Mîtọn̄ Okumugwem
25
“Jei Okumugwem, owu ore Awaji n̄a;mâbene owu ifo inyọn̄, mè itọn̄ erieen̄ kwun̄,
mije, owu orọ uyeke inu,
inu cha owu odọmọbe karake akat,
owu òkekeke inye irọ otutuuk iso kwok kwok.
2 Owu orọ ama ile ikana èdọ otiton,
mè irọ ama mgban akọn̄ ikana ǹrioon̄;
ama mgban akọn̄ ebi ichen ìkayaka ìre ama ofifi,
kpebeyaka ikpọk inama mege ire mgbọ geelek.
3 Eya orọ, ebi unye mênyi owu umin,
ama ebi ido ìkinye ejit ikup
gboi mêtet owu ukpook me lek.
4 Mije, owu ore ere ogwu ugbọọn̄ okitap ibot,
mè ere ogwu una okitap ibot me emen ukwook kan̄;
ere ekilet lek me lek egwijo,
ere ekitap ibot me lek uyok
mije, uriak-lek ebi unye-ejit ekiriak
ìbet lek egwijo okiwut ibieen̄ me lek agba uwu,
5 mè ikup si kubọk uyok ura me emen èwê.
Owu okirọ inyi okput ebi ichen ekitap iwọ;
kubọk ogugo oduku inyọn̄
òchichit isi ura okirọ uyok iwọ otu,
ikeya si ke mêrọ okwa unwọọn̄ ebi unye-ejit ekikọt
ibaak ema me otu.
6 Me inyọn̄ ogoon̄ keyi,
Okumugwem Ogwukaan̄ Inyọn̄ mè Ijọn̄
môto ijọk inyi otutuuk ebi ido geelek,
ijọk inorie òkaan̄ ufuk ufuk anam me emen,
mè ijọk miin̄ echi oka oka mgbọ cha;
ijọk ufuk ufuk anam,
mè ijọk atalek nchat otu oka miin̄ etembe iruk.
7 Me inyọn̄ ogoon̄ keyi, ọmọ môjijaka
ekwut ya òkakana otutuuk ebi ife geelek ikat,
mè ekwut akpọk ile òchichit otutuuk ebi ido geelek.
8 Okumugwem môjijaka mkpa ire mgbọ ikakaan̄ge itata;
môtuku otutuuk ene mun̄ ito isan̄a me chieen̄;
môsan̄a esip me isi ebi kan̄ me otutuuk linyọn̄.
Mije, îre Okumugwem otumu.
9 “Me usen ya, ebi ene mêkibe,
‘Me atikọ, Awaji kiji ire eyi,
eji etoon̄ ọmọ ejit me lek, inyanyan̄a eji.
Okumugwem ire eyi, ọmọ ke eji etoon̄ ejit me lek;
kè eji ebele ejit, mè enwọọn̄ unwọọn̄ me emen unyan̄a kan̄.’
10 “Ubọk Okumugwem môkup me lek ogoon̄ keyi;
ire, ọmọ môjak Mowabu igọm,
kubọk ekijak ekpirikpit akpa igọm me emen ifin anam.
11 Mgbọ ya, ebi Mowabu mêwele ubọk isan ikiweek inwọnwọnọ,
kubọk ogwu òkigwọk ugwọk osan ubọk ikigwọk ugwọk.
Ire, Okumugwem môgele ugumulek kiban̄ cha isiki,
ifiọk geelek ema mêsabe ubọk kiban̄ irọ, ìbokpukput.
12 Mgban ama kiban̄ cha òbebene ifo inyọn̄,
ọmọ môsan̄a ito,
ìboyayaka ema imaan̄ akpakpa me ijọn̄,
mè ikeme ema itap me emen mfuun̄.”