26
Ike ibot awo irọrọn̄ọ me mgbọ ura mèibot irerep mgbọ irọrọkọ uko olọbe,
ikeya si, inyinyi ogwu mbubut umin, îlọ.
2 Ike ùyọrọ okiwulu, isi ìkakikeke,
mè agagawaji okiwulu iraka nyên̄,
ikeya si, ufieek-otu efieekbe me kpunu inu ene orọbe ilọ,
ìkakitet ene.
3 Uti ke ekisa ineen̄ inyinya itat me oniin̄,
ọgbọn ke ekisa idut inyinya akpan, inyi ije itat,
njijan̄ ke ekisa ibak udun̄ ogwu mbubut,
inyi iriọọn̄ inu.
4 Kafọọk ogwu mbubut ikọ ìkpọ me lek mbubut kan̄,
inyi owu okakana mbubut ogbo kan̄.
5 Fọọk ogwu mbubut ikọ ike mbubut kan̄ odobe,
inyi ikamọnọ ibe ọmọ îriọọn̄ inu.
6 Ogwu òtap etip me ubọk ogwu mbubut ibe isi ilook,
ìkup kubọk ene ya ìfefieek ukot kan̄ isan̄a,
mè inwọ afa itap me owot.
7 Urọk ogwu mbubut otobe ìkakaan̄ oruru,
ìbet lek ukot ogwu akọọk òkidididen̄.
8 Ogwu ònyi ogwu mbubut umin ìre mbubut,
kubọk ogwu òbọbọp mgbọlọ ikam
me lek olik mgbọlọ.
9 Urọk òkup me otu ogwu mbubut ìkikup unan unan,
ìbet lek ukpak ònwanwaan̄ me ubọk ogwu usa-miin̄.
10 Ogwu ògwen ogwu mbubut
mè ìre ogwu nyanya me ọkọ ikwaan̄,
ìbet lek ogwu òsook oraan̄ òkpọkpọ isook oraan̄ itaak ene unan,
ìkadọdọ.
11 Ubọk ibo okigbọ igbọ isan̄a mè òben òlaka,
ikeya si ke ogwu mbubut
okpọkpọ mbubut inu kan̄ ikirọ.
12 Ogwu geelek òkimọnọ lek kan̄ kubọk ọmọ miriọọn̄ inu,
ònu-me-isi ogwu mbubut înwọn igak eyi ene ya.
13 Ogwu ugbek ìkibe, “Egbe àtat ọmọ òwa me lek oniin̄,
egbe àtat òkaan̄ urimi me lek
òkinya ikana lek oniin̄ me emen ama.”
14 Ike afọn̄ okiyak inyi isi, òyak onyi udun̄ me lek mgba kan̄,
ikeya ke ogwu ugbek okigwu lek ikana
me inyọn̄ mkpilaak kan̄.
15 Ogwu ugbek ìkinwaan̄ ubọk ibia me emen okwa inorie,
una efuuk ìkakichieek ibe ikọt
ibene ubọk itap inorie me otu.
16 Me chieen̄ ogwu ugbek, ọmọ oriọọn̄ inu,
igak ene jaaba ebi ìkifọọk ikọ me iriọọn̄-inu.
17 Ogwu nyanya òsi ìtap lek me ikọ ikagbaan̄ge ọmọ me lek,
ìbet lek ogwu òsi ìtaba utọn̄ ibo,
môben unan.
18 Ike ogwu iraak òkisook oraan̄
mè ìre inu òkiseseme ikpan̄ ene okupbe,
19 ikeya si ke ogwu òfafiaan̄ ogwu melek kan̄ isan̄a,
mè ibe, “Ǹsa ìrọ mbele ma,” okup.
20 Ukan̄ môniin̄ ita, ire kpunu iye,
ikeya si, ibaak môta, ire kpunu mbia.
21 Ike mbubuuk ukan̄ okirọ mfifit ukan̄ ibeen̄,
mè ike iye okirọ ukan̄ ibumu,
ikeya ke ogwu ibaak okito etim.
22 Ikọ ogwu mbia ìkinin̄i kubọk uchọk,
mè oraka òre irak irak owot ene.
23 Ogwu ijo ejit òkaan̄ unin̄i otu,
ìbet lek otin̄ ibat
esabe ifin alata okuket ichọkọ ichit lek.
24 Ogwu òcha ene ìkitumu ikọ utop utop,
isa ikilet ofiaan̄ òkup me emen kan̄.
25 Isikitumu ikọ me unin̄i ida, kagban̄,
mije, òchichaka inu jaaba okup me emen ejit kan̄.
26 Môkọt isa ofiaan̄ ilet ochicha îkaan̄be,
ire, ijo ejit kan̄ ìbokpọk mbum
me ere ogbogbo ene etitiin̄be.
27 Ogwu òrọkọ udọn̄ iban ene, môrọn̄ inin̄ emen udọn̄ kan̄;
ogwu òkpukpọt ewuuk ibosa ikeme ene,
ewuuk ya môgwu ikom ikpukpọt ikeme ọmọ.
28 Otu alọm òtutumu ikọ itoon̄ ene, ìchacha ene ya;
ikeya si, otu òkifiaan̄ itọn̄ ene, ìkitap jakajaka.