Okwa itọn̄
26
Me usen ya, mêkọt okwa keyi me lek ijọn̄ Juda:Eji mîkaan̄ ama ònyenye,
unyan̄a eyi Awaji ore mgban mè ukwek ama kiji.
2 Ìgwuku otunchit cha ìbook,
inyi ido òkirọ ata irọrọ,
eyi òkekeke inye me lek Awaji, iraka inin̄.
3 Ogwu òsa owu ibieen̄ ejit,
owu môsun̄ me òjot òjot esuuk,
mije, owu ke îtoon̄ ejit me lek.
4 Ìtoon̄ ejit me lek Okumugwem mgbọ geelek mgbọ geelek,
mije, Okumugwem,
iin̄ Okumugwem, ore ewuuk mgbọ geelek.
5 Îda ebi ìluk me ere òbebene ito,
mè igele ama òkaan̄ utelelek me ere òbebene isiki;
ìgegele ọmọ ito akpakpa me ijọn̄,
mè ida ọmọ imaan̄ me emen mfuun̄.
6 Ukot ene môjak ọmọ igọm;
ebi ugbọọn̄ mêjak ọmọ me ukot,
ebi una mêto ukot me inyọn̄ kan̄ isaba iraka.
7 Oniin̄ ebi ata irọrọ ìnenen;
owu Ogwu Ònenen, owu okirọ oniin̄ ebi ata irọrọ irọt.
8 Okumugwem, eji ekiluk ugwem
igọọk me unen oyerebet kwun̄,
mè ikikup ikpọ owu;
erieen̄ kwun̄ mè etip kwun̄
ore inu òkilọk ibot ejit kiji.
9 Me eririeen̄, owu okilọk emi me otutuuk ejit n̄a,
me atikọ, ekwukwu n̄a ìkiweweek owu;
owu osikifieek oyerebet inyi ebi linyọn̄,
ebi linyọn̄ mîra ikikween̄ ata irọrọ.
10 Ata ejit ekaan̄be me lek ogwu ikpak,
ìkaborọ ibe ogwu ikpak ikween̄ ikekirọ ata irọrọ;
ikerere me lek ijọn̄ ere ekirọ inu òtatat,
ogwu ikpak ìbokirọ eyi kan̄ nlilọ nlilọ.
Ìkabomun̄ umin ubọọn̄ Okumugwem.
11 Okumugwem, ubọk kwun̄ îjibi ibene,
ire, ema kpemun̄ lek.
Tele ema emun̄ ulọk okaan̄be me lek ebi kwun̄,
inyi esip itet ema,
tele ukan̄ owu osọkbe iban ebi ochicha kwun̄
itaka ema iriọk.
12 Okumugwem, owu mônyi eji esuuk,
mije, otutuuk inu geelek eji erọbe, îre owu orọ inyi eji.
13 Okumugwem, Awaji kiji, owuwa ebi mkpulu mîkpulu eji,
ire, îre erieen̄ kwun̄ gaalek ke eji ekimin.
14 Ema mîkwaan̄ ita, kpeyaka iluk ugwem ofifi,
ekwukwu ebi ìkwakwaan̄ ìkpobonan̄a ikeke.
Owu onyi ema osusut, mè ijijaka ema isan̄a,
mè itutuku inu geelek ebekisa ikeek ema isan̄a kpai.
15 Owu orọ ido kiji iwele owot,
owu Okumugwem orọ ido kiji îwele owot.
Owu otap umin isọkọ inyi lek kwun̄;
owu ochak okike ijọn̄ ido kiji iwele.
16 Okumugwem, mgbọ ukwook okemebe ebi kwun̄,
ema enu me lek kwun̄;
mgbọ osusut kwun̄ onin̄be ema lek,
ema kpeyaka ikọt iriaak uriaak ibene ida.
17 Ike nwa-owot uman okitet
okimian̄a, mè ikito unan,
ikeya ke eji ekup me isi kwun̄, jei Okumugwem.
18 Eji mîkup me owot, mè ikimian̄a inyi unan uman-gwun̄,
ire, eji eman efet ikike.
Eji kpesa unyan̄a ijet ebi linyọn̄,
eji kpemaan̄ aya isi ife geege igwook me linyọn̄.
19 Ire, ebi kinyi ìkwakwaan̄ mêluk ugwem,
nkwukwu kiban̄ mêjomo.
Enyi ebi ìlaak me emen mfuun̄,
ìbolo chieen̄, mè ìtaan̄ ukpo unwọọn̄.
Mbat kwun̄ ìre mbat otu ewelegwe,
sa me lek kan̄, ijọn̄ mônirọ
inyi ebi kan̄ ìkwukwu egat ugwem.
20 Ìna ebi n̄a, ìnin̄ emen agwut kinyi,
mè ìgwuk isotu ìkwek lek kinyi;
ìlet lek kinyi sọntitiik mgbọ,
mege unaan̄-ejit kan̄ môtabe.
21 Ìkpọ, Okumugwem òkinan̄a me ere îlukbe inu,
ìbonisut ebilene me linyọn̄
osusut mije ijo inu ema erọbe.
Ijọn̄ môkpọk mbum eje ene efiatbe me inyọn̄ kan̄,
ìkpoyaka ikpọk ilet ebi
ekpan̄be me inyọn̄ kan̄ ofifi.