Mênyan̄a ebi Ijeren
27
Me usen ya,Okumugwem môsa oge akọn̄ kan̄
òkup unan unan mè imin mè ikaan̄ unye,
isulu mgbugbo anam ejit okwaan̄ osusut,
ijijinu ya òkinyọnyiọọn̄ inan̄a,
mgbugbo anam ejit okwaan̄,
òrere ijijinu ya òkililọkọ me ijọn̄;
Okumugwem môkpan̄ ikpele ijijinu ejit okwaan̄ ya.
2 Me usen ya,
mêkọt okwa ofolek uko gerep òjajaan̄ ya, ibe:
3 “Emi, Okumugwem, nkikpọ chieen̄ me lek uko ya;
emi nkigwook mun̄ me lek mgbọ geelek.
Ikarek mè eririeen̄, emi nkibem,
inyi ene geege ikatap unan me lek.
4 Ǹkayaka ìkaan̄ unaan̄-ejit.
Mebe ke ukpak mè abọm egbe ochichini emi me isi,
kè ǹto akọn̄ me lek kiban̄,
mè ntap ukan̄ m̀wọp ema ǹsan̄a.
5 Ire, ire ema ima itatap ibot me ubọk n̄a,
inyi emi m̀kput ema lek,
tele ema erọ esuuk melek n̄a,
iin̄, kè ema erọ esuuk melek n̄a.”
6 Mgbọ me isi, Jekọp môtibi ugwun̄-ijọn̄,
Ijeren môtibi oduuk, mè igwook ajakajak,
mè ito mfut igwook ichit otutuuk linyọn̄.
7 Ìre Awaji îsut ebi Ijeren osusut inye,
kubọk îsutbe ebi ìkisut ema?
Sà ìre îkpan̄ ema iwa,
kubọk îkpan̄be ebi ìkpakpan̄ ema?
8 Okumugwem îrieen̄ ema isi igwook me ujọn̄ọ ere,
kubọk mkpukpe ògbegbe ijo inu ema erọbe.
Ìsa unye efet kan̄ ililaba ema isibi,
kubọk usen efet agan̄ mbum-ura okiwut.
9 Eya orọ, ubọk ebesa irọ esuuk me ibot nrọ-nlọ kè Jekọp,
eyi òbore si mkpukpe òje me
lek ibeben ijo inu kan̄ isan̄a,
ìre ikeyi:
Mêrọ otutuuk ewuuk ntook ngwugwa
ikana ikup kubọk ndun̄ ekọkbe iriọk;
mêgbugbọ si uti yọk Asera mè ntook nsensi igwook,
inyi geege ikayaka ìkeke.
10 Ama mgban akọn̄ okanabe môyat ita,
môkana ama ejitbe itele,
mè ikpọ ilọ chieen̄ kire emen èwê;
ere ya ke bọn eriembuuk ebekibọm urie,
ere ya ke ema ebekililam,
mè itaka inwan̄ isan̄a me otu agọọk otutuuk uti ere cha.
11 Agọọk kan̄ isichiaak isan̄a, mêfafaan̄ igwook,
ebibaan̄ mêsasa isọk ukan̄.
Mije ebi ife chi ìre ebi kpekaan̄ ngobo-ntet,
eya orọ, Ogwu Òrorom ema ìkakaan̄ ema nsan me lek;
Ogwu Òrorom ema ìkponyi ema nnwọn-isi kubọk ge.
12 Usen ya isire, Okumugwem môbene me ibot okwaan̄ Yuferetis igen̄ enyi isi ire lek oka okolo Ijipiti, mè ititiin̄ enyi ge ge, jei bọn ebi Ijeren. 13 Usen ya, mêwut ikpele otita. Ebi ìkup me jirijit me Asiria, mè ebi ìlibi mkpat akọn̄ inu me Ijipiti mênu initọbọ ebum inyi Okumugwem me inyọn̄ ogoon̄ mbuban me Jeruselem.