Ufialek òkup inyi ebi Iferem
28
Môfieek inyi okpibot ubọọn̄ ya,eyi ebi usa-miin̄ me Iferem ekisa igugo lek,
ikpele uja kan̄ îkana ikup kubọk ajakajak òrọriọkọ;
ọmọ ìkeke me ibot iteke ijọn̄ òkisibi mfut,
ire, miin̄ îtap ebi kan̄ ndide.
2 Ìkpọ, Ogwukaan̄-ene îkaan̄ ogwu unye ge ònyenye lek.
Ene ya ìbet lek egwijo ibot mgbọlọ,
mè efet egwijo òkigwak ere,
mè ikup kubọk unye ukot ibot,
mè agbugbuk òkimeen̄ ere;
ene ya môsa ubọk kan̄ ida otutuuk inu
geelek me unye igwook me ijọn̄.
3 Okpibot ubọọn̄ ebi usa-miin̄ Iferem ekisa igugo lek ya,
mêsa ukot ijak ikam me ijọn̄.
4 Ajakajak ya, eyi ikpele uja kan̄
okanabe ikup kubọk ajakajak òrọriọkọ,
eyi òkeke me ibot iteke ijọn̄ òkisibi mfut,
môkup kubọk mfut figi òreren̄e sabum mgbọ irọrọkọ uko,
eyi ene ge isimumun̄, îra igbeme ikaan̄ me ubọk,
mè itọp itap me otu imen.
5 Me usen ya, Okumugwem Ogwukaan̄ Inyọn̄ mè Ijọn̄
môre ọgbọn ubọọn̄ òjajaan̄,
mè ire okpibot ubọọn̄ òkakaan̄ mgbugbo
isa inyi ebi mêsikbe me lek ebi kan̄.
6 Ọmọ mônyi ogwu òkisibi
oyerebet ekwukwu unen oyerebet,
ọmọ môre unye inyi
ebi ìkup me otunchit ikirieen̄ akọn̄ ikpebe.
7 Ebi ngwugwa mè ebi nriran
ekinyenyen̄e mije miin̄ ukan̄,
mè ikana mbubut, mije miin̄.
Ema ekigbugbugbe mgbọ ema ekimun̄ ilaak ọkpọchieen̄,
mè ikitutun mgbọ ema ekifieek oyerebet.
8 Ema mîgbọ igbọ ichit otutuuk inyọn̄ ikasi kiban̄,
kpunu ere geege òtatana.
9 Ema ekibe, “Ìre ekene ke îkisa me lek ijejeen̄ ifuk-ibot?
Ekene ke îkikpa etip kan̄ iwele inyi?
Ìre asasa nsabọn ebanbe ebe mọnọ,
sà ìre ebi ìraraka otu ebe ayaya ni?
10 Mije, ikọ kan̄ ìkup wọlọwọlọwọlọ,
‘Rọ ikeyi, rọ ikilọ; rọ ikilọ, rọ ikeyi;
onineen̄ keyi, onineen̄ keyilọ;
onineen̄ keyilọ, onineen̄ keyi,
sọntiik me ere keyi, sọntiik me ere keyilọ.’ ”
11 Eya orọ, Awaji môkpọk ochichi,
mè isa esese otu usem itumu ikọ inyi ife chi.
12 Ìtumu inyi ema ibe, “Ere iwọ efuuk ya ire eyi,
ìtele ebi ìgagak iweek etap efuuk.
Ere ebetọbọ efuuk ire eyi.”
Ire, ema kpechieek inọnọ.
13 Eya orọ, ikọ Okumugwem
okaan̄be inyi ema ìre ikeyi:
“Rọ ikeyi, rọ ikilọ; rọ ikilọ, rọ ikeyi;
onineen̄ keyi, onineen̄ keyilọ;
onineen̄ keyilọ, onineen̄ keyi;
sọntiik me ere keyi, sọntiik me ere keyilọ;”
inyi ema eje, mè etọbọ ukot, mè enan̄a erọn̄ udun̄ udun̄,
mè esak unan, mè erọn̄ me ufe, inyi etet ema.
14 Eya orọ, ìgban̄ ikọ Okumugwem,
enyi ebi ìkirọ ene ochak,
enyi ebi ìkikpulu ife chi ebi ìluk me Jeruselem.
15 Mije, enyi ekigugo lek ibe,
“Eji mînyan̄a ibot melek mkpa,
eji melek ama ekwukwu mîkaan̄ mgbaan̄-nchieek.
