10
Môfieek inyi ebi ìkitap nlilọ ikan,mè ebi ìge ikpa cha ìkige ikan òkitap tukutuku,
2 isa ikigban ibe ebi ugbọọn̄ ekakaan̄ unen kiban̄,
mè ijit isisibi unen oyerebet inyi ebi n̄a ebi ekitutuku;
ema ekisa ebi nwakpa irọ unọn mfeen̄-ubọk kiban̄,
mè ikifiaan̄ ebi kpà-nte ibọkọ inu.
3 Keke ke enyi eberọ me usen osusut ya,
mgbọ mfufiat mônan̄abe me ujọn̄ọ ere inu?
Ekene ke enyi ebelibi isi lek ibe itap ubọk inyi enyi?
Sà ere owa ke enyi ebesun̄ inu ubọọn̄ kinyi cha?
4 Otutuuk inu òkukup ìre enyi igegele igwook me etete ebi mkpọn,
mè ìyaka ire irururọn̄ọ ilaak
me etete ebi ekpan̄be igwook.
Ire, ubọk geelek ibe ke otutuuk inu chi îrọ iso,
unaan̄-ejit Okumugwem ìkasiki si,
Okumugwem ìkpọkpọ ibene ubọk kan̄ ifo inyọn̄
ikiweek isusulu si ema osusut.
Oyerebet Awaji me ibot ebi Asiria
5 “Môfieek inyi Asiria, ọmọ ore
njijan̄ mbasa ijeen̄ unaan̄-ejit n̄a;
uyok uyok unaan̄-ejit n̄a ore m̀gbele me ubọk kan̄.
6 Mâria ọmọ isi lek ido ebi ekariọọn̄ge Awaji,
mânyi ọmọ ida ibe isi lek ebi ìkirọ ejit inaan̄ emi,
mè ifum mfum, mè ikpulu inu me akọn̄,
mè ijak ebi ife cha ikana ibat
kubọk ogbọ òkup me eden̄ oniin̄.
7 Ire, ìkare ikeya ke ọmọ okaan̄ me nkeek kan̄,
ìkarere si ikeya ke ọmọ oben me ejit;
nkeek kan̄ ìre ijijijaka ere igwook,
mè ichechep owuwa ido.
8 Ọmọ ìkitumu ibe,
‘Ìre otutuuk ebi ibot akọn̄ n̄a kpere ebi ubọọn̄ iso?
9 Ìre ìkare ubọk ema ejijakabe
Kalino ke ema ejijaka Karekemis?
Ìre ìkare inu erọbe me Aripadi ke erọ si me Amat,
sà ìre ìkare inu òrọ me
Damasikọs orọ si me Sameria?
10 Ike ubọk n̄a ojijakabe ebi ido cha ìkiriaak mkpọmfaka,
ebi mkpọmfaka kiban̄ okaan̄be unye
igak echi ebi Jeruselem mè ebi Sameria,
11 ìre emi m̀kpakọt ijijaka
si Jeruselem mè mkpọmfaka kan̄
kubọk njijakabe Sameria mè mkpọmfaka kan̄ ni?’ ”
12 Ogwukaan̄-ene isirọ otutuuk inu ìborọ me ogoon̄ Sayọn melek Jeruselem isan̄a, mônenitumu ibe, “Emi mâsulu ogwu ubọọn̄ Asiria osusut, mije, ìgegen ibak ikigumu lek, mè ikibene oguga.” 13 Mije ọmọ ìkigugo lek ibe,
“ ‘Unye ubọk n̄a ke nsa irọ inu chi,
ǹsa me iriọọn̄-inu n̄a irọ, mije, nkaan̄ ngobo-ntet.
Mbọkọ owuwa ido me akọn̄,
mè itutuku okike ijọn̄ kiban̄ isan̄a kpai,
mè ifum inu geelek ema ekukọbe isun̄;
emi kubọk ogwu unye,
ǹdada ebi ubọọn̄ ido cha isan̄a me inyọn̄ ogboon̄ kiban̄.
14 Ike ene okitap ubọk me uwu ofut,
ikeya ke emi ntoon̄ ubọk n̄a
me lek inu ubọọn̄ ebi esese ido;
ike ebi ene ekikpulu nkwa ofut
ogwukaan̄ owulube inan̄a itele,
ikeya ke mkpulu otutuuk ido geelek me linyọn̄;
kpunu ene geege òkọkọt isulu uwop kan̄ perep perep,
kpunu si ene geege òkọkọt
ikama otu isan̄a amọn pim.’ ”
15 Ìre otuban môkọt igugo lek
ibe ọmọ îmin igak ogwu òkisa ọmọ ifieek uti?
Sà ìre ojijọọk môkọt ibene lek
igak ogwu òkisa ọmọ ijọọk inu?
Eya ìbokup kubọk m̀gbele oyaka
ikisa ogwu òtetet ọmọ isulu ene,
mè ikup si kubọk mkpat
okibene ogwu ebilene ogwu ikarege uti
ikiwum ikana.
