Atagọọk môtibi isibi me lek kè Jesi
11
Nsek otu uti ge môbum isibi me etete ebi ìsisik me otoko kè Jesi;Agọọk ge môtibi isibi me lek ugwun̄-ijọn̄ kan̄,
mè ito mfut.
2 Ekwukwu Okumugwem môkup me lek kan̄,
Ekwukwu eyi iriọọn̄-inu mè ngobo-ntet,
Ekwukwu eyi nteme mè unye,
Ekwukwu eyi ifuk-ibot mè eyi itetet
ukpook me lek Okumugwem.
3 Inu òbokitop ọmọ me lek
ìre itetet ukpook me lek Okumugwem.
Ọmọ ìkposa inu chieen̄ kan̄ omun̄be isibi oyerebet,
ìkposasa si inu utọn̄ kan̄ onọbe ifieek oyerebet.
4 Ire, môsa ata irọrọ isibi oyerebet me ibot ebi una ubọk,
môsa unen oyerebet ifieek ikọ
me ibot ebi ugbọọn̄ me linyọn̄.
Ikọ otu kan̄ ke ìbosa isulu ebi linyọn̄ njijan̄,
mè isa efet otu kan̄ ikpan̄ ebi ikpak isan̄a.
5 Ata irọrọ obore fanti kan̄,
igbegbe utoon̄-ejit obore olik ìbokisa
itobo ofọnti kan̄ ikaan̄ me ebon.
6 Mgbọ ya, ibo oron melek gwun̄ arọọn̄ mêgbaan̄ iluk;
egbe ntọọk ntọọk melek gwun̄
ebot mêgbaan̄ ilaak me ere ge,
gwun̄ eriembuuk melek gwun̄ egbe àtat
mè gwun̄ anam egwookbe
imin ufuk mêgbaan̄ ikup me ere ge,
sọntiik gwun̄ môkekisa ema ije.
7 Eriembuuk melek ibo nriọk mêgbaan̄ ikibọm urie,
bọn kiban̄ mêgbaan̄ ilaak me ere ge,
egbe àtat môtaka mbubet kubọk eriembuuk.
8 Gwun̄ òkinwọ ebe môtap ubọk me udọn̄ ijo ulu,
gwun̄ ebanbe ebe môtap ubọk me uwu ebọn̄.
9 Kpunu inu òboyaka ikisak ene unan, mè ìre ijijaka inu,
me otutuuk ogoon̄ mbuban n̄a,
mije, ebilene ebi ìrọriọọn̄
Okumugwem ebejojot otutuuk linyọn̄,
kubọk mun̄ ojot okwaan̄ dum dum.
10 Me usen ya, Ugwun̄-ijọn̄ kè Jesi môkeke kubọk egop inyi ebi ido geelek. Ebi ido geelek mênu me lek kan̄. Ere isiki-efuuk kan̄ môkup mgbugbo. 11 Me usen ya, Okumugwem mônyana ubọk kan̄ òso mgbọ iba ikpulu ebi kan̄ ebi ìsisik, ebi ìkup me Asiria, mè Ijipiti agan̄ Paturus mè agan̄ Kus, mè Elam, mè Babilonia, mè Amat, mè inyọn̄ achọ òkup me emen awaji.
12 Môbene egop isa inyi ebi ido geelek ulook,
mè igbaan̄ ebi Ijeren, ebi elapbe ichieen̄, ititiin̄,
mè ikpulu ebi Juda, ebi ìyiyiyala, igba,
inan̄a me agan̄ ini eyi linyọn̄.
13 Ejit ile ebi Iferem ekikaan̄ môtata,
ochicha-chieen̄ òkinu inyi ebi Juda môfefieek,
ebi Iferem kpebeyaka ikimin ejit me lek ebi Juda,
ebi Juda kpebeyaka ikikaan̄
ochicha-chieen̄ me lek ebi Iferem.
14 Ema mêgbaan̄ isi akọn̄ me lek ebi Filisia
me osiki ijọn̄ agan̄ ichep-ura,
mè igbaan̄ ifum inu ebi agan̄ mbum-ura me akọn̄.
Ema mêtim ikpan̄ ebi Edọm melek ebi Mowabu,
ebi Amọn mêninin̄ usun̄ inyi ema.
15 Okumugwem môrọ inyi ọfọ okwaan̄
Ijipiti ichiaak ikana nchat ijọn̄,
mè iyaka ubọk ikwek okwaan̄ Yuferetis,
mè isa uyok uyok efet iniche okwaan̄ ya
ikana okolo jaaba,
inyi ebilene mêkọt ikisa ikpukot me ukot ije isaba.
16 Ikpele oniin̄ mônenikup inyi ebi kan̄ ìsisik,
ebi ìbenan̄a me Asiria ikika,
kubọk îkupbe inyi ebi Ijeren
mgbọ ema enan̄abe me Ijipiti ika.