27
Kasa egwe iyakwut òbowele ìgugo lek,mije, òkariọọn̄ inu egwe usen obosa inu.
2 Tele ofifi ene itọn̄ owu, owu katọn̄ lek kwun̄,
tele ibe inan̄a me otu ogwu ichen, ikare otu kwun̄.
3 Ewuuk îlobo, achiaan̄ îkaan̄ ìbit me lek,
ire, unaan̄-ejit ogwu mbubut okirọ ibe ene inaan̄,
îlobo igak inu iba cha.
4 Unaan̄-ejit ìre inu afa, uyok-ejit ìre mun̄ ile,
ire, ekene obokọt ikeke ida
mfufiat eyi chieen̄ ile okisa inu?
5 Ikakan̄ inu inyi ene isi mè isi,
ọmọ onwọn igak nlelet imumechieen̄.
6 Unan unene osakbe me lek ogwu unene,
ọmọ onwọn igak
òma ogwu ochicha okaan̄be me lek ene.
7 Ogwu owot ojotbe,
atalek aran̄ akwọọk ònan̄a me lek akpa akwọọk
ìkijọjọ ejit;
ire, me lek ogwu uraafiọọn̄,
otutuuk inu geelek òjajat
ìkitotop me otu.
8 Ogwu ònanan̄a itele uwu kan̄ isi ikinyinya ikana,
ìbet lek unọn òtetele uwu kan̄ ikiwulu ikana ere.
9 Aran̄ utop olu mè nsensi òkibubaan̄ olu ìkibele ene ejit,
ire, utop eyi unene iba înin̄i igak
nteme geelek ònan̄a me ejit ene gaalek.
10 Katele unene kwun̄ mè ìre unene nte kwun̄;
kabe ọmọ isi uwu ngwan̄ kwun̄
me usen ufialek isikeme owu;
ogwu òluk igbet owu ere me lek,
înwọn igak ngwan̄ kwun̄ òkup me ujọn̄ọ ere.
11 Gwun̄ n̄a, riọọn̄ inu, inyi ejit ibele emi,
ufuna ǹkọt m̀fọọk ikọ ogwu òkisọ otu inyi emi.
12 Ogwu òriọọn̄ lek imun̄ ijo inu, olibi olet,
ire, ogwu una ekiket okpọkpọ oje ònin̄, mè òben osusut.
13 Bọkọ ofọnti ogwu òbọkọ ogwu
kperiọọn̄ isi me ata-ikọ tet kaan̄,
ire, tet ọmọ me lek kan̄ me nsọọn̄
ire ke îre nwa òsi ugan ke îbọkọ me ata-ikọ.
14 Amọn ene otaan̄be ukpo itọp ogwu melek kan̄
me otu ewelegwe,
ebi ene ebemọnọ ibe ke îre ogbo.
15 Nwa òkibaak ibaak ìkikup me lek ene ifi ifi,
kubọk ibot òkpọkpọ ikirọn̄ọ sọi sọi sọi me usen ibot;
16 ogwu òkisa igbagban ọmọ me lek ibaak,
ìbet lek ogwu òkisa itetet efet,
mè ìre ogwu òkisa itetet aran̄ me ubọk ulom kan̄.
17 Ewuuk irie uba, uba òrie ewuuk;
ubọk ge igwọk ge, ubọk ge ògwọk ge.
18 Ogwu ògbala chieen̄ ikpọ uti figi, oborie mfut kan̄;
ikeya si, ogwu òrọriọọn̄ ubọk ikpọ ogwu ute-uwu,
ogwa obokaan̄ umin.
19 Ubọk isi ene me emen mun̄ okibọkọ isi ene,
ikeya ke ejit ene okijeen̄ inu ene orebe.
20 Ike owot ìkakijot udọn̄ mkpa mè ama ekwukwu,
ikeya si, inu òkilọk ene ìkakijot ene chieen̄.
21 Ike ekisa uchieen̄ mè unye ukan̄ itọ alata okuket
mè alata araran̄ iriọọn̄ eyi atata,
ikeya si, ekisa ubọk ekitọn̄ ene
iriọọn̄ mbet ogwu ene ya orebe.
22 Tap ogwu mbubut me otik,
mè sa otitim gbaan̄ ọmọ melek akpa tun̄ riọk,
mbubut kan̄ ìkabota ọmọ me lek.
23 Riọọn̄ ubọk kikpọ chieen̄
me lek urum arọọn̄ mè ebot kwun̄,
gwuun̄ chieen̄ me lek urum eriembuuk kwun̄;
24 mije, inu ubọọn̄ ìkakikup ìre mgbọ geelek,
okpibot ubọọn̄ si ìkakikeke ìre ukot geelek.
25 Isikpulu nchiaak mbubet isan̄a,
mè echi nsek otu isigwook,
mè isisọp mbubet me inyọn̄ ogoon̄ igbaan̄ inigwook,
26 arọọn̄ kwun̄ îra itaka,
mè itibi inwọọn̄ owu môsabe irom ekwut,
orie ebot kwun̄ îra imiin̄,
mè isibi ikpoko owu môsabe ilep ijọn̄ uko.
27 Owu môkaan̄ mun̄ ebe ebot
eyi môsobe owu mè otutuuk ototun̄ ukan̄ kwun̄,
mè iso si ire lek ebi ikwaan̄ kwun̄ ebibaan̄.