Ikọ ebi ìriọọn̄ inu òso akọp mè onaan̄ge
24
Kamin ejit me lek ebi ìkirọ ikpak,kaweweek ikukup me ogbo kiban̄.
2 Mije, inu afa ke ema ekitọt me ejit kiban̄,
itoto uyọrọlek ore ikọ ema ekitaka me otu.
Ikọ ebi ìriọọn̄ inu òso akọp iba
3 Ekisa me iriọọn̄-inu inama uwu,
mè isa ngobo-ntet irọ inyi ikeke inye.
4 Sa me ifuk-ibot ke ekitap inu ijot emen agwut geelek,
otutuuk inu unye otu ewe geelek,
mè inu geelek òjajaan̄.
Ikọ ebi ìriọọn̄ inu òso akọp iba mè ge
5 Ogwu òkaan̄ iriọọn̄-inu ìkaan̄ ikpele unye,
ogwu òkaan̄ ifuk-ibot ìkitap unye me lek efuuk kan̄.
6 Mije, ata nteme ke owu obosa isi akọn̄,
sa me owuwa ebi nteme
ke owu obotim ikpan̄ me akọn̄.
Ikọ ebi ìriọọn̄ inu òso akọp iba mè iba
7 Iriọọn̄-inu ìre inu òbebene enenen
me lek ogwu mbubut,
me ere ntitiin̄ ama, otu kan̄ ìkigọgọm.
Ikọ ebi ìriọọn̄ inu òso akọp iba mè ita
8 Ogwu òkitọt irọrọ ijo inu,
mêgwen ọmọ ogwu ijo otitọt.
9 Otitọt ogwu mbubut ire eyi ijo inu,
ogwu òchak ene ìre mbuban inu me etete ebi ene.
Ikọ ebi ìriọọn̄ inu òso akọp iba mè ini
10 Ire òkakọt ìtet lek kwun̄ me usen ufialek,
efuuk kwun̄ îse enenen.
Ikọ ebi ìriọọn̄ inu òso akọp iba mè go
11 Nyan̄a ebi ekidut ibesi ikpan̄,
keke kwek ebi ekisa ije gbegbegbe ibesi igwu.
12 Ire owu obe, “Eji kperiọọn̄ ma,”
Awaji ogwu òkiriọọn̄ ejit ene, ìre ìkamun̄ lek?
Ọmọ ogwu òkibọọk ugwem kwun̄, ìre ìkariọọn̄ ni?
Ọmọ môkpe ene geelek mkpukpe
ikpọ me lek ikwaan̄ ene ya orọbe.
Ikọ ebi ìriọọn̄ inu òso akọp iba mè gweregwen
13 Gwun̄ n̄a, laka aran̄ akwọọk mije ke înwọn,
eyi òkirọn̄ọ me lek akpa akwọọk,
eya ìbokininin̄i me otu kwun̄.
14 Ikeya ke iriọọn̄-inu okup inyi ibot ejit kwun̄;
ire oweek imun̄, ata inu òwa me isi inyi owu,
ikpọchieen̄ okaan̄be ìkpochep.
Ikọ ebi ìriọọn̄ inu òso akọp iba mè jaaba
15 Owu ogwu ikpak, kakitap ufe me isotu uwu ogwu ata irọrọ,
kanin̄ ere ọmọ okiyaka ibot imaan̄ ìsi ìgwak ere ìgwook.
16 Mije, ikerere ogwu ata irọrọ ìrọrọn̄ mgbọ jaaba, mônan̄a ikeke,
ire, ebi ikpak mêtọbọ ukot,
mè inan̄a irọn̄ inin̄ me emen ijo inu.
Ikọ ebi ìriọọn̄ inu òso akọp iba mè jeeta
17 Kabele ejit mgbọ ogwu ochicha kwun̄ isirọn̄ inin̄ ufialek,
kanwọnwọọn̄ si lek
mgbọ isitọbọ ukot inan̄a irọn̄ inin̄ me uyọrọlek,
18 inyi Okumugwem ikamun̄ owu, mè ìkaan̄ uduk,
mè ìtele unaan̄-ejit kan̄ me lek ene ya.
Ikọ ebi ìriọọn̄ inu òso akọp iba mè onaan̄ge
19 Kasisaak lek kwun̄ mije ebi ijo ebilene,
kamin ejit me lek ebi ikpak.
20 Mije, ogwu ijo ene ìkakaan̄ ikpọchieen̄
me lek mgbọ òkup me isi,
mkpukan̄ ebi ikpak, ebewuwut iniin̄ dìp.
Ikọ ebi ìriọọn̄ inu òso akọp ita
21 Gwun̄ n̄a, tet ukpook me lek Okumugwem,
mè tet si me lek ogwu ubọọn̄;
kagbaan̄ inu ìrọ melek ebi ìkikpaka ibot inyi ema.
22 Mije, uyọrọlek ìbotoon̄ ema me uwuuk-lek,
mfufiat Awaji mè ogwu ubọọn̄ ebesa initoon̄ ema,
kpunu ogwu òrọriọọn̄.
Ofifi ikọ ebi ìriọọn̄ inu
23 Echichi ìre si ofifi ikọ ebi ìriọọn̄ inu:
Oyerebet ulibi-chieen̄ ìkanwọn.
24 Ogwu itumu inyi ogwu òlọlọ ikan ibe,
“Ubọk kwun̄ îtana,”
ebi ife geelek mêfieek otu inyi ene ya,
owuwa ebi ido mêjọ ejit me lek kan̄.
25 Ire, ebi geelek ìtitip ebi ìlọlọ ikan oyerebet,
inu môje ijaan̄ me lek,
ata ugbana môkup inyi ema.
26 Ikọ efọọkbe itat,
ìkitop kubọk ekat ene isa ibọkọ ene itap.
27 Si ikwaan̄ kwun̄ me oyet san̄a,
mè nen̄e uko kwun̄ sun̄;
echa isita, tolek nama uwu kwun̄.
28 Kakeke ata-ikọ ìkeme ogwu melek kwun̄
me kpunube ibot,
kasa otu kwun̄ ìfiaan̄ ene.
29 Kabe, “Mârọ ọmọ useen̄ mè useen̄,
mârọ ene ya ikpọ me lek inu îrọbe.”
30 Nje itibi iraka me uko ogwu ugbek,
mè ije si itibi uko gerep ogwu una ngobo-ntet.
31 Abọm egbe ìtitibi ijot emen uko cha gbak,
ukpak ukpak ogwook ichit emen gboi,
ogọ ewuuk enamabe ikana îgbugbọ igwook.
32 Emi me lek n̄a mkpọ inu ya, mè ikaan̄ ekiket ofolek,
emi mmun̄ inu ya, mè isa ikween̄ inu inyi lek n̄a.
33 Inu nkween̄be ìre: Olaak sọnja, onyieen̄ sọnja,
mè igba ubọk ikat isiki efuuk sọnja,
34 ugbọọri môkakana isibi owu me uwuuk-lek
kubọk ogwu ije;
una ubọk mônunu
kubọk ogwu inọ afa inichiaan̄ owu irak.