Ujamgbugbo Okumugwem îgwu ikom inu Uwu Mbuban
43
Ene ya onenisa emi ije inu me otunchit agan̄ mbum-ura. 2 Mmumun̄ ujamgbugbo eyi Awaji ebi Ijeren okinan̄a me agan̄ mbum-ura ikinu. Ida kan̄ okekikput kubọk ida agbugbuk mun̄. Otutuuk lek ijọn̄ ya okekitoon̄ miai, mije ujamgbugbo Awaji ya. 3 Ilaak ọkpọchieen̄ ya mmun̄be ìbet lek ilaak ọkpọchieen̄ mmun̄be mgbọ nnube ibanijijaka ama Jeruselem, mè echi mmun̄be me agba okwaan̄ Keba. Mgbọ yaage, nrọrọn̄ ikana isi ichit me ijọn̄. 4 Ujamgbugbo Okumugwem ìje itibi otunchit agan̄ mbum-ura inin̄ Uwu Mbuban ya. 5 Ekwukwu Awaji ojijibi emi ibene, mè isa emi inu me oyet egep agan̄ emen. Mmumun̄ ujamgbugbo Okumugwem onin̄be ijot Uwu Mbuban ya.6 Nneninọ ọmọ okitumu ikọ inyi emi inan̄a me emen Uwu Mbuban, mè ene ge me agba lek n̄a okekebe. 7 Okumugwem onenitumu inyi emi ibe, “Gwun̄ ebilene, ere keyi ìre ere ogboon̄ ubọọn̄ n̄a, mè ere akajit ukot n̄a, ere mâkupbe me etete ebi Ijeren ire mgbọ geelek. Ebi uwu kè Ijeren melek ebi ubọọn̄ kiban̄ kpebeyaka ififila erieen̄ mbuban n̄a ofifi sa me itọtọbọ ebum inyi ofifi awaji, mè sa me lek inu ema ekirọ me lek nkwukwu ebi ubọọn̄ kiban̄ me isi-ijọn̄ kiban̄ cha. 8 Mgbọ ema esabe inyọn̄ isotu kiban̄ inito igba inyọn̄ isotu n̄a, mè isa ubọk afọn̄ kiban̄ inito iriaak ubọk afọn̄ n̄a, melek ukpọk ukpọk lek agba uwu ge me etete kiban̄ melek n̄a, ema esasa filafila inu kiban̄ inichichaka erieen̄ mbuban n̄a. Eya orọ nsabe me unaan̄-ejit ijijaka ema isan̄a. 9 Mgbọ keyi, ema eda itọtọbọ ebum inyi ofifi awaji cha esan̄a emi me lek, mè eda si nkwukwu ebi ubọọn̄ kiban̄ cha esan̄a emi me lek, inyi emi ǹnenluk me etete kiban̄ ǹre mgbọ geelek.
10 “Gwun̄ ebilene, kpa ubọk Uwu Mbuban ya okupbe nyi ebi Ijeren, mè ema etọ ubọk edọmọbe uwu ya, inyi esip ijo inu kiban̄ itet ema. 11 Ire esip itet ema mije otutuuk ijo inu ema erọbe, rọ ema eriọọn̄ ubọk edọmọbe Uwu Mbuban ya, mè ubọk eneen̄be isun̄, jeen̄ ema ere ekije inin̄ cha mè ere ekije isibi cha, mè otutuuk ubọk edọmọbe, mè otutuuk ikan kan̄ geelek. Ge inu chi tap me ikpa me isi kiban̄, inyi ema esun̄ otutuuk inu geelek edọmọbe ofolek kan̄, mè eketet otutuuk kan̄ enye, mè ekerọ.
12 “Ikan Uwu Mbuban ìre ikeyi: ‘Otutuuk ere òkakana ibot ogoon̄ ya ere Uwu Mbuban okekebe okokop, ìre ere òkup me mbuban ichit.’ Eyi ore ikan Uwu Mbuban.”
