Nriran ofolek Jeruselem
29
Môfieek inyi Arien,aArien, ama Debit olukbe!
Ìfuk acha ìsọkọ me lek acha,
mè ìkirie ijọk ìkpọ me lek me acha me acha.
2 Ire, emi mâto ùrioon̄ ikeme Arien;
ebi kan̄ mêfieek ejit, mè ito lek,
ọmọ môkana ntook ere isọk
ukan̄ me atikọ isa inyi emi.
3 Mâkpa mbin akọn̄ ikana owu okokop,
mâgwuun̄ uwu-oket akọn̄ ikwek owu,
mâsa unye nroon̄ akọn̄ inu
inikpa mbin akọn̄ ikwek owu.
4 Mêda owu itọbọ me ijọn̄, ijọn̄ ke owu obokup ikitumu ikọ,
emen achiaan̄ ke owu obokup ikirọ otu mumumuk,
owu môkup me ijọn̄ ikisan̄a amọn ebi ekwukwu,
ikọ kwun̄ ìbokitaan̄
nun̄unun̄unun̄u isibi me emen achiaan̄.
5 Urum ebi ochicha kwun̄
cha ebewa kubọk nkwukwuuk mfuun̄,
urum ebi ife cha ìkirọ nnaan̄ ebewa
kubọk mfufe akpa efet okiben iwut ije.
Me uwuuk-lek, chit chieen̄ mè bolo,
6 Okumugwem Ogwukaan̄ Inyọn̄ mè Ijọn̄ mônunu
melek nsook-isinyọn̄ mè sikisik-ijọn̄ mè ikpele okput,
melek unye efet mè egwijo,
mè alọm ukan̄ òkitataka inu iriọk.
7 Urum otutuuk ebi ido ebi
mêjibibe akọn̄ inu me Arien,
ebi ìbenitim akọn̄ me lek kan̄, mè igbugbọ mgban kan̄,
ebekana isibi kubọk mun̄umun̄ ilaak,
mè ilaak ọkpọchieen̄ emun̄be me eririeen̄.
8 Ìbokup kubọk ogwu uraafiọọn̄ omumun̄ ilaak
ubọk ọmọ okirie inorie,
ire, mgbọ îbolobe chieen̄,
owot kan̄ ìlaak ukpọk ukpọk melek uraafiọọn̄;
môkup si kubọk ogwu ebek orakbe
omumun̄ ilaak ubọk ọmọ okinwọ mudim,
ire, mgbọ îbolobe chieen̄, ikekiweek inyi urak-ebek.
Ikeya ke ìbokup me lek urum ebi akọn̄ otutuuk ido cha,
ebi ìbejibi akọn̄ inu me lek ogoon̄ Sayọn.
9 Ìkup ìkikpọ, mè otu kinyi ibuk,
ìchit chieen̄ kinyi, mè ìkana ebi ǹnàan̄.
Îsa enyi kubọk miin̄, ire, ìkare miin̄ osa enyi,
enyi mîgbugbe, ire, ìkare miin̄ ukan̄ ogbugbe enyi.
10 Okumugwem îria erumun̄ eyi uga ilaak inikeme enyi;
îchọkọ enyi ebi nriran chieen̄ igọm,
mè ichit ebi ìkimọọn̄ inu ibot.
11 Me lek kinyi, otutuuk ilaak ọkpọchieen̄ yi ìkup kubọk inu egebe me emen ikpa ekakat, mè igọm otu ichit, eyi esabe inyi ogwu òriọọn̄ ikpa ibe ifuk, ene ya ofọfọọk ibe, “M̀kpakọt ifuk, mije, mîgọm otu ichit.”
12 Enenisa inyi ogwu ikariọọn̄ge ìfuk ikpa ibe ifuk-nu,
ogwa ofọfọọk ibe, “Emi ǹkariọọn̄ ikpa.”
13 Okumugwem ìbe,
“Ife chi ekije igbet emi lek me otu otu,
mè ikimin emi me ukpọk-otu ikike,
ire, ejit kiban̄ îjọn̄ọ ere me lek n̄a.
Ebum ema ekitọbọ inyi emi
ìre ikan ebilene ejeen̄be,
eyi ema ekween̄be itap me ibot.
14 Mije keyi, emi mâkpọk irọ ibe ife chi eriki enyinya,
uyeke inu ge môkigọọk ge me udun̄;
iriọọn̄-inu mônan ebi ìriọọn̄ inu kiban̄,
ngobo-ntet ebi kiban̄ ìkakaan̄ ngobo-ntet môlibi ichep.”
15 Môfieek inyi ebi ìkije emen emen
ikilet otitọt kiban̄ me lek Okumugwem,
ebi ìkirọ ikwaan̄ kiban̄ me emen udun,
mè ikibe, “Ìre ekene omun̄ eji? Sà ìre ekene oriọọn̄ eji?”
16 Enyi ekimọnọ inu ntikwo ntikwo!
Enyi ekimọnọ ibe ke ogwu òbot ugọn̄ ìyaka ire arika!
Ìre inu òkup me ugwem môbe ogwu òrorom ọmọ,
“Ìkare owu orom emi”?
Sà ìre ugọn̄ môbe ogwu òbobot ọmọ,
“Owu ìre mbubut”?
17 “Ìre ìkare ekito urọk ibe: ‘Me mgbidim mgbidim mgbọ,
oron Lebanọn môkana ata ijọn̄ uko,
ata ijọn̄ uko ya mônenikana aka oron’?
18 Me usen ya, ebi ìnan mênọ ikọ
ònan̄a me emen ikpa ekakat,
ebi chieen̄ ochitbe mêmọọn̄
inu itibi emen àbaan̄ mè udun.
19 Ebi ìsisiki lek mêyaka ikpọk
ibele ejit me emen Okumugwem;
ebi una ubọk mêkpọk ibele ejit
me emen Ogwu Mbuban ebi Ijeren.
20 Ebi unye-ejit mêchieen̄ ita kpai,
ebi ìkirọ ene ochak mêniniin̄ ichieen̄,
otutuuk ebi ijo inu okitop me lek irọrọ mêkwaan̄ ita;
21 ebibi ekisa otu ikọ ge irọ ene ikana ogwu òlọ ikọ,
mè ikitip ufe inyi ogwu oyerebet,
mè ikisa ata-ikọ ataak irọ ibe
ogwu ikalọge ikan ikabọkọ unen oyerebet.”
22 Eya orọ, Okumugwem, ogwu òfafaka Ebereyam isibi,
ìtumu inyi ebi uwu kè Jekọp ibe ikeyi:
“Esip ìkpoyaka itet ebi uwu kè Jekọp ofifi,
ema kpebeyaka iweek ere ema ebelet isi.
23 Mgbọ ema isimun̄ bọn kiban̄,
eyi òre ubọk ikwaan̄ n̄a, me etete kiban̄,
ema mêsusun̄ erieen̄ n̄a me mbuban,
mè isun̄ Ogwu Mbuban kè Jekọp me mbuban,
mè itet ukpook me lek Awaji ebi Ijeren.
24 Ebi ìkije ilọ me inu geelek mêkaan̄ ngobo-ntet,
ebi ìkifuk ijo inu ene orọbe mêbọkọ nteme-item.”