Mgbọ osusut mônube kubọk mun̄ ile òmeen̄ ere,
ìkpore eji lek,
mije, eji esa ataak ikwek lek,
mè isa ofiaan̄ ilet lek kiji.”
16 Eya orọ, Ogwukaan̄-ene Okumugwem ìtumu ibe ikeyi,
“Ìkpọ, emi nra iwat ewuuk ge igwuun̄ me Sayọn,
ewuuk etọtọ ikpọ,
unye otu ewe ewuuk ibot usọk, ebesa itọbọ ọdọ ònyenye.
Ene geelek òchechieek me lek ewuuk ya,
ukot kan̄ ìbonyenye me ijọn̄.
17 Emi mâsa unen oyerebet irọ olik itọ-uwu,
mè isa ata irọrọ irọ otitọ itọ-inu-itat.
Ibot mgbọlọ môgwọk ataak ya
enyi esabe ikikwek lek ifiin̄,
mun̄ mômeen̄ ere enyi ekisa ilet lek isan̄a.
18 Inyan̄a-ibot ya enyi enyan̄abe melek mkpa, mêchichaka,
mgbaan̄-nchieek enyi egbaan̄be
ichieek melek ama ekwukwu,
ìkpokeke.
Mgbọ osusut òkup kubọk mun̄ ile òmeen̄ ere isinu,
ìbojajak enyi ikpukpuku.
19 Otu ifuk mgbọ geelek eyi mun̄ ya môbokinu,
ìbokikwọkwọkọ enyi ifiin̄.
Ewelegwe geelek, mè ikarek, mè eririeen̄,
ìbokikwọkwọkọ enyi ije.”
Igogobo etip yi itet
ìbore inu ikpele ukpook inyi enyi.
20 Mkpilaak îgbidim enenen,
kpebekọt ilaak inyana lek me inyọn̄,
ekwut ichit-lek ìkawele,
kpebekọt isa ichit lek ikat ikana.
21 Okumugwem môtọbọ ijibi kubọk îrọbe me ogoon̄ Perajim,
mônaan̄ ejit kubọk înaan̄be me iteke ijọn̄ Gibiọn.
Ìbonirọ ikwaan̄ kan̄, nke nke ikwaan̄ kan̄,
ìbonirọ nninaan̄ kan̄, uyeke uyeke nninaan̄ kan̄.
22 Eya orọ, ìtet ochak enyi ekichak ya ìkaan̄,
inyi mkpọn kinyi ikataba ìfiik enyi ebek;
Mije, nnọ me otu Ogwukaan̄-ene
Okumugwem Ogwukaan̄ Inyọn̄ mè Ijọn̄,
ibe ke îben me ejit ijijijaka otutuuk linyọn̄ igwook.
23 Ìgban̄ utọn̄, mè inọ ida n̄a,
ìriọọn̄ ubọk ìgban̄, mè ìnọ ikọ otu n̄a.
24 Ìre ogwu uko òbowop mfut
ìkpọkpọ ijọn̄ gaalek ikibak,
ìkawop inu geege?
Sà ìre ìkpọkpọ ikirọkọ ijọn̄,
mè ikikpukpuku igwook ikeya ikike?
25 Mgbọ ọmọ isinen̄e inyọn̄ ijọn̄ ya isun̄ inyi ilibi ìkike,
ìre ọmọ ìkpowop dîn mè kumìn,
mè iwop akpa wit me onineen̄ me onineen̄,
mè iwop akpa balì me irek eyi kan̄,
mè iwop si akpa sìpelit me irek eyi kan̄?
26 Îre Awaji kan̄ ojeen̄ ọmọ,
mè iteme ọmọ ubọk ìbowop.
27 Kpekisa m̀gbele ibọn̄ ikpọk isan̄a me lek dîn,
kpekikpukpọt ukot uji
ekpirikpo isa isan̄a ikpọk me lek kumìn.
Ire, ekisa mkpat ibọn̄ ikpọk isan̄a me lek dîn,
mè esa uti ebọn̄ kumìn enyiaan̄ ikpọk.
28 Ekikọkọk akpa isa irọ fituru;
eya orọ, ikerere ebọbọn̄ ire mgbọ geelek,
mè isa ukot uji ekpirikpo ilibi me inyọn̄,
mè ìre esa inyinya ijak,
kpebekọt ikọk iriọk ikeya.
29 Otutuuk kechi si ìnan̄a me ubọk
Okumugwem Ogwukaan̄ Inyọn̄ mè Ijọn̄,
nteme kan̄ îkup mgbugbo,
iriọọn̄-inu kan̄ îdọk isaba iraka iman̄.