Agwut ebi ngwugwa
42
Ene ya onenisa emi ije ifo agan̄ inyọn̄ isi inin̄ oyet egep eyi agan̄ oyet, mè isa emi initap me agwut òkikpọ oyet egep Uwu Mbuban ya, eyi òkikpọ uwu òkup me agan̄ inyọn̄. 2 Uwu eyi òkikpọ isotu agan̄ inyọn̄ ìre akọp ejit iba mè go me ujọn̄ọ, mè akọp mè ejit iba mè agbagba otubọk gweregwen me uwele. 3 Me ere òjọn̄ọ ere iso ejit go inan̄a me lek oyet egep agan̄ emen, melek agan̄ òkikpọ agba oyet eyi oyet egep agan̄ oyet, agba oyet ge ìkikpọ ge me lek inyọn̄ ita cha òkup me lek uwu ya. 4 Me isi agwut cha, oniin̄ emen uwu ge òwa eyi uwele kan̄ orebe ejit iba mè agbagba otubọk gweregwen, sà ujọn̄ọ kan̄ ore akọp ejit iba mè go. Isotu kiban̄ ìkup me agan̄ inyọn̄. 5 Agwut echi inyọn̄ ìsisiik, mije, agba oyet cha îbọkọ ere iwele igak echi agwut echi ijọn̄ mè echi etete me lek uwu ya. 6 Agwut echi òkup me òso inyọn̄ ita cha ìkakaan̄ atà kubọk oyet egep cha okaan̄be. Eya orọ, echa ìsisiik igak ukpa agwut echi osiki ijọn̄ me echi etete. 7 Îkaan̄ agba uwu me ntut agan̄ oyet òje ugban ugban melek agwut cha mè oyet egep agan̄ oyet; ujọn̄ọ kan̄ ìre akọp mè ejit iba mè agbagba otubọk gweregwen. 8 Ujọn̄ọ agwut echi òkikpọ oyet egep agan̄ oyet ìre akọp mè ejit iba mè agbagba otubọk gweregwen, sà echi òkikpọ Uwu Mbuban ore akọp ejit iba mè go. 9 Agwut osiki ijọn̄ cha îkaan̄ isotu me agan̄ mbum-ura ire ene ije me agan̄ oyet egep agan̄ emen inin̄.10 Me lek ujọn̄ọ agba uwu eyi oyet egep Uwu Mbuban ya eyi ntut agan̄ oyet, eyi òkikpọ oyet egep agan̄ emen, mè ikikpọ agba uwu ntut agan̄ oyet, îkaan̄ agwut echi òkukup inyi agan̄ mbum-ura.a 11 Agwut cha îkaan̄ agba oyet òje me isi kiban̄. Agwut cha ìkup kubọk agwut echi òkup me agan̄ inyọn̄; ujọn̄ọ mè uwele kiban̄ ìre ìkike melek echi kecha, isotu kiban̄ echi ekije inin̄ mè echi ekije isibi ìre ubọk edọmọbe echi kechilọ. 12 Ike isotu agwut echi agan̄ inyọn̄ okupbe, ikeya si ke echi agan̄ osiki okup. Isotu ge òwa me ibot agba oyet ya eyi òje ugban ugban melek agba uwu ònyanyana inyi agan̄ mbum-ura. Ekije me isotu ya inin̄ agwut cha.
13 Ene ya onenitumu inyi emi ibe, “Agwut agan̄ inyọn̄ mè echi agan̄ osiki òkikpọ oyet egep Uwu Mbuban ya, ìre agwut mbuban. Ere keya ke ebi ngwugwa ebi ìkije igbet lek Okumugwem ebekirie inu ngwugwa òkup me mbuban ichit. Ere keya ke ema ebekisun̄ inu ngwugwa òkup me mbuban ichit, òrere inu ngwugwa akpa, mè inu ngwugwa ijo inu, mè inu ngwugwa awọ, mije, ere ya ìre ere òkup mbuban. 14 Ebi ngwugwa isinin̄ ere òkup mbuban ya, ema kpebesibi inin̄ oyet egep agan̄ oyet, îtata ema ewọwọọk ofọnti mfaka kiban̄ cha igwook, mije, ofọnti cha îre ofọnti òkup mbuban. Ema ebetap ofifi ofọnti sabum ema èneje egbet agan̄ ere òkup inyi ebilene ikike.”
15 Mgbọ îtọbe agan̄ emen Uwu Mbuban isan̄a, inenisa emi ije itibi otunchit agan̄ mbum-ura, mè isi itọ otutuuk agan̄ keya ikat ikana. 16 Inenisa uti itọ-inu ya itọ agan̄ mbum-ura ikat ikana, isisibi efit mè akọp ejit iba mè ejit go. 17 Îtọ si agan̄ inyọn̄ ikat ikana, isisibi efit mè akọp ejit iba mè ejit go. 18 Inenitọ agan̄ osiki, isisibi efit mè akọp ejit iba mè ejit go si. 19 Inenikana ifo agan̄ ichep-ura, mè itọ si, isisibi efit mè akọp ejit iba mè ejit go si. 20 Îtọ otutuuk agan̄ ini cha. Îkaan̄ agba uwu òkakat ikana agan̄ ya, eyi òcheche ere mbuban ya isan̄a me lek ere ikike ya. Ujọn̄ọ kan̄ ìre efit mè akọp ejit iba mè ejit go, uwele kan̄ si orere efit mè akọp ejit iba mè go.