Ntook ngwugwa
13 Mîsa ujọn̄ọ otitọa itọ ntook ngwugwa. Udọn̄ agbugbuk kan̄ ìre agbagba otubọk ita me ugwuuk, mè agbagba otubọk ita si me uwele. Akpọk ukpọk otu etapbe ikat ikana otu utọn̄ kan̄ ìre agbagba otubọk ge. Ubene ntook ya ìre ikeyi: 14 Bene me udọn̄ agbugbuk kan̄ me ijọn̄ si re lek agọm eyi agan̄ ijọn̄ ìre agbagba otubọk gweregwen, sà uwele agọm ya ore agbagba otubọk ita. Bene me lek agọm ijija òkup me agan̄ ijọn̄ si re lek agọm ilile òkup me agan̄ inyọn̄ ìre ejit ge, sà uwele agọm ya ore agbagba otubọk ita. 15 Ubene ere isọk ukan̄ ìre ejit ge, iko ini osọsọọk isibi me ere isọk ukan̄ ya. 16 Ere isọk ukan̄ ya ìre ìkike me isi ini kan̄, ejit ita me ujọn̄ọ, ejit ita si me uwele. 17 Agọm kan̄ ìre si ìkike me isi ini kan̄, ejit ita mè agbagba otubọk gweregwen me ujọn̄ọ, ejit ita mè agbagba otubọk gweregwen si me uwele. Ukpọk otu kan̄ ìre agbagba otubọk ge mè mgbidim me uwele ikat ikana, udọn̄ agbugbuk kan̄ ore agbagba otubọk ita ikat ikana. Otitop kan̄ ìyaka isi ida agan̄ mbum-ura.
18 Inenibe emi, “Gwun̄ ebilene, Ogwukaan̄-ene Okumugwem ìtumu ibe ikeyi: Ikan igwagwa ngwugwa ewọwọp iriọk mè inyanyan eje igwook me lek ntook mgbọ isinama isan̄a ìbore ikeyi: 19 Owu mônyi ebi ngwugwa, ebi otoko kè Libai, ìrere ebi owot iman kè Jadọk, ebi ìkije igbet emi lek inisi ikwaan̄ inyi emi, gwun̄ orie eriembuuk ge, inyi esa egwa ngwugwa ijo inu. Emi Ogwukaan̄-ene Okumugwem ntumu. 20 Owu môsa usini eje anam ya igwook me lek iko ini òkup me lek ntook ya, mè igwook si me lek usọk ini eyi agọm agan̄ inyọn̄, mè igwook si me lek otu utọn̄ ya ikat ikana. Ikeya ke owu obosa igbama lek ntook ya, mè irọ esuuk me lek. 21 Owu môneniben orie eriembuuk ngwugwa ijo inu ya isa isibi me ere Uwu Mbuban isi iwọp me ere esan̄abe isun̄ inyi.
22 “Me òso usen iba, owu mônyi orie ebot eyi kpunube ìroon̄ me lek, inyi esa egwa ngwugwa ijo inu, mè egbama lek ntook ya kubọk esabe eriembuuk igbama. 23 Osigbama lek ntook ya isan̄a, owu môneninyi ogbaragbat orie eriembuuk ge kpunube ìroon̄ me lek, mè orie arọọn̄ ge kpunube ìroon̄ me lek, eyi ònan̄a me urum arọọn̄. 24 Osisa anam cha inu me isi Okumugwem, ebi ngwugwa mênenigwook uchi me lek, mè isa igwa ngwugwa ewọwọp iriọk inyi Okumugwem.
25 “Usen jaaba ke owu obokinyi orie ebot ngwugwa ijo inu me usen geelek, mè ikinyi si ogbaragbat orie eriembuuk mè orie arọọn̄ ònan̄a me urum arọọn̄, anam iba cha kpebekaan̄ ìroon̄ geege me lek. 26 Usen jaaba ke ebesa irọ esuuk me lek ntook ya, mè igbama lek, mè isa me ikeya igbana ntook ya. 27 Usen chi isiso, ibene me òso usen jeeta kan̄ inyi isi, ebi ngwugwa mênenikisa inu ngwugwa ewọwọp iriọk mè inu ngwugwa esuuk kinyi cha inikigwa me inyọn̄ ntook ya. Emi mânenibele ejit me lek kinyi. Emi Okumugwem ntumu.”