọ.
Mije,
inu geelek mweekbe irọrọ,
ǹkakirọ.
Ire,
inu nchabe,
eya ke nkirọ.
16 Mije nriọọn̄be ibe ke inu nkirọ ìre inu nkaweekge irọrọ,
nchieek ibe ke Ikan kè Mosis înwọn.
17 Eya ìkijeen̄ ibe ke ìkare emi me lek n̄a nkirọ inu ya;
ke îre ijo inu òkup emi me emen okirọ.
18 Nriọọn̄ ibe ke kpunu ata inu geege òkup me emen n̄a,
òrere me emen akpalek ijo inu eyi nkaan̄be.
Mije,
îkilọk emi irọrọ inu òtatat,
ire,
ǹkakikọt ìrọ.
19 Bak me lek,
inu nkirọ ìkare ata inu eyi nkiweek irọrọ.
In̄-in̄,
kpan̄asi ikeya,
ijo inu eyi nkaweekge irọrọ,
eya ore inu mkpọkpọ ikirọ mgbọ geelek.
20 Ire emi nkirọ inu nkaweekge irọrọ,
ìsibi ibe ke ìkayaka ìre emi nkirọ inu ya;
ke îre ijo inu òkup emi me emen okirọ.
21 Inu nyakabe iniweek imun̄ me emen n̄a ìre ikeyi:
Mgbọ geelek mweekbe irọrọ ata inu,
ìkire ijo inu ijo inu gaalek ke nkirọ.
22 Me ijọn̄ ijọn̄ ejit n̄a,
mma irọrọ Ikan Awaji.
23 Ire,
îkaan̄ ofifi ikan òkisi ikwaan̄ me emen otutuuk nriro lek n̄a,
mè ikitim akọn̄ me lek ata ikan eyi òkup me emen ejit n̄a,
mè irọ inyi emi ǹkana usun̄ ǹnyi ikan eyi ijo inu eyi òkitọ ikọ me emen n̄a.
24 Jei,
njijin lek n̄a îmin!
Ìre ekene obotaba emi isibi me ubọk akpalek keyi òbosa emi ijet mkpa?
25 Itọn̄ ikup inyi Awaji ibe ke mîtaba emi isibi sa me lek Okaan̄ kiji Jisọs Karais!
Eya orọ,
emi me lek n̄a,
me ijọn̄ ijọn̄ ejit n̄a,
emi ìre usun̄ inyi Ikan Awaji.
Ire,
me emen akpalek ijo inu nkaan̄be,
emi ìre usun̄ inyi ikan eyi ijo inu.