16 Eya orọ, Ogwukaan̄-ene
Okumugwem Ogwukaan̄ Inyọn̄ mè Ijọn̄
môria ijo orukan̄ òkitak ene lek
itap me etete ebi akọn̄ ìmimiin̄ ufuk;
mè isọk ukan̄ me irak umin kiban̄,
inyi ikitaka ema lek kubọk ukan̄ òkisasak.
17 Awaji ogwu òre utoon̄ ebi Ijeren môkana ukan̄,
Ogwu Mbuban kiban̄ môkana alọm ukan̄;
me egwe ge gaalek,
ọmọ môtaka ukpak kiban̄ mè abọm egbe kiban̄ iriọk.
18 Ukan̄ ya môtaka ujuja oron kiban̄ cha,
mè itaka si ata ijọn̄ uko kiban̄ otutuuk isan̄a kpai.
Lek kiban̄ môtatak ita,
kubọk lek ogwu orukan̄ okitak ita.
19 Mgbọ ya, uti òboyaka inisik me oron kiban̄
ìbore ebon inen mè inen gaalek,
sọntiik gwun̄ môkọt ifuk otu ifuk uti cha.
Ebi ìsisik me lek ebi Ijeren
20 Me usen ya, ebi ìsisik me lek ebi Ijeren,
ebi kè Jekọp ebi ìlilibi inwọnọ,
kpebeyaka ibieen̄ lek me lek ogwu òkpakpan̄ ema ito,
ire, ema ebebieen̄ lek me lek Okumugwem,
Ogwu Mbuban ebi Ijeren, me atikọ.
21 Ebi ìsisik mêkika,
ebi kè Jekọp ìsisik mêka me
atikọ inu me lek Awaji Òkaan̄ Unye.
22 Jei Ijeren, ikerere ibe ebi kwun̄
ewa kubọk achiaan̄ agba awaji,
ebi ìsisik me lek kiban̄ gaalek ebeka.
Mîtumu ifieek ibe ke jakajaka mônu inyi ema,
ire, ìboje melek ata irọrọ òraraka iman̄.
23 Mije, Ogwukaan̄-ene
Okumugwem Ogwukaan̄ Inyọn̄ mè Ijọn̄
mônisa jakajaka îtumube ifieek ibe ọmọ môrọ ya,
inu me otutuuk lek ijọn̄ yi.
24 Eya orọ, Ogwukaan̄-ene Okumugwem Ogwukaan̄ Inyọn̄ mè Ijọn̄ ìtumu ibe ikeyi,
“Jei, ebi n̄a, ebi ìluk me Sayọn,
ikatet ukpook me lek ebi Asiria,
ebi ìkisa m̀gbele isulu enyi,
mè ikibene mkpat isa ikibọn̄
enyi kubọk ebi Ijipiti erọbe enyi.
25 Sọnja mgbọ gaalek osik, unaan̄-ejit n̄a me lek kinyi môta,
emi mâneniben unaan̄-ejit n̄a iyaka ida ema,
isa ijijaka ema isan̄a.”
26 Okumugwem Ogwukaan̄ Inyọn̄
mè Ijọn̄ môsa njijan̄ isulu ema,
kubọk îsulube ebi Midian me lek ewuuk Orep;
ọmọ môbene mkpat kan̄ ijeen̄ okwaan̄,
kubọk îrọbe me Ijipiti.
27 Me usen ya, mêfeme enyi ulobo
akpan kiban̄ ya isan̄a me oguga,
mè ifaan̄ ọgbọn kiban̄ cha isan̄a enyi me ebek;
mkpọn cha môfaan̄ me ebek kinyi igwook
mije enyi emiin̄be ufuk.
28 Urum akọn̄ ebi Asiria mînire Ayat,
ema eje itibi iraka me Migirọn,
mè isun̄ nroon̄ akọn̄ kiban̄ me Mikimas.
29 Ema eje me oniin̄ utibi ogoon̄ iraka,
mè igba Geba ilaak me eririeen̄ ya.
Ebi Rama mêkijijiin̄,
ebi Gibiya, ama ebi kè Sọọlu, mîliin̄ ita kpai.
30 Enyi ebi ama Galim, ìbene ida ìtaan̄ ukpo!
Enyi ebi Layisa, ìgban̄ utọn̄!
Jei, ebi Anatọt, njijin me lek kinyi!
31 Ebi Madimena mîlim ichieen̄ ita,
ebi ìluk me Gebim mîweek ere itap ibot.
32 Me usen yaage si, ebi akọn̄ cha eyaka me Nọbu,
mè ikiriak lek inyi ebi inyọn̄ ogoon̄ ama Sayọn,
mè ebi inyọn̄ orioon̄ ama Jeruselem.
33 Ìkpọ, Ogwukaan̄-ene
Okumugwem Ogwukaan̄ Inyọn̄ mè Ijọn̄,
mônisọp agọọk ikpele uti ya igwook me unye,
mè ichon uti ubene ile cha igwook,
mè ikpaan̄ ujọn̄ọ uti cha ilaak ire ijọn̄.
34 Ọmọ môsa otuban isọp asabọn uti òkup me oron isan̄a,
ikpele uti Lebanọn cha
mêgbugbọ irọn̄ me umin kiban̄.