22
Ata erieen̄ înwọn igogobo igak owuwa inu ubọọn̄,nnwọn-isi înwọn igak alata okuket mè alata araran̄.
2 Ogwu ubọọn̄ mè ogwu ugbọọn̄ ìre inu yaage,
îre Okumugwem orom ema ene iba.
3 Ogwu òriọọn̄ lek imun̄ ijo inu, olibi olet,
ire, ogwu una ekiket okpọkpọ oje ònin̄, mè òben osusut.
4 Isisiki lek mè itetet ukpook me lek Okumugwem,
ìkisa ubọọn̄ mè umin mè ujọn̄ọ ugwem ijet ene.
5 Ukpak mè ufe ojot me lek oniin̄ ebi mfufiọk ekije,
ire, ogwu òsa ugwem kan̄ igwen inu
ìkikukup ijọn̄ọ ere me lek kiban̄.
6 Jeen̄ gwun̄ inu ònenen ibe ikirọ,
mege òkan, ìkpotele.
7 Ogwu ubọọn̄ okikpulu ogwu ugbọọn̄;
ogwu urieek ìre usun̄ inyi ogwu ufọọk.
8 Ogwu iwop mfeen̄, môrọkọ ufialek,
ijo unaan̄-ejit kan̄ îkisa irọ ebi ofifi ife nnaan̄ môtata.
9 Ugbana môkup inyi ogwu òkichili ubọk,
mije îkinyi ebi ugbọọn̄ inorie.
10 Rieen̄ ogwu òchak ene sibi, etim môfofo;
ibaak mè esip môtata.
11 Ogwu òkirọ inu me ata ejit mè ikitumu ata ikọ,
ene ya môre unene melek ogwu ubọọn̄.
12 Chieen̄ Okumugwem ìgwọgwọk
me lek ogwu òkaan̄ ifuk-ibot,
ire, ìkida ikọ ogwu ofiaan̄ igbuku icho.
13 Ogwu ugbek ìkibe, “Egbe àtat môtet emi me oyet!”
mè ìre, “Mêkpan̄ emi me lek oniin̄!”
14 Otu enenwaan̄ barabat ìre udọn̄ òdọdọk,
ogwu Okumugwem ojọbe ejit me lek môrọn̄ inin̄ emen.
15 Mbubut ìjojot me emen ejit nsabọn,
ire, njijan̄ esabe isulu ema
môlap mbubut ya ijọn̄ọ ema ere me lek.
16 Ogwu òkituk ogwu ugbọọn̄,
ufuna ọmọ ibọọn̄ ubọọn̄ enenen,
mè ogwu òkiche inu inyi ogwu òbọbọọn̄ ubọọn̄,
ema mêrọn̄ ugbọọri.
Akọp ikọ ita ebi ìriọọn̄ inu
17 Siki utọn̄ gban̄ ikọ ebi ìriọọn̄ inu,
mè tap ikọ ifuk-ibot nkitumu me ejit kwun̄.
18 Mije, înwọn ibe owu òtap inu chi me emen ejit kwun̄,
mè otutuuk ikup mgbet mgbet me otu kwun̄,
19 inyi utoon̄-ejit kwun̄ ikup me lek Okumugwem.
Nra ijeen̄ owu me lek kwun̄ inu yi chereyi.
20 Nra ige akọp urọk ita inyi owu,
urọk òkaan̄ nteme mè ifuk-ibot,
21 isasa irọ mè owu òriọọn̄ atalek ikọ echi atikọ,
ufuna owu môkọt inyi ebi ìraria owu ufọọk-otu ògbegbe.
Adasi ikọ ebi ìriọọn̄ inu
22 Kabọkọ ogwu ugbọọn̄ inu me ubọk unye
mije îrebe ogwu ugbọọn̄,
mè kayaka si ubọk ogwu una me uwu oyerebet.
23 Mije, Okumugwem môtumu ikọ ibot kiban̄,
mè ikwọkọ ijeek me ibot
ebi ìkwọkwọkọ ema ijeek me ibot.
Ikọ ebi ìriọọn̄ inu òso iba
24 Katet unene melek ogwu uyok-ejit,
kagọgọọk si ogwu ijo unaan̄-ejit ìgbaan̄ ìje,
25 inyi owu okakween̄ eru kan̄,
mè ìtap lek kwun̄ me ufe.
Ikọ ebi ìriọọn̄ inu òso ita
26 Kare ogwu òkichieek ibọbọkọ urieek ibot ofifi ene ikpe,
kabọkọ ene me ata-ikọ me lek urieek,
27 inyi, ire òkakaan̄ ìsa ìkpe,
ekafum mkpilaak kwun̄ ìsan̄a owu me irak.
Ikọ ebi ìriọọn̄ inu òso ini
28 Kajujuk okike ijọn̄ òkukup karake akat,
eyi ebi nte nte kwun̄ egwuun̄be.
Ikọ ebi ìriọọn̄ inu òso go
29 Ìre omun̄ ogwu òrọriọọn̄ ikwaan̄ ichat ubọk?
Ogwu òkup ikeya ìbokirọ ikwaan̄ inyi ogwu ubọọn̄,
ìkpokirọ ikwaan̄ inyi fọkọfọkọ ife ebi kperiọọn̄ isi.