Nriran ofolek ama Taya
23
Eyi ìre nriran ofolek ama Taya:Enyi uji ile ebi ama Tasis,
ìfieek ejit ìto ito!
Mije, mîjijaka Taya igwook,
kpunu uwu, kpunu atasuk ere uji okinitoon̄;
etip yi ke enyi enọ me achọ Kitim.a
2 Enyi ebi ìluk me inyọn̄ achọ, ìfieek ejit,
enyi ebi uga mbit ama Sidọn,
ebi ebi ìkikọp okwaan̄ etapbe ubọọn̄.
3 Ekisa akpa ònan̄a me okwaan̄ Sikorub
ikọp okwaan̄ okwaan̄ isaba owuwa isi mun̄ inu,
mfut uko agba lek okwaan̄ Nali okinyi ebi Taya ikpoko.
Taya ore ere ebi ido geelek ekininyam ewe.
4 Jei, Sidọn, esip îgak owu isi,
owu ama mgban akọn̄ agba okwaan̄ ile,
mije, okwaan̄ ìkitumu ibe,
“Uman ìkatetet emi, ǹkamaman si bọn,
ǹkakpukpo bọn ebirieen̄,
ǹkabọbọọk si bọn ebibaan̄.”
5 Mgbọ etip isire Ijipiti,
ema mêkup me ufieejit ofolek
etip ema enọbe ofolek Taya.
6 Ìsaba okwaan̄ ìtoon̄ me Tasis;
enyi ebi ìluk me inyọn̄ achọ, ìfieek ejit!
7 Ìre ama kinyi òkikput inyi unwọọn̄ ya ore eyi,
oka ama ya òkukup karake akat?
Ìre ama òraria ebi kan̄ ibe esi
echili ofifi ama me ujọn̄ọ ujọn̄ọ ere,
mè esi eluk me ere cha ore eyi?
8 Ìre ekene odọmọ inu òkup ikeyi ikeme Taya,
ama òkikwuun̄ ebi ofifi ife okpibot ubọọn̄,
eyi ebi mbit kan̄ erebe ebi ibot,
ama ebi ewe kan̄ erebe ebi isi ene me linyọn̄?
9 Îre Okumugwem Ogwukaan̄
Inyọn̄ mè Ijọn̄ odọmọ inu ya,
isasa ida ugumulek òje melek umin ito,
mè itap esip me isi ebi ekinyi umin me linyọn̄.
10 Owu, ama Tasis, baak meen̄ otutuuk lek ijọn̄ kwun̄,
kubọk okwaan̄ Nali okirọ,
kpunu inu òboyaka ikwek owu.
11 Okumugwem îbene ubọk kan̄ inyana itele
me inyọn̄ isi mun̄ okwaan̄,
mè irọ inyi owuwa ido ekeran.
Înyi ida ikeme ebi Fonisia,
înyi ida ibe ejijaka ama mgban akọn̄ kiban̄ esan̄a.
12 Inenitumu ibe, “Owu, ama Sidọn, ama ejijakabe igwook,
owu òkpoyaka inwọọn̄ unwọọn̄!
“Tọbọ jibi, saba toon̄ me Saipọrọs,
ikerere me ere keya, owu òkpokaan̄ isiki-efuuk.”
13 Ìkpọ-nu ido ebi Kalidia,
ife chi ebi kpekup me lek inu geege,
ebi ebi Asiria erọbe ido kiban̄ ikana
ere ebi kè anam emen èwê ekiluk.
Ema enanama uwu-oket isa ikpa mbin akọn̄ ikana,
mè ifufum uwu ebi ubọọn̄ kiban̄ cha inọọn̄,
mè irọ inyi ama ya ikana ǹrioon̄.
14 Enyi uji ile ebi Tasis, ìfieek ejit ìto ito;
mîgbugbọ ama mgban akọn̄ kinyi igwook.
15 Me mgbọ ya, mêwuuk ama Taya akọp acha jaaba, òrere otu ifuk acha ugwem ogwu ubọọn̄ ge. Ire, mgbọ akọp acha jaaba cha isi ita, inu òborọ Taya ìbobet lek inu ekọtbe me emen okwa ogwu òje oyet ibe:
16 “Ben uneen̄ ile, mè je kana emen ama,
owu ogwu òje oyet ewuukbe itele;
kwak uneen̄ top, mè kọt owuwa okwa tap me lek,
inyi mêyaka ikpọk ikeek owu.”
17 Akọp acha jaaba ya isita, Okumugwem môyaka ikpọk ikeek Taya. Ire, ọmọ môgwugwu ikom ifo lek mbubek kan̄, mè ikisi ije oyet me lek ebi ido geelek me linyọn̄ iso. 18 Oruru ìbokaan̄ mè mkpukpe kan̄, ebesusun̄ esese inyi Okumugwem, kpebetap me uwu ikpoko, kpebebubọọk si isun̄. Oruru kan̄ ìbokup inyi ebi ngwugwa ìkisi ikwaan̄ me isi Okumugwem, ebiba mênenikisa irie inorie ijot owot, mè ikisa itap ata ofọnti ichit akpalek.