Urọk Solomọn otobe isọkọ
25
Echi ìre urọk Solomọn otobe isọkọ, echi ebi ikwaan̄ kè Ejikaya ogwu ubọọn̄ Juda egebe:2 Awaji ìkikaan̄ umin inan̄a me ilelet inu itap me okwu,
ire, ogwu ubọọn̄ ìkikaan̄ umin
inan̄a me iweweek inu isibi.
3 Ike kperiọọn̄ ubọk inyọn̄ obenebe ire,
mè ubọk ijọn̄ ogwuukbe ire,
ikeya si, kpebekọt iriọọn̄ emen ejit ebi ubọọn̄.
4 Isisan̄a ifin isan̄a me lek alata okuket,
îra ikana atalek nroon̄ ikwaan̄ ogwu usọ alata okuket.
5 Isisan̄a ebi ìkinyi ogwu ubọọn̄ ikpak ikpak nteme isan̄a,
mkpulu kan̄ îra ikeke inye sa me ikekirọ inu ònenen.
6 Kamin lek kwun̄ me isi ogwu ubọọn̄,
kakup me irek îsun̄be inyi ebi ilile.
7 Mije, înwọn ibe ogwu ubọọn̄ igwen owu ito me irek umin,
igak igegele owu isiki me isi ogwu ilile.
Inu chieen̄ kwun̄ omun̄be,
8 kariraka lek ìben isi uwu oyerebet,
mije, me òta kan̄, owu òkporiọọn̄ inu oborọ,
me mgbọ ogwu melek kwun̄ isitap owu esip me isi.
9 Ire ogọọk ogwu melek kwun̄ ibaak ibaak,
kaben mbum ofifi ene ìkpọk ìwele me oyet.
10 Ire orọ, ogwu isinọ, môrọ owu inu esip,
ijo erieen̄ môbabia owu me lek.
11 Nteme enyibe me ata mgbọ,
ìjaan̄ kubọk ujuja asi ebek alata araran̄
esabe alata okuket ikpa ikana.
12 Ikan̄-inu ogwu òriọọn̄ inu ìkup me utọn̄ ònọ ikọ,
kubọk mkputọn̄ alata araran̄
mè asi ebek atalek alata araran̄.
13 Ike ofiik ibot awo okisiki uyok me mgbọ irọrọkọ uko,
ikeya ke gwun̄ etoon̄be ejit me lek okup
inyi ebi ìraria ọmọ osat,
mije, ọmọ ìkirọ ufuna ejit ebi nte uwu kan̄ cha isiki.
14 Ogwu òchechieek use, ire, ìkakọt irọ,
ìkup kubọk isinyọn̄ òduduku,
mè iwut efet efet, ìkarep ibot.
15 Ujọn̄ọ ukarajit môkọt irọ ogwu mkpulu inwene ejit,
isisiki lek itumu ikọ
môkọt igbugbọ mgban ònyenye igwook.
16 Ire omun̄ aran̄ akwọọk, laka eyi òkekem me lek kwun̄,
olaka igak lek, owu môgbọ ifiin̄.
17 Kamalek ìkijijen̄e isotu uwu ogwu melek kwun̄,
mêriọọn̄ owu ebon, mè ibene ikicha owu.
18 Ogwu òkeke ata-ikọ ataak ikeme ogwu melek kan̄,
ìbet lek otuban mè oge akọn̄ melek oraan̄ òrereke.
19 Ibebieen̄ ejit me lek ogwu mfufiọk me mgbọ ufialek,
ìbet lek ejeek òkifiak ene mè ukot òfafan̄a.
20 Ikọkọt okwa ubelejit inyi ogwu uga ufieejit,
ìfieek kubọk ibọbọkọ ene ekwut ichit-lek
me mgbọ utọọk,
mè ibeben miin̄ agburu igwook me lek miin̄ òninin̄i.
21 Uraafiọọn̄ itet ogwu ochicha kwun̄, nyi inorie irie,
ire ebek irak, nyi mudim inwọ.
22 Sa me ikeya,
owu môgwook mbubuuk ukan̄ me ibot kan̄,
Okumugwem môkpe owu mkpukpe.
23 Ike efet inyọn̄ okije melek ibot,
ikeya ke otu òkikpa ene okisa unaan̄-ejit inu.
24 Ene iluluk ọmọ gaalek me otu utọn̄ inyọn̄ otoon̄-uwu
ikimeen̄ urọt ataak,
înwọn igak iluluk me emen uwu
melek enenwaan̄ òkinwọọn̄ ibaak.
25 Ike ofiik mun̄ okisiki lek ogwu efuuk otabe me owot,
ikeya ke ata etip ònan̄a me okwaan̄ okwaan̄
okisiki ene lek.
26 Ogwu ata irọrọ òbobook irek inyi ogwu ikpak,
ìkup kubọk ibot mun̄ òkup afuk afuk
mè ìre udọn̄ mun̄ òbububuku.
27 Ìkanwọn ibe elaka aran̄ akwọọk enenen,
ikeya si, ìkagbe ibe ene gaalek imin lek kan̄.
28 Ogwu ìkakikọt ìtet lek kan̄ ìkaan̄,
ìkup kubọk ama ògbugbugbọ igwook,
eyi ikakaan̄ge si mgban.