Ikọ ebi ìriọọn̄ inu òso gweregwen
23
Ire ogọọk ogwu mkpulu ikweek me irek inorie,gbagbala chieen̄ me lek inorie òkup me isi kwun̄.
2 Sa inu nwaan̄ ebek kwun̄ chit,
ire owu ore ogwu ebek ile.
3 Kachieek ibe utop utop inorie kan̄ ikọlọ owu ebek,
mije, inorie ya ìre ufe.
Ikọ ebi ìriọọn̄ inu òso jaaba
4 Kakpan̄ lek kwun̄ ìnyi iweweek ikpoko,
riọọn̄ inu nyi lek kwun̄, mè kpebe lek me lek.
5 Osirerieen̄ chieen̄ me lek ikpoko, îrọ nyên̄;
ikpoko ìbotitibi uwop me lek,
mè iwulu ichep kubọk igo owulu ifo akpabin inyọn̄.
Ikọ ebi ìriọọn̄ inu òso jeeta
6 Karie inorie ogwu ìbuk,
kachieek ibe utop utop inorie kan̄ ikọlọ owu ebek.
7 Mije, òkikeek otu ifuk ikpoko òjeje me lek.
Môkibe owu, “Rie ma! Nwọ ma!”
Ire, ejit kan̄ ìkakup me lek kwun̄.
8 Sọntiik inorie oriebe ya, owu môgbọ isibi,
otutuuk itọtọn̄ cha otọn̄be ọmọ ìchechep.
Ikọ ebi ìriọọn̄ inu òso onaan̄ge
9 Katumu ikọ me utọn̄ ogwu mbubut,
mije, môkpọ chieen̄ isiki me lek
iriọọn̄-lek òkup me emen ikọ kwun̄.
Ikọ ebi ìriọọn̄ inu òso akọp
10 Kajujuk okike ijọn̄ etapbe karake akat,
kachak ubọk me lek ijọn̄ ebi kpà-nte.
11 Mije, Okumugwem ogwu òkeke ema me udun̄
înye lek enenen,
ọmọ môsibi oyerebet ibot kiban̄ melek kwun̄.
Ikọ ebi ìriọọn̄ inu òso akọp mè ge
12 Sa ejit kwun̄ nyi ikween̄-inu,
mè sa utọn̄ kinọ ikọ òkaan̄ ifuk-ibot me emen.
Ikọ ebi ìriọọn̄ inu òso akọp mè iba
13 Katele ikekikan̄ inu inyi gwun̄,
njijan̄ ìkakikpan̄ ene.
14 Ire okisa njijan̄ isulu,
owu môrọ ibe inwọnọ mkpa.
Ikọ ebi ìriọọn̄ inu òso akọp mè ita
15 Gwun̄ n̄a, ire iriọọn̄-inu ikup owu me emen,
emi si, ejit n̄a môbele.
16 Mâkaan̄ uga unwọọn̄ me emen n̄a,
mgbọ ikọ ònenen isikisibi owu me otu.
Ikọ ebi ìriọọn̄ inu òso akọp mè ini
17 Kamin ejit me lek ebi ìkirọ ijo inu,
ire, ejit kwun̄ iyok mgbọ geelek
me lek itetet ukpook Okumugwem.
18 Mije, me atikọ, ata inu òwa me isi inyi owu,
ikpọchieen̄ okaan̄be ìkpochep.
Ikọ ebi ìriọọn̄ inu òso akọp mè go
19 Gwun̄ n̄a, gban̄, mè kaan̄ iriọọn̄-inu,
mè nen̄e ejit kwun̄ tat me oniin̄ ònenen.
20 Kakigbaan̄ ìje melek ebi uga miin̄,
mè ìre ebi ìkibook ebek inyi itataka anam.
21 Mije, ebi usa-miin̄ mè ebi ebek ile mênin̄ ugbọọn̄,
ebi ilaak okideke chieen̄ mgbọ geelek,
oka ekwut oka ekwut ke ema ebekikwun.
Ikọ ebi ìriọọn̄ inu òso akọp mè gweregwen
22 Gban̄ utọn̄ me ida nte kwun̄, îre ọmọ obon owu;
kakpọ nga kwun̄ chieen̄ ìsiki mgbọ isikan.
23 Lep atikọ kaan̄, mè kanyam;
week si iriọọn̄-inu, mè ikween̄-inu, mè ngobo-ntet.
24 Nte gwun̄ ata irọrọ îkaan̄ atalek ikpele unwọọn̄,
ogwu òbon gwun̄ òriọọn̄ inu
ìkibebele ejit me lek gwun̄ ya.
25 Kè nte kwun̄ mè nga kwun̄ ebele ejit!
Kè ogwu òmaman owu inwọọn̄ unwọọn̄!
Ikọ ebi ìriọọn̄ inu òso akọp mè jaaba
26 Gwun̄ n̄a, nyi emi ejit kwun̄,
mè tele chieen̄ kwun̄ igwuun̄ me oniin̄ n̄a.
27 Mije, ogwu òje oyet ìre udọn̄ òdọdọk,
irọn̄ inin̄, kpekisibi;
barabat nwa ìre udọn̄ mun̄ òkup ǹchichit ǹchichit,
irọn̄ inin̄, ènwaan̄ èkam.
28 Ìkilileek kubọk ogwu inọ afa
ikikpọ ogwu ìbokwaan̄ me lek,
mè òkorọ ibe ebirieen̄ ebi barabat ekewa.
Ikọ ebi ìriọọn̄ inu òso akọp mè jeeta
29 Ekene okaan̄ ufialek?
Ekene okaan̄ ufieejit?
Ekene okitim etim?
Ekene okikpa ibot ikọ?
Ekene oben unan me kpunu ibot?
Ekene ke esulu chieen̄ ibak ada?
30 Îre ebi ìkigba ikam me ere miin̄,
ebi ìkikana ere inwọ esese chieen̄ aya miin̄ ewọlọbe.
31 Kakikpọ isi miin̄ me mgbọ înin̄be irio,
mgbọ îkiriak ifuuk me emen ekpen̄,
mgbọ îkije iraka inin̄ ene ebek nèèn̄.
32 Me òta kan̄, ìkilom ene kubọk ijijinu,
mè òkotap ene iwot me lek kubọk ijo ulu otọk ene.
33 Chieen̄ kwun̄ môkimun̄ inu òkup nke nke,
ejit kwun̄ môkekikeek inu wọlọwọlọwọlọ.
34 Owu môkigbugbe kubọk ogwu òlaak me ejit okwaan̄,
mè ikinyen̄e kubọk ogwu òyaka lek
imaan̄ me lek ibot otu uti awala.
35 Owu môkekibe, “Mîgon emi akpọ, ire, ǹkasak unan!
Mîsulu emi, ire, ǹkanọ me lek!
Ìre mgbọ owa ke mbabolo chieen̄ me ilaak,
mè ikpọk isi iweek ofifi miin̄ inwọ?”