Okumugwem môjijaka linyọn̄
24
Ìkpọ, Okumugwem mônirọ linyọn̄ ikana ukpọk ukpọk,mônijijaka linyọn̄;
ìbokakana inyọn̄ ijọn̄ ikwuun̄,
mè iyiyala ebi ìluk me lek kan̄ ikpọk ichon ikana ere.
2 Inu yaage obokup inyi
ebi ene melek ebi ngwugwa,
mè ogwu usun̄ enerieen̄ melek ogwu nte uwu kan̄,
mè ogwu usun̄ enenwaan̄ melek nga uwu kan̄,
mè ogwu òkilelep melek ogwu okinyanyam,
mè ogwu efọọkbe inu me ubọk
melek ogwu òfọfọọk inu me ubọk ene,
mè ogwu ekaan̄be urieek
melek ogwu òkakaan̄ urieek.
3 Mêrọ linyọn̄ ikana ukpọk ukpọk,
mè ifum ọmọ inọọn̄.
Mije, îre Okumugwem otumu ikọ yi.
4 Linyọn̄ îchiaak ita,
otutuuk inu òtibi me lek kan̄ îriọkọ isan̄a;
mfut lek ijọn̄ îyiyeek, mè iriọkọ isan̄a,
ebi isi ile me linyọn̄ mîyiyeek ita.
5 Ebi linyọn̄ mîfifila linyọn̄ igwook;
ema mîrọn̄ Ikan Awaji,
mè ifiat ikan kan̄ egebe isun̄,
mè ichichaka inyan̄a-ibot òkukup mgbọ geelek ya.
6 Eya orọ, ufieek-otu Awaji îrie linyọn̄ isan̄a,
awọ îtet ebi ìluk me linyọn̄.
Eya orọ, mîwọp ebi ìluk me linyọn̄ iriọk,
ene inen mè inen gaalek esik.
7 Aya miin̄ ìkayaka ìsibi, olik gerep îriọkọ;
otutuuk ebi ìkibele ejit mîgwuku mfi igwook.
8 Utop òkup me lek ekpete îta,
okput ebi ìkibele ejit îwọ,
uneen̄ òkinyi ene unwọọn̄ îriaan̄.
9 Ebi ene kpeyaka ikọt okwa isa ikinwọ miin̄,
miin̄ ukan̄ ìyaka ikijajat me otu ebi ìkinwọnwọ.
10 Ama ya egwakbe igwook îyat;
otu isotu otutuuk uwu geelek, mîgon ichit.
11 Ukpo miin̄ òkitaan̄ me lek oniin̄,
unwọọn̄ îkana ugwuuk,
ubelejit îchep me linyọn̄.
12 Ama îkpukpuku igwook,
otunchit geelek îmumian̄a ita.
13 Mije, ikeyi ke ìbokup me linyọn̄,
mè etete ebi ido geelek,
ìbokup kubọk mgbọ ekisisik uti olifu igen̄ mfut me lek,
mè ikup si kubọk ekirọọn̄ lek olik
gerep mgbọ ekirọkọ uko gerep.
14 Ema mêbene ida itaan̄ ukpo unwọọn̄,
me agan̄ ichep-ura,
ema mêtọn̄ umin ubọọn̄ Okumugwem.
15 Eya orọ, me agan̄ mbum-ura, ìnyi Okumugwem itọn̄,
me lek achọ geelek òkup me okwaan̄ ile,
ìbene erieen̄ Okumugwem, Awaji ebi Ijeren, ìfo inyọn̄.
16 Me okputut linyọn̄, eji ekinọ ekikọt okwa
ikitọn̄ umin Ogwu Ata Irọrọ.
Ire, emi mbebe, “Jei, mwọlọ! Mwọlọ ita!
Eyi n̄a îta!
Ebi ofiaan̄ mêkifiaan̄ ene!
Iin̄, ebi ofiaan̄ mêkifiaan̄ ene ijo ijo!
17 Ukpook mè udọn̄ mè ufe okup ikikpọ enyi,
enyi ebi ìluk me linyọn̄.
18 Ogwu ilibi ukpook, môrọn̄ inin̄ udọn̄,
ogwu isibi me udọn̄, mônin̄ me ufe.
“Mîchili nruruk akpabin inyọn̄ ibook,
ejit ijọn̄ òkisisik.
19 Linyọn̄ îbum isan̄a ikana okpọkọ okpọkọ,
linyọn̄ ìtọtọbọ ibum isan̄a,
linyọn̄ îsisik atata kan̄.
20 Linyọn̄ ìkigbugbe kubọk ogwu miin̄ osabe,
mè ikisisik kubọk atanga efet okiwut ibieen̄,
ulobo ijo inu îrọbe môkeme ọmọ enenen,
mônan̄a irọn̄, ìkpoyaka inan̄a ikeke ofifi.
21 “Me usen ya, Okumugwem môsut
urum òkup me akpabin inyọn̄ osusut me akpabin inyọn̄,
mè isut ebi ubọọn̄ linyọn̄ osusut me linyọn̄.
22 Ebekwọkwọọk ema igbaan̄ ititiin̄,
kubọk ekigbaan̄ ebi mkpọn itap me udọn̄;
mêgoon̄ ema ikam me mkpọn;
owuwa usen isiraka, mêneninyi ema osusut.
23 Mgbọ ya, onyan̄ môben esip,
ura môbọkọ esip,
mije, Okumugwem Ogwukaan̄
Inyọn̄ mè Ijọn̄ môkeke ubọọn̄
me Jeruselem me inyọn̄ ogoon̄ Sayọn,
ebi ugane ama mêmumun̄ ujamgbugbo kan̄.